ബെംഗളൂരു: ഐടി നഗരമായ ബെംഗളൂരുവിലെ അമിതവാടക വർദ്ധനവ് ഒടുവിൽ വീട്ടുടമസ്ഥർക്ക് തന്നെ തിരിച്ചടിയാകുന്നു. വൈറ്റ്ഫീൽഡ് മേഖലയിൽ ഉയർന്ന വാടക ഈടാക്കാൻ ശ്രമിച്ച 3BHK ഫ്ലാറ്റ് ഉടമയ്ക്ക് ഒരു വർഷത്തിനുള്ളിൽ അഞ്ച് ലക്ഷം രൂപയുടെ നഷ്ടം സംഭവിച്ച വാർത്തയാണ് ഇപ്പോൾ സോഷ്യൽ മീഡിയയിൽ ചർച്ചയാകുന്നത്. റെഡ്ഡിറ്റിലൂടെ (Reddit) ഉടമ തന്നെയാണ് തന്റെ ദുരനുഭവം പങ്കുവെച്ചത്.
വൈറ്റ്ഫീൽഡിലെ തന്റെ 3BHK ഫ്ലാറ്റിലെ ഓരോ മുറിക്കും 25,000 രൂപ വീതം ആകെ 75,000 രൂപയാണ് ഉടമ വാടക നിശ്ചയിച്ചിരുന്നത്. എന്നാൽ ആ പ്രദേശത്തെ ശരാശരി വാടക നിരക്ക് 20,000 രൂപ മാത്രമായിരുന്നു. ഉയർന്ന വാടക കാരണം കഴിഞ്ഞ ഒരു വർഷമായി ഫ്ലാറ്റിലെ രണ്ട് മുറികൾ ഒഴിഞ്ഞുകിടക്കുകയാണ്.
ഒരാൾ മാത്രം 25,000 രൂപയ്ക്ക് താമസിക്കുന്നുണ്ടെങ്കിലും, ബാക്കി രണ്ട് മുറികളിൽ നിന്നായി പ്രതിമാസം 40,000 മുതൽ 50,000 രൂപ വരെ ഉടമയ്ക്ക് നഷ്ടപ്പെടുന്നു. ഒരു വർഷം പിന്നിടുമ്പോൾ ഈ നഷ്ടം 5 ലക്ഷം രൂപ കടന്നു. നഷ്ടം ഒഴിവാക്കാൻ വാടക 18,000 രൂപയിലേക്ക് കുറയ്ക്കാൻ ഉടമ ഇപ്പോൾ തയ്യാറായെങ്കിലും, പുതിയ വാടകക്കാരെ കണ്ടെത്താൻ ഇപ്പോഴും സാധിച്ചിട്ടില്ല.
വിപണി മാറി, ഉടമകൾ മാറുന്നില്ല
2022-ൽ ബെംഗളൂരുവിൽ അനുഭവപ്പെട്ട വാടക വർദ്ധനവിന്റെ അതേ ആവേശത്തിലാണ് ഇപ്പോഴും വീട്ടുടമസ്ഥർ ഉള്ളതെന്ന് വാടകക്കാർ ആരോപിക്കുന്നു. നിലവിൽ വിപണി മാറിയെന്നും കൂടുതൽ ഫ്ലാറ്റുകൾ ലഭ്യമായതോടെ വാടകക്കാർക്ക് തിരഞ്ഞെടുക്കാൻ അവസരങ്ങളുണ്ടെന്നും നെറ്റിസൺസ് ചൂണ്ടിക്കാട്ടുന്നു.
വൈറ്റ്ഫീൽഡ് പോലുള്ള സ്ഥലങ്ങളിൽ ഇത്രയും ഉയർന്ന തുക നൽകുന്നത് അനാവശ്യമാണെന്നാണ് സോഷ്യൽ മീഡിയയുടെ പക്ഷം. “ഒരു സ്വതന്ത്ര കെട്ടിടത്തിലെ 2BHK ഫ്ലാറ്റ് 20,000 രൂപയ്ക്ക് ലഭ്യമാകുമ്പോൾ, എന്തിനാണ് ഒരു മുറി പങ്കിടാൻ മാത്രം 25,000 രൂപ നൽകുന്നത്?” – ഒരു ഉപയോക്താവ് ചോദിക്കുന്നു.
ചെറിയ തുക കുറച്ചുനൽകാൻ മടിക്കുന്ന ഉടമകൾക്ക് ദീർഘകാലാടിസ്ഥാനത്തിൽ ലക്ഷങ്ങളുടെ നഷ്ടമാണ് സംഭവിക്കുന്നതെന്നും റെഡ്ഡിറ്റിലെ ചർച്ചകൾ വ്യക്തമാക്കുന്നു.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
