ടെക് ഡെസ്ക്: ഉപയോക്താക്കൾ ഏറെ നാളായി കാത്തിരുന്ന യൂസർനെയിം ഫീച്ചർ ഔദ്യോഗികമായി അവതരിപ്പിക്കാൻ ഒരുങ്ങി ജനപ്രിയ മെസേജിംഗ് പ്ലാറ്റ്ഫോമായ വാട്സ്ആപ്പ്. ഈ സുപ്രധാന ഫീച്ചറിന്റെ ഔദ്യോഗിക അവതരണത്തിന് മുന്നോടിയായി, ഉപയോക്താക്കൾക്ക് തങ്ങൾക്ക് ഇഷ്ടമുള്ള യൂസർനെയിം മുൻകൂട്ടി റിസർവ് ചെയ്യാനുള്ള സൗകര്യം കമ്പനി ആരംഭിച്ചു. വ്യക്തിഗത സ്വകാര്യത കൂടുതൽ ശക്തിപ്പെടുത്തുക എന്ന ലക്ഷ്യത്തോടെയാണ് പുതിയ മാറ്റം കൊണ്ടുവരുന്നത്. ഈ വർഷം അവസാനത്തോടെ ഫീച്ചർ ലോകമെമ്പാടുമുള്ള എല്ലാ ഉപയോക്താക്കൾക്കും ലഭ്യമായിത്തുടങ്ങും. ഇതോടെ ഫോൺ നമ്പർ പങ്കിടാതെ തന്നെ യൂസർനെയിം മാത്രം ഉപയോഗിച്ച് പുതിയ ആളുകളുമായി ചാറ്റ് ആരംഭിക്കാൻ സാധിക്കും.
യൂസർനെയിം റിസർവേഷൻ സൗകര്യം ഘട്ടംഘട്ടമായാണ് ആഗോളതലത്തിൽ ലഭ്യമാക്കുക. ഫീച്ചർ ലഭ്യമാകുന്ന അക്കൗണ്ടുകൾക്ക് വാട്സ്ആപ്പിൽ തന്നെ ഇൻ-ആപ്പ് നോട്ടിഫിക്കേഷൻ ലഭിക്കും. പൊതുവായ പേരുകൾ ഉപയോഗിക്കുന്നവർക്ക് തങ്ങൾക്ക് ഇഷ്ടപ്പെട്ട യൂസർനെയിം മറ്റാരെങ്കിലും സ്വന്തമാക്കുന്നതിന് മുമ്പ് തന്നെ സുരക്ഷിതമാക്കാൻ ഇതിലൂടെ അവസരം ലഭിക്കും. നിലവിൽ ലോകമെമ്പാടുമായി മൂന്ന് ബില്യണിലധികം ആളുകൾ വാട്സ്ആപ്പ് ഉപയോഗിക്കുന്നതിനാൽ ഒരേ യൂസർനെയിം ആവശ്യപ്പെടുന്നവരുടെ എണ്ണം വർധിക്കുമെന്ന കണക്കുകൂട്ടലിലാണ് മുൻകൂട്ടി റിസർവേഷൻ ആരംഭിച്ചിരിക്കുന്നത്. ഇഷ്ടപ്പെട്ട പേര് ലഭ്യമായിട്ടില്ലെങ്കിൽ അനുയോജ്യമായ മറ്റൊരു പേര് കണ്ടെത്താൻ സഹായിക്കുന്ന യൂസർനെയിം ജനറേറ്റർ സംവിധാനവും ഇതിൽ ഉൾപ്പെടുത്തിയിട്ടുണ്ട്.
മറ്റ് സോഷ്യൽ മീഡിയ പ്ലാറ്റ്ഫോമുകളിലെ പോലെ എല്ലാവർക്കും പരസ്യമായി കാണാവുന്ന ഒരു തിരിച്ചറിയൽ സംവിധാനമല്ല വാട്സ്ആപ്പിലെ യൂസർനെയിമെന്ന് കമ്പനി വ്യക്തമാക്കി. ഉപയോക്താക്കൾക്ക് ഇൻസ്റ്റഗ്രാം, ഫേസ്ബുക്ക് തുടങ്ങിയ പ്ലാറ്റ്ഫോമുകളിലെ പേരുകൾ തന്നെ ഉപയോഗിക്കണമെന്ന നിർബന്ധമില്ലാത്തതിനൊപ്പം ആവശ്യാനുസരണം യൂസർനെയിം പിന്നീട് മാറ്റാനും കഴിയും. കൂടാതെ, പൊതുവായ യൂസർനെയിം ഡയറക്ടറിയോ നിർദേശങ്ങളോ ഉണ്ടാകില്ല എന്നതിനാൽ ഒരാളെ ആദ്യമായി ബന്ധപ്പെടാൻ ആ വ്യക്തിയുടെ കൃത്യമായ യൂസർനെയിം അറിഞ്ഞിരിക്കേണ്ടത് നിർബന്ധമാണ്.
അടുത്തിടെ പരിചയപ്പെട്ട ആളുകളുമായി സംസാരിക്കുമ്പോഴോ വിവിധ ഗ്രൂപ്പുകളിലും കമ്മ്യൂണിറ്റികളിലും പങ്കെടുക്കുമ്പോഴോ സ്വന്തം ഫോൺ നമ്പർ വെളിപ്പെടുത്താൻ ആഗ്രഹിക്കാത്തവർക്ക് ഈ ഫീച്ചർ ഏറെ പ്രയോജനപ്പെടും. ഇതിനൊപ്പം കൂടുതൽ സുരക്ഷ ഉറപ്പാക്കാൻ ‘യൂസർനെയിം കീ’ എന്ന ഫീച്ചറും വാട്സ്ആപ്പ് അവതരിപ്പിക്കുന്നുണ്ട്. യൂസർനെയിം ഉപയോഗിച്ച് ആദ്യമായി ബന്ധപ്പെടുന്ന വ്യക്തിക്ക് ഈ കീ ആവശ്യമായി വരും. ഉപയോക്താക്കൾക്ക് ഈ കീ പിന്നീട് എപ്പോൾ വേണമെങ്കിലും മാറ്റാനോ പുതുക്കാനോ സാധിക്കുന്നതാണ്.
ക്രിയേറ്റർമാർക്കും ചെറുകിട സ്ഥാപനങ്ങൾക്കും സംഘടനകൾക്കും ഇൻസ്റ്റഗ്രാം, ഫേസ്ബുക്ക് എന്നിവയിൽ ഉപയോഗിക്കുന്ന അതേ യൂസർനെയിം സ്വന്തമാക്കി എല്ലാ മെറ്റാ പ്ലാറ്റ്ഫോമുകളിലും ഏകീകൃത തിരിച്ചറിയൽ നിലനിർത്താനും ഈ സംവിധാനത്തിലൂടെ സാധിക്കും. ഫീച്ചർ ലഭ്യമായ ഉപയോക്താക്കൾ വാട്സ്ആപ്പിന്റെ ഏറ്റവും പുതിയ പതിപ്പ് ഇൻസ്റ്റാൾ ചെയ്ത ശേഷം സെറ്റിംഗ്സ് > അക്കൗണ്ട് > യൂസർനെയിം (Settings > Account > Username) എന്ന ക്രമത്തിൽ പ്രവേശിച്ച് ഇഷ്ടമുള്ള യൂസർനെയിം റിസർവ് ചെയ്യാം. വരും മാസങ്ങളിൽ ഘട്ടംഘട്ടമായാണ് ഈ സംവിധാനം കൂടുതൽ രാജ്യങ്ങളിലേക്ക് വ്യാപിപ്പിക്കുക.
