ബെംഗളൂരു: കാവേരി നദി ജല തർക്കത്തിൽ കന്നഡ അനുകൂല പ്രവർത്തകൻ വാട്ടാൽ നാഗരാജിന്റെ നേതൃത്വത്തിൽ ഇന്ന് ആഹ്വാനം ചെയ്ത കർണാടക ബന്ദ് പ്രധാനമായും പ്രതിഷേധ പ്രകടനങ്ങളിൽ മാത്രമായി ഒതുങ്ങുന്നു. കന്നഡ സംഗടനഗല കൂട്ട, കന്നഡ സേന, കന്നഡ ജാഗ്രതി വേദികെ തുടങ്ങി ഏതാനും ചെറിയ സംഘടനകൾ മാത്രമാണ് ബന്ദിന് പിന്തുണ പ്രഖ്യാപിച്ചിട്ടുള്ളത്. അതിനാൽ സംസ്ഥാനത്തുടനീളം മിക്ക സേവനങ്ങളും തടസ്സമില്ലാതെ പതിവുപോലെ തുടരുന്നുണ്ട്.
ബെംഗളൂരുവിലെ മഡിവാല, ശാന്തിനഗർ ഉൾപ്പെടെയുള്ള വിവിധ കേന്ദ്രങ്ങളിൽ നിന്ന് രാവിലെ മുതൽ തന്നെ ബി.എം.ടി.സി, സ്വകാര്യ ബസ് സർവീസുകൾ സാധാരണ നിലയിൽ പ്രവർത്തനം ആരംഭിച്ചു.
ശക്തമായ പോലീസ് സുരക്ഷ, നിയന്ത്രണങ്ങൾ
ബന്ദിന്റെ പശ്ചാത്തലത്തിൽ ബെംഗളൂരു നഗരത്തിലുടനീളം ശക്തമായ പോലീസ് സുരക്ഷ ഏർപ്പെടുത്തിയിട്ടുണ്ട്. നഗരത്തിലെ സെൻട്രൽ, വെസ്റ്റേൺ, നോർത്ത് വെസ്റ്റ് ഡിവിഷനുകളിലും ഇലക്ട്രോണിക് സിറ്റിയിലും അതീവ ജാഗ്രത പുലർത്താൻ ബെംഗളൂരു പോലീസ് കമ്മീഷണർ സീമന്ത് കുമാർ നഗരത്തിലെ എല്ലാ ഡി.സി.പിമാർക്കും നിർദ്ദേശം നൽകി.
പൊതുജനങ്ങൾക്ക് യാതൊരുവിധ ബുദ്ധിമുട്ടുകളും ഉണ്ടാക്കരുതെന്ന് പോലീസ് കർശന മുന്നറിയിപ്പ് നൽകിയിട്ടുണ്ട്. തമിഴ് സംസാരിക്കുന്ന മേഖലകളിൽ സർക്കാർ ബസുകളുടെയും മറ്റ് വാഹനങ്ങളുടെയും ഗതാഗതം തടസ്സപ്പെടുത്താൻ അനുവദിക്കില്ല. കടകമ്പോളങ്ങൾ നിർബന്ധപൂർവ്വം അടപ്പിക്കാൻ ശ്രമിച്ചാൽ കർശന നിയമനടപടി സ്വീകരിക്കും.
പ്രതിഷേധ പരിപാടികൾ ഫ്രീഡം പാർക്കിൽ മാത്രം
സമരക്കാർക്ക് ഫ്രീഡം പാർക്കിൽ മാത്രമാണ് പ്രതിഷേധിക്കാൻ അനുമതിയുള്ളത്. അനുമതിയില്ലാതെ മറ്റ് സ്ഥലങ്ങളിൽ റാലികളോ കുത്തിയിരിപ്പ് സമരങ്ങളോ നടത്തിയാൽ ഉടനടി കസ്റ്റഡിയിലെടുക്കാൻ കമ്മീഷണർ നിർദ്ദേശം നൽകിയിട്ടുണ്ട്.
രാവിലെ 10 മണിയോടെ സമരനേതാവ് വാട്ടാൽ നാഗരാജ് മജസ്റ്റിക്കിൽ എത്തിച്ചേരും. കെ.എസ്.ആർ.ടി.സി, ബി.എം.ടി.സി ബസ് സ്റ്റാൻഡുകളിലെത്തുന്ന പ്രവർത്തകർ ജീവനക്കാരോട് ബന്ദിന് പിന്തുണ അഭ്യർത്ഥിക്കും. തുടർന്ന് തുറന്ന വാഹനത്തിൽ വാട്ടാൽ നാഗരാജിന്റെ നേതൃത്വത്തിൽ ടൗൺ ഹാളിൽ നിന്ന് ഹലസുരു ഗേറ്റ് പോലീസ് സ്റ്റേഷൻ, മൈസൂർ ബാങ്ക് സർക്കിൾ, ഓണി ആഞ്ജനേയ സ്വാമി ക്ഷേത്രം വഴി ഫ്രീഡം പാർക്കിലേക്ക് പ്രതിഷേധ റാലി നടക്കും. ഫ്രീഡം പാർക്കിൽ വച്ചായിരിക്കും പ്രധാന പ്രതിഷേധ പരിപാടികൾ നടക്കുക.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
