ഡൽഹി: സർക്കാർ ഓഫീസുകളിൽ കയറി ഉദ്യോഗസ്ഥരോട് തട്ടിക്കയറുന്നതും അതിക്രമം കാണിക്കുന്നതും ഇന്ന് പലർക്കും ഒരു ശീലമായി മാറിയിട്ടുണ്ട്. എന്നാൽ ഇത്തരം ‘കൈവിട്ട കളി’ ഇന്ത്യൻ റെയിൽവേയോട് വേണ്ടെന്നാണ് നിയമവിദഗ്ധർ നൽകുന്ന മുന്നറിയിപ്പ്.
റെയിൽവേ ഉദ്യോഗസ്ഥരെ ജോലി തടസ്സപ്പെടുത്തുന്നതും റെയിൽവേ സ്വത്തുക്കൾ നശിപ്പിക്കുന്നതും അതീവ ഗുരുതരമായ കുറ്റകൃത്യങ്ങളുടെ പരിധിയിലാണ് വരുന്നത്. ഭാരതീയ ന്യായ സംഹിത (BNS) പ്രകാരം കടുത്ത ശിക്ഷകളാണ് ഇത്തരം കുറ്റവാളികളെ കാത്തിരിക്കുന്നത്.
കുടുങ്ങാൻ പോകുന്ന വകുപ്പുകൾ ഇവയാണ്:
റെയിൽവേ പരിസരത്തോ ട്രെയിനിലോ വെച്ച് അക്രമം നടത്തിയാൽ പ്രധാനമായും താഴെ പറയുന്ന വകുപ്പുകൾ പ്രകാരം കേസെടുക്കാം:
ഔദ്യോഗിക കൃത്യനിർവ്വഹണം തടസ്സപ്പെടുത്തൽ: ഒരു സർക്കാർ ഉദ്യോഗസ്ഥനെ അദ്ദേഹത്തിന്റെ ജോലി ചെയ്യുന്നതിൽ നിന്ന് തടഞ്ഞാൽ BNS സെക്ഷൻ 221 പ്രകാരം നടപടി നേരിടേണ്ടി വരും.
ജോലിയിലുള്ള ഉദ്യോഗസ്ഥനെ മർദ്ദിക്കുകയോ പരിക്കേൽപ്പിക്കുകയോ ചെയ്താൽ BNS സെക്ഷൻ 121 പ്രകാരം മൂന്ന് വർഷം വരെ തടവോ പിഴയോ അല്ലെങ്കിൽ രണ്ടും കൂടിയോ ശിക്ഷ ലഭിക്കാം.
ആക്രമണത്തിൽ ഉദ്യോഗസ്ഥന് ഗുരുതരമായി പരിക്കേറ്റാൽ BNS സെക്ഷൻ 121(2) പ്രകാരം ശിക്ഷ 10 വർഷം വരെ തടവായി ഉയരാം.
റെയിൽവേ പരിസരത്ത് അതിക്രമിച്ചു കയറുന്നതിനും സമാധാന അന്തരീക്ഷം തകർക്കുന്നതിനും റെയിൽവേ ആക്ട് പ്രകാരം പ്രത്യേക കേസുകൾ ചാർജ് ചെയ്യും. കൂടാതെ മദ്യപിച്ച് ബഹളമുണ്ടാക്കിയാൽ കേരള പോലീസ് ആക്ട് പ്രകാരമുള്ള നടപടികളും ഉണ്ടാകും.
പണികിട്ടുന്നത് ‘യാത്രയുടെ’ രൂപത്തിൽ!
ശിക്ഷാ കാലാവധിയേക്കാൾ കുറ്റക്കാരെ വലയ്ക്കുന്നത് റെയിൽവേയുടെ നടപടിക്രമങ്ങളാണ്. റെയിൽവേയുമായി ബന്ധപ്പെട്ട കേസുകൾ പലപ്പോഴും രാജ്യത്തിന്റെ വിവിധ ഭാഗങ്ങളിലെ കോടതികളിലാകും നടക്കുക. സ്വന്തം സംസ്ഥാനത്ത് ഇരുന്ന് കേസ് നടത്താമെന്ന് ആരും കരുതേണ്ടതില്ല.
ഓരോ തവണയും കോടതിയിൽ ഹാജരാകാൻ സംസ്ഥാനങ്ങൾ കടന്നുള്ള യാത്രകൾ വേണ്ടിവരും. ഇതിനെ പരിഹാസരൂപേണ ‘ഓൾ ഇന്ത്യ ട്രിപ്പ്’ എന്നാണ് പലരും വിശേഷിപ്പിക്കാറുള്ളത്.
ചുരുക്കത്തിൽ, നിമിഷനേരത്തെ ദേഷ്യത്തിന് വഴങ്ങി റെയിൽവേ ഉദ്യോഗസ്ഥരോട് മോശമായി പെരുമാറിയാൽ ജീവിതകാലം മുഴുവൻ കോടതിയും പോലീസ് സ്റ്റേഷനും കയറി ഇറങ്ങേണ്ടി വരുമെന്ന് ഉറപ്പാണ്.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
