തിരുവനന്തപുരം : എ ടി എം മെഷീനില് പ്രത്യേക ഉപകരണം സ്ഥാപിച്ച് പണം തട്ടിയെടുത്ത സംഭവത്തിന് പിന്നില്മൂന്ന് വിദേശികളാണെന്ന് നിഗമനം. അന്വേഷണം ആരംഭിച്ച് മണിക്കൂറുകള്ക്കകമാണ് പൊലീസിന്റെ നിര്ണായക കണ്ടെത്തല്. ഇവര് എടിഎം കൌണ്ടറില് കടന്ന് മെഷിനില് ഉപകരണവും ക്യാമറകളും സ്ഥാപിക്കുന്നതിന്റെ സിസിടിവി ദൃശ്യങ്ങള് പൊലീസിന് ലഭിച്ചു. ഇതിനെത്തുടര്ന്ന് അന്വേഷണസംഘം മുംബൈയിലേക്ക് തിരിച്ചു. ഐജി മനോജ് എബ്രഹാമിന്റെ നേതൃത്വത്തിലാണ് അന്വേഷണം നടക്കുന്നത്.
എ ടിഎമ്മില് ഇലക്ട്രോണിക് ഉപകരണം ഘടിപ്പിച്ച രഹസ്യ പിന് നമ്പര് ചോര്ത്തിയാണു പണം തട്ടിയത്. കഴിഞ്ഞ ദിവസം ഉച്ചയ്ക്ക് ഒന്നോടെയാണ് അക്കൌണ്ടുകളില്നിന്നു പണം പോയത്. പതിനായിരവും അതിനു മുകളിലേക്കുമുള്ള തുകകള് നിരവധി പേരുടെ അക്കൌണ്ടുകളില്നിന്നു പിന്വലിച്ചതായി പലര്ക്കും സന്ദേശം ലഭിച്ചു.
എടിഎം ഉപയോഗത്തിനുള്ള രഹസ്യ പിന് നമ്പറും എടിഎം കാര്ഡ് വിവരങ്ങളും തട്ടിയെടുത്താണു കവര്ച്ച നടത്തിയിരിക്കുന്നത്. മുംബൈയില്നിന്നു പണം പിന്വലിക്കപ്പെട്ടതായാണു പലര്ക്കും ലഭിച്ചിരിക്കുന്ന മെസെജില് പറയുന്നത്. നഗരത്തില് ആല്ത്തറ ജംഗ്ഷന്, കവടിയാര്, വട്ടിയൂര്ക്കാവ് എന്നിവിടങ്ങളിലെ എസ്ബിഐ, എസ്ബിടി എടിമ്മുകളില്നിന്നാണു പണം പോയത്. ഈ എടിഎമ്മുകളെല്ലാം ബാങ്ക് ശാഖയോടു ചേര്ന്നുള്ളതാണ്.
50 ഓളം പേര് ഇതിനോടകം പൊലീസ് സ്റ്റേഷനില് പരാതി നല്കിയിട്ടുണ്ട്. മ്യൂസിയം, വട്ടിയൂര്ക്കാവ്, പേരൂര്ക്കട സ്റ്റേഷന് പരിധിയിലാണു പരാതിക്കാര് ഏറെയും.
എടിഎമ്മിലെ സ്മോക് അലാമിനുള്ളിലാണ് രഹസ്യമായി ഇലക്ട്രോണിക് ഉപകരണം ഘടിപ്പിച്ചിരുന്നത്. അലാമിനുള്ളില് ക്യാമറയും റെക്കോഡിങ് ഡിവൈസും മെമ്മറി കാര്ഡും കണ്ടെത്തി. ക്യാമറ ഉപയോഗിച്ച് രഹസ്യ പിന് നമ്പര് ചോര്ത്തുകയായിരുന്നു.
