ബെംഗളൂരു: സംസ്ഥാനത്തെ ബൈക്ക് ടാക്സി ഡ്രൈവർമാരെയും അഗ്രഗേറ്റർമാരെയും ആശങ്കയിലാഴ്ത്തി കർണാടക സർക്കാരിന്റെ നിർണ്ണായക നീക്കം. ബൈക്ക് ടാക്സികൾക്ക് ലൈസൻസ് നൽകണമെന്ന ഹൈക്കോടതി ഡിവിഷൻ ബെഞ്ചിന്റെ ഉത്തരവിനെതിരെ സുപ്രീം കോടതിയിൽ അപ്പീൽ നൽകാൻ സംസ്ഥാന ഗതാഗത വകുപ്പ് തീരുമാനിച്ചു. മുഖ്യമന്ത്രി സിദ്ധരാമയ്യയും ഗതാഗത മന്ത്രി രാമലിംഗ റെഡ്ഡിയും നിയമപോരാട്ടത്തിന് പച്ചക്കൊടി കാട്ടിയതായാണ് വിവരം.
സംസ്ഥാനത്ത് ബൈക്ക് ടാക്സികൾക്ക് അനുമതി നൽകാനോ നിയന്ത്രണങ്ങൾ രൂപീകരിക്കാനോ നിലവിൽ ഉദ്ദേശിക്കുന്നില്ലെന്ന ഉറച്ച നിലപാടിലാണ് സർക്കാർ. ബൈക്ക് ടാക്സികൾക്ക് ലൈസൻസ് നൽകുന്നത് നിരസിക്കാൻ സർക്കാരിന് അധികാരമില്ലെന്നായിരുന്നു ജനുവരി 23-ലെ ഹൈക്കോടതി രണ്ടംഗ ബെഞ്ചിന്റെ നിരീക്ഷണം. കേന്ദ്ര സർക്കാർ മാർഗ്ഗനിർദ്ദേശങ്ങൾ പ്രകാരം മഞ്ഞ ബോർഡ് ബൈക്ക് ടാക്സികൾക്ക് അനുമതി നൽകണമെന്നും കോടതി നിർദ്ദേശിച്ചിരുന്നു. എന്നാൽ ഈ വിധി സർക്കാരിന്റെ നയപരമായ നിലപാടുകൾക്ക് വിരുദ്ധമാണെന്ന് ചൂണ്ടിക്കാട്ടിയാണ് അപ്പീൽ നൽകുന്നത്.
നിയമവിദഗ്ധരുമായി ഗതാഗത വകുപ്പ് ചർച്ചകൾ പൂർത്തിയാക്കി കഴിഞ്ഞു. ഏപ്രിൽ 23-നകം സുപ്രീം കോടതിയിൽ അപ്പീൽ ഫയൽ ചെയ്യാനാണ് നീക്കം. സർക്കാരിന്റെ ഈ തീരുമാനത്തെ സ്വകാര്യ ഗതാഗത സംഘടനകൾ സ്വാഗതം ചെയ്തിട്ടുണ്ട്. വിഷയത്തിൽ നിയമപരമായ വ്യക്തത ആവശ്യമാണെന്നും സർക്കാരിന്റെ നിലപാട് ശരിയാണെന്നും ഫെഡറേഷൻ ഓഫ് സ്റ്റേറ്റ് പ്രൈവറ്റ് ട്രാൻസ്പോർട്ട് ഓർഗനൈസേഷൻസ് പ്രസിഡന്റ് നടരാജ് ശർമ്മ പ്രതികരിച്ചു. സർക്കാരിന്റെ പുതിയ നീക്കം ബെംഗളൂരു നഗരത്തിലെ ആയിരക്കണക്കിന് ബൈക്ക് ടാക്സി ഡ്രൈവർമാരുടെ തൊഴിലിനെ ബാധിക്കുമെന്ന ആശങ്കയും ഉയരുന്നുണ്ട്.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
