ബെംഗളൂരു: കർണാടക മുഖ്യമന്ത്രിയുടെ ഔദ്യോഗിക ഹോം ഓഫിസ് ഇനി മുതൽ കുമാരകൃപ ഗസ്റ്റ് ഹൗസിലേക്ക് മാറും. ഇതിന്റെ ഭാഗമായി ഓഫിസിന്റെ പ്രധാന പ്രവേശന കവാടത്തിലും കാര്യമായ മാറ്റങ്ങൾ വരുത്തിയിട്ടുണ്ട്. നിലവിൽ കിഴക്ക് വശത്തായിരുന്നു ഹോം ഓഫിസിന്റെ പ്രധാന കവാടം ഉണ്ടായിരുന്നത്.
പൊതുജനങ്ങളും ഉദ്യോഗസ്ഥരും ഉൾപ്പെടെ എല്ലാവരും ഈ കവാടത്തിലൂടെയായിരുന്നു ഓഫിസിലേക്ക് പ്രവേശിച്ചിരുന്നത്. എന്നാൽ പുതിയ പരിഷ്കരണ പ്രകാരം കിഴക്ക് വശത്തെ കവാടം മാറ്റി, വടക്ക് വശത്തുള്ള വാതിലിലൂടെയാണ് മുഖ്യമന്ത്രി ഡി.കെ. ശിവകുമാർ ഇപ്പോൾ ഹോം ഓഫിസിലേക്ക് പ്രവേശിക്കുന്നത്.
ഇനി മുതൽ ഓഫിസ് പ്രവർത്തനങ്ങൾ പൂർണ്ണമായും വടക്കേ കവാടം കേന്ദ്രീകരിച്ച് മുന്നോട്ട് കൊണ്ടുപോകാനാണ് ഭരണകൂടത്തിന്റെ തീരുമാനം. പുതിയ ഹോം ഓഫിസിലേക്കുള്ള മാറ്റത്തിന്റെ ഭാഗമായി കുമാരകൃപ ഗസ്റ്റ് ഹൗസിലെ നവീകരണ പ്രവർത്തനങ്ങൾ നിലവിൽ ദ്രുതഗതിയിൽ പുരോഗമിക്കുകയാണ്.
അത്യാധുനിക എയർ കണ്ടീഷണറുകൾ, പുതിയ വലിയ ടെലിവിഷൻ സ്ക്രീനുകൾ എന്നിവ ഉൾപ്പെടെയുള്ള ആധുനിക സജ്ജീകരണങ്ങളും പുതിയ ഫർണിച്ചറുകളും ഓഫിസിൽ സ്ഥാപിച്ചുവരികയാണ്. നവീകരണ പ്രവൃത്തികൾ പൂർത്തിയാകുന്നതോടെ ഹോം ഓഫിസ് പൂർണ്ണതോതിൽ ഇവിടെ സജീവമാകുമെന്ന് ഔദ്യോഗിക വൃത്തങ്ങൾ അറിയിച്ചു.
