ബെംഗളൂരു വഴിയുള്ള തീവണ്ടി സർവീസുകളിൽ മാറ്റം; ദീപാവലി പ്രമാണിച്ച് കേരളത്തിലേക്ക് പ്രത്യേക ട്രെയിൻ

ബെംഗളൂരു: പാത നവീകരണ പ്രവർത്തനങ്ങളെ തുടർന്ന് ബെംഗളൂരു മേഖലയിലെ ചില തീവണ്ടി സർവീസുകളിൽ മാറ്റം വരുത്തിയതായി റെയിൽവേ അറിയിച്ചു. കൂടാതെ വരാനിരിക്കുന്ന ദീപാവലി തിരക്ക് പരിഗണിച്ച് ബെംഗളൂരുവിനും കേരളത്തിനുമിടയിൽ പ്രത്യേക ട്രെയിൻ സർവീസ് നടത്താനും തീരുമാനിച്ചിട്ടുണ്ട്.

ട്രെയിനുകൾ ഭാഗികമായി റദ്ദാക്കി

പെനുക്കൊണ്ടയ്ക്കും രംഗേപല്ലിക്കും ഇടയിൽ നടക്കുന്ന ട്രാക്ക് നവീകരണ പ്രവർത്തനങ്ങൾ കാരണമാണ് ചില ട്രെയിൻ സർവീസുകൾ ഭാഗികമായി റദ്ദാക്കിയത്. ചൊവ്വാഴ്ച സർവീസ് നടത്തേണ്ട ട്രെയിൻ നമ്പർ 66559 കെ.എസ്.ആർ ബെംഗളൂരു – അനന്തപൂർ മെമു (MEMU) ഹിന്ദുപ്പൂരിനും അനന്തപൂരിനും ഇടയിൽ സർവീസ് നടത്തില്ല. ഇതേ തുടർന്ന് മടക്ക സർവീസായ ട്രെയിൻ നമ്പർ 66560 അനന്തപൂർ – കെ.എസ്.ആർ ബെംഗളൂരു മെമു അനന്തപൂരിനും ഹിന്ദുപ്പൂരിനും ഇടയിൽ റദ്ദാക്കിയിട്ടുണ്ട്. ഇതിനുപുറമേ, അന്ന് സർവീസ് നടത്തേണ്ടിയിരുന്ന ട്രെയിൻ നമ്പർ 12864 എസ്.എം.വി.ടി ബെംഗളൂരു – ഹൗറ സൂപ്പർഫാസ്റ്റ് എക്സ്പ്രസ് പൂർണമായി റദ്ദാക്കിയതായും റെയിൽവേ അധികൃതർ വ്യക്തമാക്കി.

ദീപാവലി പ്രമാണിച്ച് കേരളത്തിലേക്ക് സ്പെഷ്യൽ സർവീസ്

ദീപാവലി തിരക്ക് മുന്നിൽക്കണ്ട് ബെംഗളൂരു കന്റോൺമെന്റിനും തിരുവനന്തപുരം നോർത്തിനും (കൊച്ചുവേളി) ഇടയിലാണ് റെയിൽവേ പ്രത്യേക ട്രെയിൻ അനുവദിച്ചിരിക്കുന്നത്. ട്രെയിൻ നമ്പർ 06575 ബെംഗളൂരു കന്റോൺമെന്റ് – തിരുവനന്തപുരം നോർത്ത് സ്പെഷ്യൽ വെള്ളിയാഴ്ച വൈകുന്നേരം 4.40-ന് ബെംഗളൂരുവിൽ നിന്ന് പുറപ്പെട്ട് തൊട്ടടുത്ത ദിവസം രാവിലെ 10.30-ഓടെ തിരുവനന്തപുരം നോർത്തിൽ എത്തിച്ചേരും.

മടക്ക സർവീസായ ട്രെയിൻ നമ്പർ 06576 തിരുവനന്തപുരം നോർത്ത് – ബെംഗളൂരു കന്റോൺമെന്റ് സ്പെഷ്യൽ ശനിയാഴ്ച ഉച്ചയ്ക്ക് 12.40-ന് തിരുവനന്തപുരത്ത് നിന്ന് പുറപ്പെട്ട് ഞായറാഴ്ച രാവിലെ 6.00 മണിക്ക് ബെംഗളൂരു കന്റോൺമെന്റിൽ എത്തിച്ചേരുന്ന രീതിയിലാണ് സർവീസ് ക്രമീകരിച്ചിരിക്കുന്നത്.

ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]

Related posts