ബെംഗളൂരു ∙ 3427 കോടി രൂപയുടെ വികസന പദ്ധതികൾക്കു മുഖ്യമന്ത്രി സിദ്ധരാമയ്യ അധ്യക്ഷനായ സംസ്ഥാന ഉന്നതതല സമിതി അനുമതി നൽകി. നാലു പദ്ധതികളിലായി 2595 തൊഴിലവസരങ്ങൾ സൃഷ്ടിക്കാനാകും. ബെംഗളൂരു എയറോസ്പേസ് പാർക്കിലെ 36 ഏക്കറിൽ ഇലക്ട്രോണിക്സ്, ഏവിയോണിക്സ് നിർമാണത്തിനുള്ള ബോയിങ് ഇന്ത്യ പ്രൈവറ്റ് ലിമിറ്റഡിന്റെ പദ്ധതിയാണ് ഇവയിലൊന്ന്. 1152 കോടിയുടെ പദ്ധതിയിലൂടെ 2300 പേർക്കു തൊഴിൽ നൽകാനാകും.
സിഡിസി ഡവലപ്മെന്റ് ഇന്ത്യയുടെ നേതൃത്വത്തിൽ ഹൈടെക് ഡിഫൻസ്, എയറോസ്പേസ് പാർക്ക് എന്നിവിടങ്ങളിലെ 100 ഏക്കറിൽ ടെക്നോളജി ഇന്നവേഷൻ ഇന്റർനാഷനൽ പാർക്ക്(740 കോടി രൂപ), ദക്ഷിണ കന്നഡയിലെ ബൈക്കംപാടിയിൽ 160 ഏക്കറിൽ ഇന്ത്യൻ കോസ്റ്റ് ഗാർഡ് ട്രെയിനിങ് സെന്റർ(1010 കോടി രൂപ), യൂണിവേഴ്സൽ ബിൽഡേഴ്സിന്റെ നേതൃത്വത്തിൽ ചെലവു കുറഞ്ഞ വീടുകൾ നിർമിക്കൽ(525 കോടി രൂപ) എന്നിവയാണ് അനുമതി ലഭിച്ച മറ്റുപദ്ധതികൾ.
