ന്യൂഡൽഹി: പ്രമുഖ എഡ്ടെക് സ്ഥാപനമായ ബൈജൂസും അതിന്റെ അന്താരാഷ്ട്ര വായ്പാദാതാക്കളും തമ്മിൽ ദീർഘകാലമായി നിലനിൽക്കുന്ന സങ്കീർണ്ണമായ നിയമയുദ്ധം ഒത്തുതീർപ്പിലേക്ക് നീങ്ങുന്നു. അമേരിക്ക ആസ്ഥാനമായുള്ള വായ്പാദാതാക്കളുടെ കൂട്ടായ്മയായ ഗ്ലാസ് ട്രസ്റ്റ് (Glas Trust), ബൈജൂസിന്റെ സ്ഥാപകൻ ബൈജു രവീന്ദ്രനെതിരെയുള്ള എല്ലാ നിയമനടപടികളും പിൻവലിക്കാൻ പുതിയൊരു ഒത്തുതീർപ്പ് വ്യവസ്ഥ മുന്നോട്ടുവെച്ചതായി രാജ്യാന്തര വാർത്താ ഏജൻസിയായ റോയിട്ടേഴ്സ് റിപ്പോര്ട്ട് ചെയ്തു. ബൈജൂസിന്റെ ഭാഗിക ഉടമസ്ഥതയിലുള്ള പ്രമുഖ കോച്ചിങ് സ്ഥാപനമായ ആകാശ് എഡ്യൂക്കേഷണൽ സർവീസസിൽ (Aakash Educational Services) ഏകദേശം 30 ശതമാനം ഓഹരി തങ്ങൾക്ക് നൽകണമെന്നാണ് വായ്പാദാതാക്കളുടെ പ്രധാന ആവശ്യം.
ഇന്ത്യ, സിംഗപ്പൂർ, അമേരിക്ക എന്നീ രാജ്യങ്ങളിലെ വിവിധ കോടതികളിൽ നിലനിൽക്കുന്ന സങ്കീർണമായ നിയമപോരാട്ടങ്ങൾ ഒരേസമയം അവസാനിപ്പിക്കാനാണ് ഈ പുതിയ നിർദ്ദേശത്തിലൂടെ ലക്ഷ്യമിടുന്നത്. നിലവിലെ ഒത്തുതീർപ്പ് ചർച്ചകളിൽ ആകാശ് എഡ്യൂക്കേഷണൽ സർവീസസിന്റെ വിപണി മൂല്യം ഏകദേശം 2 ബില്യൺ ഡോളറായാണ് കണക്കാക്കുന്നത്. 2021-ൽ ഏകദേശം ഒരു ബില്യൺ ഡോളർ ചെലവാക്കിയാണ് ബൈജൂസ് ആകാശിനെ ഏറ്റെടുത്തിരുന്നത്. എന്നാൽ പിൽക്കാലത്ത് പ്രതിസന്ധികൾ രൂക്ഷമായതോടെ ബൈജൂസിന്റെ ഓഹരി പങ്കാളിത്തം കുറയുകയും നിലവിൽ മണിപ്പാൽ ഹെൽത്ത് ആകാശിന്റെ ഏറ്റവും വലിയ ഓഹരി ഉടമയായി മാറുകയും ചെയ്തിരുന്നു.
കോവിഡ് കാലത്ത് ലോകമെമ്പാടും വലിയ വളർച്ച കൈവരിക്കുകയും ഇരുപത്തിയൊന്നോളം രാജ്യങ്ങളിൽ സാന്നിധ്യമറിയിക്കുകയും ചെയ്ത സ്ഥാപനമാണ് ബൈജൂസ്. എന്നാൽ 2023-ന്റെ തുടക്കത്തിൽ അമേരിക്കൻ വായ്പാദാതാക്കളുമായി ആരംഭിച്ച സാമ്പത്തിക തർക്കങ്ങളാണ് കമ്പനിയെ പെട്ടെന്നുള്ള തകർച്ചയിലേക്ക് നയിച്ചത്. വായ്പയെടുത്ത തുകയിൽ 100 കോടി ഡോളറിന്റെ തിരിച്ചടവ് മുടങ്ങിയതിനെത്തുടർന്നാണ് ഗ്ലാസ് ട്രസ്റ്റ് ബൈജു രവീന്ദ്രനെതിരെ കടുത്ത മാനേജ്മെന്റ് വീഴ്ചകൾ ആരോപിച്ച് നിയമനടപടികളുമായി രംഗത്തെത്തിയത്. ഇതേത്തുടർന്ന് കടുത്ത സാമ്പത്തിക പ്രതിസന്ധിയിലായ ബൈജൂസ് 2024-ൽ ഇന്ത്യയിൽ പാപ്പരത്ത നടപടികളിലേക്ക് നീങ്ങുകയും കമ്പനിയുടെ മൂല്യം പൂജ്യമായി ഇടിഞ്ഞതായി ബൈജു രവീന്ദ്രൻ തന്നെ പരസ്യമായി വ്യക്തമാക്കുകയും ചെയ്തിരുന്നു.
ബൈജൂസ് ഗ്രൂപ്പ് വലിയ പ്രതിസന്ധി നേരിടുമ്പോഴും അവരുടെ കീഴിലുള്ള ആകാശ് ഇൻസ്റ്റിറ്റ്യൂട്ട് ഇപ്പോഴും ലാഭത്തിലാണ് പ്രവർത്തിക്കുന്നത്. നിലവിൽ രാജ്യത്തുടനീളം 300-ലധികം പഠന കേന്ദ്രങ്ങളും അയ്യായിരത്തോളം അധ്യാപകരുമുള്ള ആകാശ്, 254 മില്യൺ ഡോളർ വാർഷിക വരുമാനമാണ് രേഖപ്പെടുത്തുന്നത്. അതുകൊണ്ടുതന്നെ, നിലവിലുള്ള ഒത്തുതീർപ്പ് ചർച്ചകൾ വിജയിക്കുകയും ഓഹരി കൈമാറ്റത്തിലൂടെ നിയമതടസങ്ങൾ നീങ്ങുകയും ചെയ്താൽ, അത് വർഷങ്ങളായി കനത്ത പ്രതിസന്ധി നേരിടുന്ന ബൈജൂസ് ഗ്രൂപ്പിന് വലിയൊരു ആശ്വാസമായി മാറും.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
