ചെന്നൈ: തമിഴ്നാട് മുഖ്യമന്ത്രിയായി നടൻ വിജയ് സത്യപ്രതിജ്ഞ ചെയ്യുന്നത് നേരിട്ട് കാണാൻ ആവേശത്തോടെയെത്തിയ ആയിരക്കണക്കിന് ആരാധകർ നിരാശരായി മടങ്ങി. ചെന്നൈ നെഹ്റു ഇൻഡോർ സ്റ്റേഡിയത്തിൽ ചടങ്ങുകൾ നടക്കുമെന്ന പ്രതീക്ഷയിലെത്തിയ ടി.വി.കെ പ്രവർത്തകർ, സ്റ്റേഡിയം ഗേറ്റുകൾ പൂട്ടിയിട്ടിരിക്കുന്നത് കണ്ട് പൊട്ടിക്കരയുന്ന കാഴ്ചയാണ് കാണാനായത്.
ഭൂരിപക്ഷം തെളിയിക്കുന്ന രേഖകൾ ഹാജരാക്കിയ ശേഷം മാത്രം സത്യപ്രതിജ്ഞ മതിയെന്ന ഗവർണറുടെ തീരുമാനത്തെത്തുടർന്ന് ചടങ്ങ് മാറ്റിവെച്ചിരുന്നു. എന്നാൽ കൃത്യമായ അറിയിപ്പ് ലഭിക്കാത്ത ദൂരദേശങ്ങളിൽ നിന്നുള്ള ആരാധകരാണ് വെളുപ്പിന് തന്നെ സ്റ്റേഡിയത്തിന് മുന്നിൽ തടിച്ചുകൂടിയത്. കോയമ്പത്തൂർ, അരുമ്പാക്കം തുടങ്ങിയ സ്ഥലങ്ങളിൽ നിന്നുപോലും നൂറുകണക്കിന് ആളുകൾ എത്തിയിരുന്നു.
“വിജയ് മുഖ്യമന്ത്രിയാകുന്നത് കാണാൻ വലിയ സന്തോഷത്തോടെയാണ് ഞങ്ങൾ വന്നത്. എന്നാൽ ഇവിടെ എത്തിയപ്പോൾ ഒന്നുമില്ല. ഗേറ്റുകൾ അടച്ചിരിക്കുന്നു, ഇത് വലിയ ഹൃദയവേദനയുണ്ടാക്കുന്നു,” ടി.വി.കെ പ്രവർത്തകയായ ചാരുലത മാധ്യമങ്ങളോട് പറഞ്ഞു. മകനോട് പോലും പറയാതെയാണ് താൻ വിജയിനെ കാണാൻ എത്തിയതെന്നും സ്റ്റേഡിയം വിജനമായി കിടക്കുന്നത് കണ്ട് ഞെട്ടിപ്പോയെന്നും കാഴ്ചപരിമിതിയുള്ള ഗുണസുന്ദരി എന്ന ആരാധകയും പ്രതികരിച്ചു.
ആരാധകരുടെ പ്രതിഷേധവും സങ്കടവും തുടരുന്നതിനിടെ, സർക്കാർ രൂപീകരണത്തിനുള്ള ചർച്ചകളുമായി വിജയ് മുന്നോട്ട് പോവുകയാണ്. ഗവർണർ രാജേന്ദ്ര ആർലേക്കറുമായി അദ്ദേഹം വീണ്ടും കൂടിക്കാഴ്ച നടത്തി. നിയമസഭയിൽ ഭൂരിപക്ഷം തെളിയിക്കുമെന്ന് ഉറപ്പുനൽകിയ വിജയ്, തിരഞ്ഞെടുക്കപ്പെട്ട എം.എൽ.എമാരുടെ അടിയന്തര യോഗവും വിളിച്ചുചേർത്തിട്ടുണ്ട്. വരും ദിവസങ്ങളിൽ ഭൂരിപക്ഷം ഉറപ്പാക്കി ഔദ്യോഗിക സത്യപ്രതിജ്ഞാ തീയതി പ്രഖ്യാപിക്കുമെന്നാണ് പാർട്ടി വൃത്തങ്ങൾ നൽകുന്ന സൂചന.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
