ഭാര്യമാർക്ക് ലഹരി നൽകി കൂട്ടബലാത്സംഗം; നഗ്ന ദൃശ്യങ്ങൾ കണ്ട് അവർ ഞെട്ടി! ഇരുണ്ട ലോകത്തെ നടുക്കി ‘ഓപ്പറേഷൻ മെഡൂസ’!

ലണ്ടൻ: ആഗോള മനസ്സാക്ഷിയെ ഞെട്ടിച്ചുകൊണ്ട്, ഇന്റർനെറ്റിന്റെ ഇരുണ്ട കോണുകളിൽ ഒളിച്ചിരുന്ന് പ്രവർത്തിച്ചിരുന്ന വൻകിട അന്താരാഷ്ട്ര ലഹരി-ലൈംഗികാതിക്രമ ശൃംഖലയെ അന്താരാഷ്ട്ര പൊലീസ് സഖ്യം പുറത്തുകൊണ്ടുവന്നു. ബ്രിട്ടന്റെ നാഷനൽ ക്രൈം ഏജൻസി (എൻസിഎ), യൂറോപോൾ എന്നിവയുടെ നേതൃത്വത്തിൽ ഒൻപതോളം രാജ്യങ്ങളിലെ സുരക്ഷാ ഏജൻസികൾ സംയുക്തമായി നടത്തിയ ‘പ്രോജക്ട് മെഡൂസ’ (Project Medusa) എന്ന അതീവ രഹസ്യ ഓപ്പറേഷനിലൂടെയാണ് ഈ കറുത്ത ലോകത്തിന്റെ ചുരുളഴിഞ്ഞത്. ജർമനി, യുഎസ്, ബ്രസീൽ, കാനഡ, ഫ്രാൻസ്, ഹംഗറി, നെതർലാൻഡ്സ്, സ്പെയിൻ എന്നീ രാജ്യങ്ങളിലെ സുരക്ഷാ വിഭാഗങ്ങളാണ് ഈ സംയുക്ത നീക്കത്തിൽ പങ്കാളികളായത്.

ഏഴ് രാജ്യങ്ങളിലായി പടർന്നുപന്തലിച്ചു കിടക്കുന്ന, അതീവ ആസൂത്രിതമായി പ്രവർത്തിക്കുന്ന പുരുഷന്മാരുടെ ഓൺലൈൻ ചാറ്റ് ഗ്രൂപ്പുകളാണ് പൊലീസിന്റെ പിടിയിലായിരിക്കുന്നത്. സ്വന്തം പങ്കാളികളെപ്പോലും മയക്കുമരുന്ന് നൽകി അബോധാവസ്ഥയിലാക്കി പീഡിപ്പിക്കുകയും, അതിന്റെ ദൃശ്യങ്ങൾ ആഗോളതലത്തിൽ പങ്കുവയ്ക്കുകയും ചെയ്യുന്ന ക്രൂരമായ മാനസികാവസ്ഥയാണ് ഈ സംഘങ്ങൾക്കിടയിൽ നിലനിന്നിരുന്നത്. ഓപ്പറേഷന്റെ ഭാഗമായി വിവിധ രാജ്യങ്ങളിൽ നിന്നായി ഇതുവരെ 57 പേരെ അറസ്റ്റ് ചെയ്തിട്ടുണ്ട്. 150–ലധികം കുറ്റവാളികളെയും ഇരകളെയും തിരിച്ചറിഞ്ഞ പോലീസ്, 270-ലധികം പുതിയ അന്വേഷണ വഴികളും കണ്ടെത്തിയിട്ടുണ്ട്.

ഞെട്ടിക്കുന്ന പ്രവർത്തനരീതി

കേവലം ഒറ്റപ്പെട്ട കുറ്റകൃത്യങ്ങൾ എന്നതിനപ്പുറം, ഡിജിറ്റൽ പ്ലാറ്റ്‌ഫോമുകളുടെ സഹായത്തോടെ വളരെ ആസൂത്രിതമായാണ് ഈ ശൃംഖല പ്രവർത്തിച്ചിരുന്നത്. എലൈറ്റ് ക്ലാസ് റൂമുകൾ പോലെ പ്രവർത്തിക്കുന്ന എൻക്രിപ്റ്റഡ് മെസേജിങ് ആപ്പുകൾ, ഫോറങ്ങൾ, രഹസ്യ ചാറ്റ് ഗ്രൂപ്പുകൾ എന്നിവ വഴിയാണ് ഇവർ പരസ്പരം ബന്ധപ്പെട്ടിരുന്നത്.

ഇരകളെ പെട്ടെന്ന് ബോധംകെടുത്താൻ ഉപയോഗിക്കേണ്ട ലഹരിമരുന്നുകളെക്കുറിച്ചും കുറിപ്പടി ആവശ്യമുള്ള കനത്ത ഡോസുള്ള മരുന്നുകളെക്കുറിച്ചുമുള്ള വിവരങ്ങൾ പങ്കുവെക്കുക, മരുന്നുകൾ ഭക്ഷണത്തിലോ പാനീയങ്ങളിലോ മാരകമായ പാർശ്വഫലങ്ങൾ ഉണ്ടാകാതെ എങ്ങനെ ദീർഘനേരം അബോധാവസ്ഥയിൽ നിർത്താം എന്ന് മാർഗനിർദേശം നൽകുക, വൈദ്യപരിശോധനയിൽ മരുന്നിന്റെ സാന്നിധ്യം കണ്ടെത്താനാകാത്ത വിധം എത്ര സമയം കഴിഞ്ഞു പീഡിപ്പിക്കണം എന്നതിനെക്കുറിച്ചുള്ള ‘വിദഗ്ധോപദേശങ്ങൾ’ കൈമാറുക എന്നിവയായിരുന്നു ഈ ഗ്രൂപ്പുകളിലെ പ്രധാന ചർച്ചകൾ. കൂടാതെ, ക്രൂരമായി പീഡിപ്പിക്കുന്ന സ്വന്തം പങ്കാളികളുടെ ദൃശ്യങ്ങളും ചിത്രങ്ങളും ഗ്രൂപ്പിലെ മറ്റ് അംഗങ്ങൾക്ക് ലൈവായി എത്തിക്കുകയോ റെക്കോർഡ് ചെയ്ത് അയക്കുകയോ ചെയ്യലും ഇവരുടെ രീതിയായിരുന്നു. ഇരകളെ വെറും ‘ഉപഭോഗവസ്തുക്കൾ’ മാത്രമായി കാണുന്ന അതിക്രൂരമായ ഒരു മനോഭാവമാണ് ഈ ഗ്രൂപ്പുകളിലെ പുരുഷന്മാർ വച്ചുപുലർത്തിയിരുന്നതെന്ന് യൂറോപോൾ വിലയിരുത്തുന്നു.

തുമ്പായത് ‘ജിസെൽ പെലിക്കോട്ട്’ കേസും മാധ്യമ അന്വേഷണവും

ഫ്രാൻസിനെ മാത്രമല്ല, ലോക മനസ്സാക്ഷിയെത്തന്നെ പിടിച്ചുലച്ച ജിസെൽ പെലിക്കോട്ട് എന്ന വനിതയുടെ കേസാണ് ഇത്തരം അതിക്രമങ്ങളിലേക്ക് ലോകത്തിന്റെ ശ്രദ്ധ ആദ്യമായി ആകർഷിച്ചത്. ജിസെലിന്റെ ഭർത്താവായിരുന്ന ഡൊമിനിക് പെലിക്കോട്ട്, സ്വന്തം ഭാര്യയ്ക്ക് വർഷങ്ങളോളം ഭക്ഷണത്തിൽ മയക്കുമരുന്ന് കലർത്തി നൽകി അബോധാവസ്ഥയിലാക്കുകയും, തുടർന്ന് ഇന്റർനെറ്റ് വഴി അമ്പതോളം അപരിചിതരായ പുരുഷന്മാരെ വീട്ടിലേക്ക് ക്ഷണിച്ചുവരുത്തി അവരെക്കൊണ്ട് ഭാര്യയെ കൂട്ടബലാത്സംഗം ചെയ്യിക്കുകയും ചെയ്യുകയായിരുന്നു. 2024-ൽ ഈ കേസിൽ ഡൊമിനിക്കിന് 20 വർഷത്തെ തടവുശിക്ഷ ലഭിച്ചു.

ഇതിനുപിന്നാലെ പ്രമുഖ രാജ്യാന്തര വാർത്താ മാധ്യമമായ സിഎൻഎൻ (CNN) നടത്തിയ ഒരു രഹസ്യാന്വേഷണവും ഈ വിഷയത്തിന്റെ ഭീകരതയിലേക്ക് വിരൽചൂണ്ടി. സ്വന്തം പങ്കാളികളെ എങ്ങനെ മയക്കി പീഡിപ്പിക്കാമെന്ന് പുരുഷന്മാർ പരസ്പരം ‘ക്ലാസുകൾ’ എടുക്കുന്ന ഓൺലൈൻ ഗ്രൂപ്പുകളെക്കുറിച്ചുള്ള വിവരങ്ങളാണ് മാധ്യമപ്രവർത്തകർ പുറത്തുവിട്ടത്. ഇത്തരം വാർത്തകളും വെളിപ്പെടുത്തലുകളുമാണ് ഒടുവിൽ ‘പ്രോജക്ട് മെഡൂസ’ എന്ന വൻ പൊലീസ് ഓപ്പറേഷനിലേക്ക് നയിച്ചത്.

പിടിയിലായ പ്രമുഖർ

ഈ നെറ്റ്‌വർക്കുകളുടെ വ്യാപ്തി തെളിയിക്കുന്നതാണ് കഴിഞ്ഞ കുറച്ചുകാലങ്ങളായി യൂറോപ്പിൽ നടന്ന അറസ്റ്റുകളും ശിക്ഷാവിധികളും. സ്വന്തം ഭാര്യയെ വർഷങ്ങളോളം മയക്കുമരുന്ന് നൽകി പീഡിപ്പിക്കുകയും ഇതിന്റെ ദൃശ്യങ്ങൾ ഓൺലൈനിൽ പങ്കുവയ്ക്കുകയും ചെയ്ത കേസിൽ ജർമനിയിലെ പി. ഫെർണാണ്ടോയ്ക്ക് ജർമൻ കോടതി 8 വർഷവും 6 മാസവും തടവ് ശിക്ഷ വിധിച്ചു. ചൈനീസ് വംശജരായ വിദ്യാർഥിനികളെ ‘വീചാറ്റ്’, ഡേറ്റിങ് ആപ്പുകൾ എന്നിവ വഴി സൗഹൃദം സ്ഥാപിച്ച് സ്വന്തം ഫ്ലാറ്റിലേക്ക് വിളിച്ചുവരുത്തി, ലഹരി നൽകി പീഡിപ്പിച്ച കേസിൽ യുകെയിലെ ഷെൻഹാവോ സൂ എന്നയാൾക്ക് ജീവപര്യന്തം തടവുശിക്ഷ ലഭിച്ചു. കുറഞ്ഞത് 24 വർഷമെങ്കിലും ഇയാൾ ജയിലിൽ കിടക്കണം. കൂടാതെ, പങ്കാളികളെ പീഡിപ്പിക്കാൻ ടെലിഗ്രാം ഗ്രൂപ്പ് വഴി ഉപദേശം നൽകിയിരുന്ന പ്രധാന കണ്ണിയായ ‘പിയോറ്റർ’ എന്ന വ്യാജപ്പേരിലറിയപ്പെട്ടിരുന്ന വ്യക്തിയെ പോളിഷ് അധികൃതർ അറസ്റ്റ് ചെയ്തു. ആയിരത്തോളം പേരുള്ള ഒരു രഹസ്യ ഗ്രൂപ്പിന്റെ തലവനായിരുന്നു ഇയാൾ.

ഇരകൾ അറിയാത്ത അതിക്രമങ്ങൾ; വെല്ലുവിളിയായി സാങ്കേതികവിദ്യ

ഈ കുറ്റകൃത്യങ്ങളുടെ ഏറ്റവും ഭീകരമായ വശം എന്തെന്നാൽ, ഭൂരിഭാഗം കേസുകളിലും ഇരകളായ സ്ത്രീകൾ തങ്ങൾ ക്രൂരമായ ലൈംഗികാതിക്രമത്തിന് ഇരയായിട്ടുണ്ടെന്ന കാര്യം അറിയുന്നതേയില്ല എന്നതാണ്. പൊലീസ് വന്ന് ഇവരെ സമീപിച്ച് ദൃശ്യങ്ങൾ കാണിച്ചുകൊടുക്കുമ്പോൾ മാത്രമാണ് പലരും ഈ സത്യം തിരിച്ചറിയുന്നത്. തങ്ങൾ ഏറ്റവും കൂടുതൽ സ്നേഹിക്കുകയും വിശ്വസിക്കുകയും ചെയ്യുന്ന പങ്കാളികളോ ഭർത്താക്കന്മാരോ അടുത്ത സുഹൃത്തുക്കളോ ആണ് ഈ ക്രൂരതയ്ക്ക് പിന്നിൽ എന്നത് ഇരകളുടെ മാനസിക നിലയെ പൂർണമായും തകർക്കുന്നതാണ്.

ലഹരി മരുന്ന് നൽകിയുള്ള ലൈംഗികാതിക്രമങ്ങൾ ഇപ്പോൾ കേവലം ഒറ്റപ്പെട്ട സംഭവങ്ങളല്ലെന്നും ഡിജിറ്റൽ പ്ലാറ്റ്‌ഫോമുകളുടെ സഹായത്തോടെ അന്താരാഷ്ട്ര തലത്തിൽ പ്രവർത്തിക്കുന്ന കോർഡിനേറ്റഡ് ശൃംഖലകളായി ഇത് മാറിയിരിക്കുന്നുവെന്നും എൻസിഎ ഡെപ്യൂട്ടി ഡയറക്ടർ നൈജൽ ലിയറി പറഞ്ഞു.

എൻക്രിപ്റ്റ് ചെയ്ത ആശയവിനിമയ സംവിധാനങ്ങൾ ഉപയോഗിക്കുന്നതിനാൽ കുറ്റവാളികളെ കണ്ടെത്തുകയോ, കുറ്റം തെളിയിക്കാൻ ആവശ്യമായ ഡിജിറ്റൽ തെളിവുകൾ ശേഖരിക്കുകയോ എളുപ്പമല്ല എന്നത് നിയമപാലകർക്ക് വലിയ വെല്ലുവിളിയാണ് ഉയർത്തുന്നത്. ലഭ്യമായ ഡേറ്റകളുടെ കുറവ് കാരണം പലപ്പോഴും ഇത്തരം കേസുകൾ കോടതികളിൽ വിചാരണ ഘട്ടത്തിലേക്ക് എത്താറില്ല എന്നതാണ് വാസ്തവം. എൻസിഎയുടെ കണക്കുകൂട്ടൽ അനുസരിച്ച് ഇത് വൻ നെറ്റ്‌വർക്കിന്റെ ഒരറ്റം മാത്രമാണ്. യഥാർഥ കുറ്റകൃത്യങ്ങളുടെ തോതും ഇരകളുടെ എണ്ണവും ഇതിലും എത്രയോ മടങ്ങ് കൂടുതലായിരിക്കാം.

തങ്ങളുടെ കരിയറിൽ കണ്ടിട്ടുള്ളതിൽ വച്ച് ഏറ്റവും ഭയാനകമായ കുറ്റകൃത്യങ്ങളും ഏറ്റവും വലിയ വിശ്വാസവഞ്ചനയുമാണിതെന്ന് യുകെയിലെ ക്രൗൺ പ്രോസിക്യൂഷൻ സർവീസിലെ മുതിർന്ന ഉദ്യോഗസ്ഥയായ സിയോഭാൻ ബ്ലെയ്ക്ക് വ്യക്തമാക്കി. ഇത്തരം ചൂഷണങ്ങൾ അടങ്ങിയ ദൃശ്യങ്ങളും വിവരങ്ങളും കൈമാറുന്ന ഓൺലൈൻ പ്ലാറ്റ്‌ഫോമുകൾക്കും വെബ്‌സൈറ്റുകൾക്കുമെതിരെ ശക്തമായ നടപടികൾ സ്വീകരിക്കാൻ ആഗോള തലത്തിൽ റെഗുലേറ്ററി ബോഡികൾ തയാറാകണമെന്ന് അതിജീവിച്ചവർ ആവശ്യപ്പെടുന്നു. പ്രായ ഭേദമന്യേ ആർക്കും ഇത്തരം കെണികളിൽ വീഴാം എന്നതിനാൽ, പങ്കാളികളിൽ നിന്നോ സുഹൃത്തുക്കളിൽ നിന്നോ എന്തെങ്കിലും തരത്തിലുള്ള അസ്വാഭാവികതയോ സംശയമോ തോന്നിയാൽ മടിക്കാതെ പൊലീസിനെ സമീപിക്കാൻ സുരക്ഷാ ഏജൻസികൾ സ്ത്രീകളോട് ആഹ്വാനം ചെയ്തു.

ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]