തിരുവനന്തപുരം: ബെംഗളൂരു–എറണാകുളം റൂട്ടിൽ സർവീസ് നടത്തുന്ന വന്ദേഭാരത് എക്സ്പ്രസിന് 16 കോച്ചുകളുള്ള പുതിയ ട്രെയിൻ അനുവദിച്ച് റെയിൽവേ ബോർഡ് ഉത്തരവിറക്കി. അടുത്തയാഴ്ച മുതൽ പുതിയ ട്രെയിൻ സർവീസ് ആരംഭിക്കും. നിലവിൽ 8 കോച്ചുകളുമായി ഓടുന്ന ട്രെയിൻ പിൻവലിച്ചാണ് കൂടുതൽ കോച്ചുകളുള്ള പുതിയ റാക്ക് അനുവദിച്ചിരിക്കുന്നത്. ഓണാവധിക്ക് നാട്ടിലേക്കും തിരിച്ചു യാത്രാക്ലേശം അനുഭവിക്കുന്ന മലയാളി യാത്രക്കാർക്ക് റെയിൽവേയുടെ ഈ തീരുമാനം വലിയ ആശ്വാസമാകും.
കോച്ചുകളുടെ എണ്ണം വർധിക്കുന്നതോടെ ട്രെയിനിലെ ആകെ സീറ്റുകളുടെ എണ്ണം 530-ൽ നിന്നും 1128 ആയി ഉയരും. നിലവിൽ ഓഗസ്റ്റ് 21, 22 തീയതികളിൽ ബെംഗളൂരുവിൽ നിന്ന് എറണാകുളത്തേക്കുള്ള ചെയർകാർ വെയിറ്റ് ലിസ്റ്റ് നൂറിന് മുകളിലാണ്. കൂടാതെ ഓഗസ്റ്റ് 29 മുതൽ 31 വരെ ബെംഗളൂരുവിലേക്കുള്ള മടക്കയാത്രയ്ക്കും കൺഫേം ടിക്കറ്റുകൾ ലഭ്യമല്ല. പുതിയ കോച്ചുകൾ എത്തുന്നതോടെ വെയിറ്റ് ലിസ്റ്റിലുള്ള കൂടുതൽ പേർക്ക് യാത്ര ചെയ്യാൻ അവസരമൊരുങ്ങും.
എറണാകുളം–തിരുവനന്തപുരം സർവീസിന് റെയിൽവേയുടെ വിസമ്മതം
അതേസമയം, പുതിയ റേക്ക് എത്തുന്നതോടെ ലഭ്യമാകുന്ന എട്ട് കോച്ചുകൾ ഉപയോഗിച്ച് എറണാകുളം– തിരുവനന്തപുരം റൂട്ടിൽ പുതിയ വന്ദേഭാരത് സർവീസ് ആരംഭിക്കണമെന്ന് ബിജെപി സംസ്ഥാന നേതൃത്വം കത്തു മുഖേന ആവശ്യപ്പെട്ടിരുന്നുവെങ്കിലും റെയിൽവേ ഇതിന് അനുകൂല നിലപാടല്ല സ്വീകരിച്ചിരിക്കുന്നത്. കുറഞ്ഞ ദൂരമായതിനാലാണ് ഈ റൂട്ടിൽ സർവീസ് ഓടിക്കാൻ കഴിയില്ലെന്ന് റെയിൽവേ വ്യക്തമാക്കുന്നത്. എറണാകുളം– തിരുവനന്തപുരം സർവീസ് നടത്തിയാൽ ട്രെയിൻ മണിക്കൂറുകളോളം തിരുവനന്തപുരത്ത് വെറുതേ നിർത്തിയിടേണ്ടി വരുമെന്നാണ് റെയിൽവേ ചൂണ്ടിക്കാണിക്കുന്ന പ്രധാന തടസ്സം.
എന്നാൽ, റെയിൽവേയുടെ ഈ വാദത്തിനെതിരെ യാത്രക്കാരുടെ സംഘടനകൾ രംഗത്തെത്തിയിട്ടുണ്ട്. രാജ്യത്തെ മറ്റ് പല റെയിൽവേ സോണുകളിലും ദീർഘദൂര സർവീസുകളുമായി ബന്ധിപ്പിച്ച് ഹ്രസ്വദൂര വന്ദേഭാരത് സർവീസുകൾ വിജയകരമായി നടത്തുന്നുണ്ടെന്ന് സംഘടനകൾ ചൂണ്ടിക്കാണിക്കുന്നു. ഈ മാതൃക പിന്തുടർന്നാൽ എറണാകുളം–തിരുവനന്തപുരം, തിരുവനന്തപുരം–ചെന്നൈ സർവീസുകൾ എളുപ്പത്തിൽ പ്രാവർത്തികമാക്കാൻ കഴിയും. എന്നാൽ റെയിൽവേ ഈ സാധ്യതകൾ നിലവിൽ പരിഗണിക്കുന്നില്ലെന്നാണ് സൂചന.
യാത്രക്കാരുടെ സംഘടനകൾ മുന്നോട്ടുവെക്കുന്ന നിർദേശപ്രകാരം, രാവിലെ എറണാകുളത്ത് നിന്ന് പുറപ്പെട്ട് 10 മണിയോടെ തിരുവനന്തപുരത്ത് എത്തുന്ന ട്രെയിൻ, തുടർന്ന് 11 മണിക്ക് അവിടെനിന്ന് പുറപ്പെട്ട് നാഗർകോവിൽ, മധുര, തിരുച്ചിറപ്പള്ളി വഴി വൈകിട്ട് 7 മണിയോടെ ചെന്നൈയിൽ എത്തുന്ന രീതിയിൽ ക്രമീകരിക്കാം. ഇതിന് പകരമായി രണ്ടാമതൊരു റേക്ക് രാവിലെ 8 മണിക്ക് ചെന്നൈയിൽ നിന്ന് പുറപ്പെട്ട് വൈകിട്ട് 7 മണിക്ക് തിരുവനന്തപുരത്തും, രാത്രി 10 മണിയോടെ എറണാകുളത്തും എത്തുന്ന രീതിയിൽ സർവീസ് നടത്തിയാൽ സമയനഷ്ടം ഒഴിവാക്കാനും യാത്രക്കാർക്ക് കൂടുതൽ പ്രയോജനം ചെയ്യാനും സാധിക്കുമെന്നും ചൂണ്ടിക്കാണിക്കപ്പെടുന്നു.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
