ബെംഗളൂരു: സിലിക്കൺ സിറ്റിയുടെ പൊതുഗതാഗത സംവിധാനത്തിന്റെ ജീവനാഡിയായ ‘നമ്മ മെട്രോ’ സ്റ്റേഷനുകളിലെ ആത്മഹത്യാ പ്രവണത തടയുന്നതിനായി ബാംഗ്ലൂർ മെട്രോ റെയിൽ കോർപ്പറേഷൻ ലിമിറ്റഡ് (ബിഎംആർസിഎൽ) പുതിയ പ്രതിരോധ നടപടികളിലേക്ക് കടക്കുന്നു. മെട്രോ ട്രാക്കുകളിലേക്ക് ചാടിയുള്ള ആത്മഹത്യാ ശ്രമങ്ങൾ സമീപകാലത്ത് വർദ്ധിച്ചുവരുന്ന സാഹചര്യത്തിലാണ്, സ്റ്റേഷനുകൾ കൂടുതൽ സുരക്ഷിതമാക്കുന്നതിനും യാത്രാക്കാരുടെ മാനസികാവസ്ഥയിൽ പോസിറ്റീവായ മാറ്റങ്ങൾ കൊണ്ടുവരുന്നതിനുമായി ബിഎംആർസിഎൽ പ്രമുഖ മാനസികാരോഗ്യ കേന്ദ്രമായ നിംഹാൻസുമായി (NIMHANS) കൈകോർത്തിരിക്കുന്നത്.
കഴിഞ്ഞ രണ്ട് വർഷത്തിനിടെ നമ്മ മെട്രോ ട്രാക്കുകളിലേക്ക് ആളുകൾ ചാടിയ 11-ലധികം ആശങ്കാജനകമായ കേസുകളാണ് റിപ്പോർട്ട് ചെയ്യപ്പെട്ടിട്ടുള്ളത്. ഇത്തരം സംഭവങ്ങളിൽ കുറഞ്ഞത് 3 പേർക്ക് ജീവൻ നഷ്ടപ്പെടുകയും അഞ്ചിലധികം പേർ ആത്മഹത്യാ ശ്രമം നടത്തുകയും ചെയ്തിട്ടുണ്ട്. വിലപ്പെട്ട മനുഷ്യജീവനുകൾ പൊലിയുന്നതിന് പുറമെ, ഇത്തരം സംഭവങ്ങൾ മണിക്കൂറുകളോളം മെട്രോ സർവീസുകൾ തടസ്സപ്പെടുന്നതിനും ലക്ഷക്കണക്കിന് വരുന്ന ദൈനംദിന യാത്രക്കാരുടെ യാത്ര ദുരിതത്തിലാക്കുന്നതിനും കാരണമാകുന്നുണ്ട്. ഈ ഗുരുതരമായ പ്രശ്നത്തിനാണ് ഇപ്പോൾ പുതിയ പദ്ധതിയിലൂടെ പരിഹാരം കാണാൻ ശ്രമിക്കുന്നത്.
ഇതിന്റെ ഭാഗമായി മജസ്റ്റിക്, കബ്ബൺ പാർക്ക് എന്നിവയുൾപ്പെടെ നഗരത്തിലെ പ്രധാന മെട്രോ സ്റ്റേഷനുകളുടെ ട്രാക്കുകൾക്ക് സമീപം ബിഎംആർസിഎൽ പ്രത്യേക ഡിജിറ്റൽ ഡിസ്പ്ലേകളും സൈൻബോർഡുകളും സ്ഥാപിച്ചു കഴിഞ്ഞു. കടുത്ത മാനസിക ബുദ്ധിമുട്ടുകൾ അനുഭവിക്കുന്നവരിൽ പ്രതീക്ഷയും മാനസിക ധൈര്യവും വളർത്തുന്നതിനായി “ചിന്തിക്കരുത്, വിഷമിക്കുന്നത് നിർത്തുക, സംസാരിക്കുക”, “ക്ഷീണം തോന്നുന്നത് സാധാരണമാണ്, സഹായം ചോദിക്കുന്നത് സാധാരണമാണ്” തുടങ്ങിയ അതിജീവനത്തിന്റെ സന്ദേശങ്ങളാണ് ഈ ബോർഡുകളിൽ ഉൾപ്പെടുത്തിയിരിക്കുന്നത്.
നിംഹാൻസിന്റെ സാമ്പത്തിക-സാങ്കേതിക സഹകരണത്തോടെ കേന്ദ്ര സർക്കാരിന്റെ ‘ടെലി-മനാസ്’ (Tele-MANAS) പ്രോഗ്രാമിന് കീഴിലാണ് ഈ അവബോധ പദ്ധതി നടപ്പിലാക്കുന്നത്. ഇതിനായി സ്റ്റേഷനുകളുടെ പ്രധാന ഭാഗങ്ങളിൽ കോൾ സെന്റർ ഹെൽപ്പ്ലൈൻ നമ്പറുകൾ പ്രദർശിപ്പിച്ചിട്ടുണ്ട്. കടുത്ത മാനസിക സമ്മർദ്ദത്തിലൂടെ കടന്നുപോകുന്നവരോ അല്ലെങ്കിൽ പെട്ടെന്നുള്ള ആവേശത്തിൽ ജീവനൊടുക്കാൻ തീരുമാനമെടുക്കുന്നവരോ ഉണ്ടെങ്കിൽ, അവർക്ക് ഉടൻ തന്നെ ഈ നമ്പറുകളിൽ വിളിച്ച് വിദഗ്ധരിൽ നിന്ന് സൗജന്യ വ്യക്തിഗത കൗൺസിലിംഗും സഹായവും തേടാവുന്നതാണെന്ന് അധികൃതർ അറിയിച്ചു.
മെട്രോ സ്റ്റേഷനുകളിൽ സുരക്ഷിതവും തടസ്സമില്ലാത്തതുമായ യാത്ര ഉറപ്പാക്കുന്നതിനൊപ്പം, യാത്രക്കാരുടെ മാനസികാരോഗ്യത്തിന് കൂടി മുൻഗണന നൽകിക്കൊണ്ട് ബിഎംആർസിഎൽ നടപ്പിലാക്കിയ ഈ ജനപക്ഷ തീരുമാനത്തെ പൊതുജനങ്ങളും മെട്രോ യാത്രക്കാരും ഒരേമനസ്സോടെയാണ് സ്വാഗതം ചെയ്യുന്നത്.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
