ബെംഗളൂരു: നഗരത്തിലെ കടുത്ത ഗതാഗതക്കുരുക്കിന് പരിഹാരം കാണാനും റോഡ് സുരക്ഷ ഉറപ്പാക്കാനുമായി പുതിയ മാതൃകയുമായി ബെംഗളൂരു ഈസ്റ്റ് സിറ്റി കോർപ്പറേഷൻ. തിരക്കേറിയ കാഗ്ഗദാസപുര റെയിൽവേ ക്രോസിംഗിലും അനുബന്ധ പ്രധാന റോഡിലുമാണ് ‘എൻഫോഴ്സ്ഡ് ഈസി ഫ്ലോ കോറിഡോർ’ (EEFC) പദ്ധതി പരീക്ഷണാടിസ്ഥാനത്തിൽ ആരംഭിച്ചത്.
മൂന്ന് പ്രധാന റോഡുകളെയും ഒരു പ്രധാന ജംഗ്ഷനെയും ബന്ധിപ്പിക്കുന്ന 175 മീറ്റർ ദൈർഘ്യമുള്ള പാതയിലാണ് പദ്ധതി നടപ്പാക്കിയിരിക്കുന്നത്. വലിയ തുക ചെലവഴിച്ച് റോഡ് വീതികൂട്ടലോ സിവിൽ നിർമ്മാണങ്ങളോ നടത്തുന്നതിന് പകരം, നിലവിലുള്ള റോഡ് ശൃംഖലയെ ശാസ്ത്രീയമായ ട്രാഫിക് മാനേജ്മെന്റിലൂടെ പരമാവധി പ്രയോജനപ്പെടുത്തുകയാണ് ഇതിലൂടെ ചെയ്യുന്നത്. ഗതാഗത തടസ്സത്തിനുള്ള കാരണങ്ങൾ കൃത്യമായി പഠിച്ച് ആ സ്ഥലത്തിന് അനുയോജ്യമായ പരിഹാരങ്ങൾ നൽകുന്ന പുതിയ ശൈലിയാണിതെന്ന് അഡീഷണൽ കമ്മീഷണർ ലോകണ്ടെ സ്നേഹൽ സുധാകർ വ്യക്തമാക്കി.
കാഗ്ഗദാസപുര മെയിൻ റോഡ്, വിജ്ഞാൻ നഗർ, മഹാദേവപുര എന്നിവിടങ്ങളിലേക്ക് പോകുന്ന പാതകളെ ഉൾപ്പെടുത്തിയാണ് 175 മീറ്റർ പരിധിയിൽ നിർമ്മാണ പ്രവൃത്തികൾ നടത്തിയത്. ബാരിക്കേഡുകൾ, ലെയ്ൻ ഡിവൈഡറുകൾ, ട്രാഫിക് സൈൻ ബോർഡുകൾ, ട്രാഫിക് സ്റ്റോപ്പിംഗ് ചെയിൻ സിസ്റ്റം, തെറ്റായ ദിശയിലുള്ള ഡ്രൈവിംഗ് തടയാനുള്ള സംവിധാനങ്ങൾ എന്നിവ ശാസ്ത്രീയമായി സജ്ജീകരിച്ചിട്ടുണ്ട്. പദ്ധതി നടപ്പിലാക്കിയതോടെ ലെയ്ൻ അച്ചടക്കം കൈവരിക്കാനും ഗതാഗതം കൂടുതൽ സുഗമമാക്കാനും സാധിച്ചതായി ഉദ്യോഗസ്ഥർ വിലയിരുത്തുന്നു.
വലിയ ചെലവുള്ള അടിസ്ഥാന സൗകര്യ വികസനത്തിന് പകരം സ്മാർട്ട് എഞ്ചിനീയറിംഗ് രീതികൾ ഉപയോഗിച്ച് ഗതാഗതം സുഗമമാക്കുന്ന ഈ മാതൃക വിജയകരമായാൽ ബെംഗളൂരുവിലെ മറ്റു പ്രധാന ജംഗ്ഷനുകളിലേക്കും വ്യാപിപ്പിക്കാനാണ് കോർപ്പറേഷന്റെ തീരുമാനം.
