Month: July 2024

ബെംഗളൂരു : മെട്രോനിർമാണത്തിനുപയോഗിക്കുന്ന ക്രെയിൻ നടുറോഡിൽ നിന്നുപോയതിനെത്തുടർന്ന് എച്ച്.എസ്.ആർ. ലേഔട്ട് ഫിഫ്ത്ത് മെയിൻ റോഡിനും 14-ാം മെയിൻ റോഡിനും ഇടയിലെ സർവീസ് റോഡിൽ ചൊവ്വാഴ്ച രാവിലെ വൻ ഗതാഗതക്കുരുക്ക് അനുഭവപ്പെട്ടു. രാവിലെ 8.30-നും 10-നും ഇടയിലാണ് ഗതാഗതക്കുരുക്കുണ്ടായത്. നമ്മ മെട്രോ ബ്ലൂ ലൈനിലെ (ഔട്ടർ റിങ് റോഡ്-വിമാനത്താവളം) പാതയുടെ നിർമാണത്തിനുപയോഗിക്കുന്നതാണ് ക്രെയിൻ. സാങ്കേതിക തകരാറിനെത്തുടർന്നാണ് ക്രെയിൻ നിന്നുപോയതെന്ന് പോലീസ് പറഞ്ഞു. ചൊവ്വാഴ്ച രാവിലെ റാഗിഗുഡ്ഡ, സിൽക്ക് ബോർഡ് എന്നീ ഭാഗങ്ങളിൽനിന്ന് ഇബ്ലൂരിലേക്കുള്ള വാഹന ഗതാഗതം വളരെ പതുക്കെയായിരുന്നു.

ബംഗളുരു : ഒമാന്റെ ബജറ്റ് എയർലൈൻ ആയ സലാം എയർ ബംഗളുരു – മസ്‌കത്ത് വിമാന സർവീസ് സെപ്റ്റംബർ 6 മുതൽ ആരംഭിക്കും. മസ്‌കത്തിൽ നിന്ന് വെള്ളി ഞായർ ദിവസങ്ങളിൽ രാത്രി 11.20ന് പുറപ്പെടുന്ന സര്‍വീസ് പുലര്‍ച്ചെ 4.15ന് ബെംഗളൂരുവില്‍ എത്തും . ബെംഗളൂരുവില്‍ നിന്ന് ശനി, തിങ്കള്‍ ദിവസങ്ങളില്‍ രാവിലെ 5.10ന് പുറപ്പെടുന്ന സര്‍വീസ് 7.10ന് മസ്‌കത്തിലെത്തും. എയര്‍ബസ് 320 വിമാനമാണ് സര്‍വീസിന് ഉപയോഗിക്കുന്നത്.  

ബെംഗളൂരു : വയനാട്ടിലെ മഴക്കെടുതി ബെംഗളൂരുവിൽനിന്ന് കോഴിക്കോട്ടേക്കും തിരിച്ചുമുള്ള കേരള, കർണാടക ആർ.ടി.സി. ബസ് സർവീസുകളെ ബാധിച്ചു. ചൊവ്വാഴ്ച കോഴിക്കോട്ടുനിന്ന് ബെംഗളൂരുവിലേക്കുള്ള കേരള ആർ.ടി.സി.യുടെ അഞ്ച് പകൽസർവീസുകൾ റദ്ദാക്കി. അതേസമയം, ബെംഗളൂരുവിൽനിന്ന് കോഴിക്കോട്ടേക്കുള്ള പകൽ ബസുകൾ പതിവുപോലെ സർവീസ് നടത്തി. പലയിടത്തും റോഡിൽ വെള്ളക്കെട്ടായതിനാൽ പതിവുപാതയിൽനിന്ന് മാറിയാണ് സഞ്ചരിച്ചത്. കോഴിക്കോട്ടുനിന്ന് ബസുകൾ എത്താത്തതിനാൽ രാത്രി ബെംഗളൂരുവിൽനിന്നുള്ള പലസർവീസുകളും നടത്താനായില്ല. ഈ ബസുകളിൽ ടിക്കറ്റ് ബുക്ക് ചെയ്തവരെ ലഭ്യമായ ബസുകളിൽ കയറ്റിവിട്ടു. ചിലർ യാത്ര റദ്ദാക്കി. കർണാടക ആർ.ടി.സി.യുടെ പകൽ, രാത്രി സർവീസുകൾ പൂർണമായും റദ്ദാക്കി.…