Day: 7 March 2021

ബെംഗളുരു:  ആഗോള, ദേശീയ സാഹചര്യവുമായി താരതമ്യം ചെയ്യുമ്പോൾ ബെംഗളൂരുവിൽ കോവിഡ് വൈറസിന് അതിവേഗ ജനിതക മാറ്റം സംഭവിക്കുന്നുവെന്ന് ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് (ഐഐഎസ്സി )പഠനം. കഴിഞ്ഞ ജൂലൈ,ഓഗസ്റ്റ് മാസങ്ങളിൽ ബയോകെമിസ്ട്രി വിഭാഗം പ്രഫസർ ഉത്പൽ ടാറ്റുവിന്റെ നേതൃത്വത്തിൽ നടത്തിയ പഠനമാണ് ജേണൽ ഓഫ് പ്രോട്ടിയോം റിസർച്ചിൽ പ്രസിദ്ധീകരിച്ചിരിക്കുന്നത്. ബെംഗളൂരുവിൽ ഒരു സാംപിളിന് ശരാശരി 11 ജനിതക മാറ്റമാണ് ശ്രദ്ധയിൽപ്പെട്ടിരിക്കുന്നത്. ആഗോള ശരാശരി 7.3, ദേശീയ ശരാശരി 8.4 എന്നിങ്ങനെയാണ്. ബെംഗളുരുവിലെ ജനിതകമാറ്റം ബംഗ്ലദേശിൽ കണ്ടെത്തിയതിനു സമാനമാണിതെന്നും പഠനത്തിൽ പറയുന്നു.

ബെംഗളൂരു: നഗരത്തിലെ തുടർച്ചയായുള്ള റാലികളും പ്രതിഷേധപ്രകടനങ്ങളും കാരണമുള്ള ഗതാഗതക്കുരുക്ക് സംബന്ധിച്ച് പൊതുതാത്പര്യ ഹർജി രജിസ്റ്റർചെയ്ത് ഹൈക്കോടതി. ഗതാഗതക്കുരുക്കിനിടയാക്കുന്നത പ്രതിഷേധപ്രകടനങ്ങൾ സംബന്ധിച്ച് മുതിർന്ന അഭിഭാഷകനായ ജസ്റ്റിസ് അരവിന്ദ് കുമാർ ചീഫ് ജസ്റ്റിസിന് നൽകിയ കത്താണ് കോടതി പൊതുതാത്പര്യ ഹർജിയായി രജിസ്റ്റർചെയ്തത്. പ്രതിഷേധം നടത്താനുള്ള അവകാശം മറ്റുള്ളവരുടെ അവകാശത്തെ ബാധിക്കരുതെന്ന് കോടതി നിരീക്ഷിച്ചു. പ്രതിഷേധപ്രകടനങ്ങൾ നടത്താൻ ഫ്രീഡംപാർക്ക് ഉൾപ്പെടെയുള്ള സ്ഥലങ്ങളുണ്ടെന്നും കോടതി ചൂണ്ടിക്കാട്ടി. ‘ബെംഗളൂരു’ ജീവിക്കാൻ ഏറ്റവും അനുയോജ്യമായ നഗരമാണെന്ന സർവേ പുറത്തുവന്നതിന് പിന്നാലെയാണ് ഗതാഗതക്കുരുക്കിൻമേൽ ഹൈക്കോടതിയുടെ ഈ നടപടി.

ബെംഗളൂരു: അധ്യാപകർക്കും വിദ്യാർഥികൾക്കും കോവിഡ് സ്ഥിരീകരിച്ചതിനെത്തുടർന്ന് സംസ്ഥാനത്ത് ഒരു സർക്കാർ സ്കൂൾ കൂടി അടച്ചു. നഗരത്തിൽ കെ.ആർ.പുരയിലെ നാരായണപുര സർക്കാർ ഹൈസ്കൂൾ അടച്ച വാർത്ത കഴിഞ്ഞ ദിവസങ്ങളിൽ പുറത്ത് വന്നിരുന്നു. ഇതിന് പുറമെ കലബുറഗിയിലെ കലഗി സർക്കാർ സ്കൂൾ 14 ദിവസത്തേക്ക് അടച്ചിട്ടുണ്ട്. നാരായണപുര സർക്കാർ സ്കൂളിലെ രണ്ട് അധ്യാപകർക്കും ഏഴു വിദ്യാർഥികൾക്കുമാണ് കോവിഡ് സ്ഥിരീകരിച്ചത്. സ്കൂളിലെ 188 വിദ്യാർഥികളിൽ 160 പേരെ കോവിഡ് പരിശോധന നടത്തിയപ്പോൾ ഏഴുപേർക്ക് പോസിറ്റീവാകുകയായിരുന്നു. കലഗി സർക്കാർ സ്കൂളിലെ 15 വിദ്യാർഥികൾക്കാണ് കോവിഡ് സ്ഥിരീകരിച്ചത്.