ബെംഗളുരു; ഹുബ്ബള്ളിയില് 5 വയസ്സുകാരിയെ പീഡിപ്പിച്ചു കൊലപ്പെടുത്തിയ കേസിലെ പ്രതി പൊലീസ് ഏറ്റുമുട്ടലില് കൊല്ലപ്പെട്ടതില് ഹൈക്കോടതി ജുഡീഷ്യല് അന്വേഷണം പ്രഖ്യാപിച്ചു.
ജൂണിനകം അന്വേഷണ റിപ്പോര്ട്ട് സമര്പ്പിക്കണമെന്നും ചീഫ് ജസ്റ്റിസ് വിഭു ബക്രു, ജി സ് സി.എം.പൂനാച്ച എന്നിവരുടെ ഡിവിഷന് ബെഞ്ച് നിര്ദേശിച്ചു.
പീപ്പിള്സ് യൂണിയന് ഫോര് സിവില് ലിബര്ട്ടീസ് (പിയുസിഎല്) എന്ന സംഘടന നല്കിയ ഹര്ജി പരിഗണിക്കുകയായിരുന്നു കോടതി.
അന്വേഷണ റിപ്പോര്ട്ടില് പോരായ്മകള് കണ്ടെത്തിയാല് കൂടുതല് അന്വേഷണത്തിനായി കേന്ദ്ര ഏജന്സിക്കു ശുപാര്ശ ചെയ്യുമെന്നും കോടതി വ്യക്തമാക്കി.
കഴിഞ്ഞ ഏപ്രിലിലാണു പ്രതി ബിഹാര് സ്വദേശി നിതേഷ് കുമാര് (35) കൊല്ലപ്പെട്ടത്. തെളിവെടുപ്പിനിടെ പ്രതി ആക്രമിച്ചതിനെ തുടര്ന്നാണു വെടിയുതിര്ത്തതെന്നായിരുന്നു പൊലീസ് പറഞ്ഞിരുന്നത്.
പെണ്കുട്ടിയെ വീട്ടില് നിന്നു തട്ടിക്കൊണ്ടുപോയി പീഡിപ്പിച്ചു കൊലപ്പെടുത്തിയെന്നായിരുന്നു
കേസ്.
