Month: May 2018

മൈസൂരു : ചാമരാജ്നഗർ ജില്ലയിലെ വനമേഖലകളിൽ ബസുകളുടെ പരമാവധി വേഗം 30 കിലോമീറ്ററായി ചുരുക്കാനുള്ള നിർദേശവുമായി കർണാടക ആർടിസി. ഇതു സംബന്ധിച്ചു കെഎസ്ആർടിസി ഡിവിഷനൽ കൺട്രോളർ ബന്ധപ്പെട്ട ഡിപ്പോ മാനേജർമാർക്കു നിർദേശം നൽകി. നഞ്ചൻഗുഡ്, ഗുണ്ടൽപേട്ട്, കൊല്ലേഗൽ, ചാമരാജ്നഗർ ഡിപ്പോകളിലെ മാനേജർമാർക്കാണു നിർദേശം. വനപാതകളിൽ വാഹനമിടിച്ചു വന്യമൃഗങ്ങൾക്കു പരുക്കേൽക്കുന്ന സംഭവങ്ങൾ വർധിച്ച സാഹചര്യത്തിലാണു നടപടി. കേരളവുമായി അതിർത്തി പങ്കിടുന്ന ബന്ദിപ്പൂർ വനമേഖലയിൽ വാഹനങ്ങളുടെ അമിതവേഗം നിയന്ത്രിക്കുന്നതിന് ഒട്ടേറെ സ്പീഡ് ബ്രേക്കറുകൾ നേരത്തേ സ്ഥാപിച്ചിരുന്നു.

ബെംഗളൂരു : അഞ്ചുലക്ഷം രൂപ ആവശ്യപ്പെട്ട് മൂന്നു വിദ്യാർഥികളെ തട്ടിക്കൊണ്ടുപോയതായി പരാതി. സാമ്പത്തികമായി പിന്നാക്കം നിൽക്കുന്ന കുടുംബത്തിൽ നിന്നാണെന്നു മനസ്സിലായതോടെ ഇവരിൽ രണ്ടുപേരെ വിട്ടയച്ചു.ഈ മാസം 22 ന് രാത്രി എട്ടിന് എംഎസ്ആർ‌ നഗറിൽ നിന്നാണ് അഞ്ചുപേർ ഇവരെ തട്ടിക്കൊണ്ടുപോയതെന്നു വിദ്യാർഥികൾ നൽകിയ പരാതിയിൽ പറയുന്നു. ഇവരെ കൊണ്ടുപോയി മർദിക്കുകയും അഞ്ചുലക്ഷം രൂപ വേണമെന്നാവശ്യപ്പെടുകയും ചെയ്തു. വിട്ടയച്ച രണ്ടുപേർ അറിയിച്ചതിനെ തുടർന്നു പൊലീസ് എത്തിയെങ്കിലും പ്രതികൾ കടന്നുകളഞ്ഞു. സദാശിവനഗർ പൊലീസ് കേസെടുത്തു.