ബെംഗളൂരു: നേപ്പാൾ – ടിബറ്റ് അതിർത്തി പ്രദേശങ്ങളിലുണ്ടായ ശക്തമായ വെള്ളപ്പൊക്കത്തിൽ കർണാടക സ്വദേശികളായ നിരവധി തീർത്ഥാടകരും വിനോദസഞ്ചാരികളും കുടുങ്ങിക്കിടക്കുന്നതായി റിപ്പോർട്ട്. കുടുങ്ങിക്കിടക്കുന്നവരെ കണ്ടെത്തുന്നതിനും സുരക്ഷിതമായി നാട്ടിലെത്തിക്കുന്നതിനുമായി വിവരശേഖരണം ആരംഭിച്ചതായി മുഖ്യമന്ത്രിയുടെ ഓഫീസ് അറിയിച്ചു.
ദുരിതബാധിതർ, അവരുടെ ബന്ധുക്കൾ, ടൂർ ഓപ്പറേറ്റർമാർ എന്നിവർ അടിയന്തരമായി വിവരങ്ങൾ ഗൂഗിൾ ഫോം വഴി ലഭ്യമാക്കണമെന്ന് അധികൃതർ അഭ്യർത്ഥിച്ചു. ശേഖരിക്കുന്ന വിവരങ്ങളുടെ അടിസ്ഥാനത്തിൽ വിദേശകാര്യ മന്ത്രാലയം, നേപ്പാളിലെയും ബീജിംഗിലെയും ഇന്ത്യൻ എംബസികളുമായി ചേർന്ന് രക്ഷാപ്രവർത്തനവും ഒഴിപ്പിക്കൽ നടപടികളും ഏകോപിപ്പിക്കും. അടിയന്തര സഹായങ്ങൾക്കായി 1070, 080-22253707 എന്നീ ഹെൽപ്പ്ലൈൻ നമ്പറുകളും സജ്ജമാക്കിയിട്ടുണ്ട്.
ദുരന്തത്തിൽപ്പെട്ട എല്ലാവരെയും എത്രയും വേഗം കണ്ടെത്തി സുരക്ഷിതമായി തിരിച്ചെത്തിക്കാൻ ആവശ്യമായ എല്ലാ നടപടികളും സ്വീകരിക്കുമെന്ന് ഉപമുഖ്യമന്ത്രി ഡി.കെ. ശിവകുമാർ ഉറപ്പുനൽകി. നേപ്പാളിൽ നിലവിൽ മരണങ്ങളൊന്നും റിപ്പോർട്ട് ചെയ്തിട്ടില്ലെന്ന് വ്യക്തമാക്കിയ ഉപമുഖ്യമന്ത്രി ഡോ. ജി. പരമേശ്വർ, രക്ഷാപ്രവർത്തനങ്ങൾക്ക് മേൽനോട്ടം വഹിക്കാൻ ഒരു മുതിർന്ന ഉദ്യോഗസ്ഥനെ കാഠ്മണ്ഡുവിലേക്ക് അയച്ചിട്ടുണ്ടെന്നും ചൈനീസ് അംബാസഡറുമായി ബന്ധപ്പെടാൻ ശ്രമിക്കുകയാണെന്നും അറിയിച്ചു. ആവശ്യമാണെങ്കിൽ ഒരു മന്ത്രിയെ തന്നെ സംഭവസ്ഥലത്തേക്ക് അയക്കുമെന്നും അദ്ദേഹം കൂട്ടിച്ചേർത്തു.
അതേസമയം, നേപ്പാളിലേക്ക് യാത്ര പോയ മലയാളികളടക്കമുള്ള പല സംഘങ്ങളും സുരക്ഷിതരാണെന്ന ആശ്വാസവാർത്തയും പുറത്തുവരുന്നുണ്ട്. ഹാവേരി റാട്ടിഹള്ളിയിൽ നിന്ന് പോയ 6 കുടുംബങ്ങളിലെ 15 പേർ പൊഖറയിൽ നിന്ന് 50 കിലോമീറ്റർ അകലെ സുരക്ഷിതരാണെന്ന് സ്ഥിരീകരിച്ചു. ഇവർ സോണാലി വഴി ഉടൻ തന്നെ കർണാടകയിലേക്ക് മടങ്ങുമെന്നാണ് വിവരങ്ങൾ.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
