ബെംഗളൂരു: നഗരത്തിൽ ഒരു മാസമായി തുടരുന്ന ഓട്ടോ എൽപിജി (LPG) ക്ഷാമം ഓട്ടോറിക്ഷാ ഡ്രൈവർമാരുടെ ജീവിതം വഴിമുട്ടിക്കുന്നു. പശ്ചിമേഷ്യൻ സംഘർഷങ്ങളെത്തുടർന്ന് ആഗോള വിതരണ ശൃംഖലയിലുണ്ടായ തടസ്സമാണ് പെട്ടെന്നുള്ള ഈ പ്രതിസന്ധിക്ക് കാരണമായിരിക്കുന്നത്. ഇതോടെ സ്വകാര്യ ഗ്യാസ് ഏജൻസികൾ ഇന്ധനവില കുത്തനെ ഉയർത്തിയത് സാധാരണക്കാരായ ഡ്രൈവർമാരെ കടക്കെണിയിലാക്കിയിരിക്കുകയാണ്.
നിലവിൽ സർക്കാർ ഉടമസ്ഥതയിലുള്ള ഐഒസിഎൽ (IOCL), ബിപിസിഎൽ (BPCL) പമ്പുകളിൽ ലിറ്ററിന് 89.35 രൂപ മുതൽ 89.52 രൂപ വരെയാണ് വിലയെങ്കിൽ, സ്വകാര്യ പമ്പുകളിൽ ഇത് 120 രൂപ വരെയായി ഉയർന്നു. വരും ദിവസങ്ങളിൽ സ്വകാര്യ ഏജൻസികൾ ലിറ്ററിന് 135 രൂപ വരെ ഈടാക്കാൻ സാധ്യതയുണ്ടെന്നാണ് ഡീലർമാർ നൽകുന്ന സൂചന. വിലക്കുറവുള്ള സർക്കാർ പമ്പുകളിൽ ഇന്ധനം നിറയ്ക്കാൻ പുലർച്ചെ 6 മണി മുതൽ കിലോമീറ്ററുകളോളം നീളുന്ന ക്യൂവാണ് അനുഭവപ്പെടുന്നത്.
മണിക്കൂറുകളോളം വരി നിൽക്കേണ്ടി വരുന്നത് തങ്ങളുടെ ജോലി സമയത്തെ ബാധിക്കുന്നുവെന്നും ദിവസം 500 രൂപ മാത്രം വരുമാനമുള്ള തങ്ങൾക്ക് എങ്ങനെ കുടുംബം പുലർത്താൻ കഴിയുമെന്നും ഡ്രൈവർമാർ ആശങ്കപ്പെടുന്നു. വർധിപ്പിച്ച ഇന്ധനവിലയ്ക്ക് അനുസൃതമായി യാത്രക്കാരിൽ നിന്ന് അധിക തുക ഈടാക്കാൻ കഴിയാത്തതും ഇവരെ വലയ്ക്കുന്നു. നഗരത്തിലെ പല സ്വകാര്യ ഔട്ട്ലെറ്റുകളും സ്റ്റോക്കില്ലെന്ന കാരണത്താൽ ആഴ്ചകളായി അടഞ്ഞുകിടക്കുകയാണ്. ടോട്ടൽ ഗ്യാസ് ഉൾപ്പെടെയുള്ള പ്രമുഖ ഏജൻസികൾ മാർച്ച അവസാന വാരം മുതൽ പ്രവർത്തനം നിർത്തിവെച്ചിരിക്കുകയാണ്.
സർക്കാർ പമ്പുകളിൽ വിതരണം സാധാരണ നിലയിലാണെങ്കിലും നഗരത്തിലെ മുഴുവൻ ഓട്ടോറിക്ഷകൾക്കും ആവശ്യമായ ഇന്ധനം നൽകാൻ ഇവയ്ക്ക് സാധിക്കുന്നില്ല. അന്താരാഷ്ട്ര വിപണിയിലെ ക്രൂഡ് ഓയിൽ വില വർധനവാണ് വിലക്കയറ്റത്തിന് കാരണമായി ചൂണ്ടിക്കാണിക്കപ്പെടുന്നത്. എന്നാൽ സ്വകാര്യ കമ്പനികൾ കൃത്രിമ ക്ഷാമം സൃഷ്ടിച്ച് വില വർധിപ്പിക്കുകയാണെന്ന ആരോപണവും ഉയരുന്നുണ്ട്. സർക്കാർ അടിയന്തരമായി ഇടപെട്ടില്ലെങ്കിൽ തങ്ങൾ സർവീസ് നിർത്തേണ്ടി വരുമെന്ന നിലപാടിലാണ് നഗരത്തിലെ ഓട്ടോ തൊഴിലാളികൾ.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
