ബെംഗളൂരുവിന് പിന്നാലെ മംഗളൂരുവിലും ഹോട്ടലുകളിൽ ഭക്ഷ്യസുരക്ഷാ വകുപ്പ് മിന്നൽ പരിശോധന ശക്തമാക്കി. ആരോഗ്യമന്ത്രി യു.ടി. ഖാദറിന്റെ സ്വന്തം ജില്ലയായ മംഗളൂരുവിലെ സിറ്റി സെന്റർ മാളിൽ പ്രവർത്തിക്കുന്ന പ്രശസ്തമായ കെ.എഫ്.സി (KFC) ഔട്ട്‌ലെറ്റിൽ നടന്ന പരിശോധനയിൽ ഗുരുതരമായ നിയമലംഘനങ്ങൾ കണ്ടെത്തി. മാസങ്ങൾ പഴക്കമുള്ള മാംസവും വീണ്ടും ഉപയോഗിച്ച് കറുത്തുപോയ എണ്ണയും കണ്ടെത്തിയതിനെ തുടർന്ന് അധികൃതർ ഔട്ട്‌ലെറ്റ് ഉടനടി അടപ്പിച്ചു.
ഇവിടെ നിന്ന് വാങ്ങിയ ‘ചിക്കൻ ഫെറി ഫെറി’ എന്ന വിഭവത്തിൽ നിന്ന് കടുത്ത ദുർഗന്ധം വമിക്കുന്നതായി ഒരു ഉപഭോക്താവ് ആരോഗ്യ വകുപ്പിന് പരാതി നൽകിയിരുന്നു. ഇതിന്റെ അടിസ്ഥാനത്തിൽ ഉദ്യോഗസ്ഥർ സ്റ്റോറേജ് റൂമിൽ നടത്തിയ പരിശോധനയിൽ ഏകദേശം നാല് മുതൽ എട്ട് മാസം വരെ പഴക്കമുള്ള മാംസമാണ് കണ്ടെത്തിയത്. സ്റ്റോറേജ് മുറിയിൽ പ്രവേശിച്ച ഉടൻ തന്നെ കടുത്ത ദുർഗന്ധം അനുഭവപ്പെട്ടതായി ഉദ്യോഗസ്ഥർ വ്യക്തമാക്കി. ബെംഗളൂരുവിൽ നിന്നാണ് ഈ ഔട്ട്‌ലെറ്റിലേക്ക് കോഴിയിറച്ചി എത്തിച്ചിരുന്നത്.
വിവിധ തരത്തിലുള്ള ഫ്രോസൺ ചിക്കനുകൾക്കൊപ്പമാണ് പഴകിയ മാംസവും സൂക്ഷിച്ചിരുന്നത്. കൂടാതെ, കഴിഞ്ഞ മൂന്ന് ദിവസമായി ഒരേ എണ്ണ തന്നെയാണ് വറുക്കാൻ ഉപയോഗിച്ചിരുന്നതെന്നും കണ്ടെത്തി. ഉപയോഗിച്ച് കറുപ്പ് നിറത്തിലായ എണ്ണ കണ്ട് ജീവനക്കാരെ രൂക്ഷമായി വിമർശിച്ച ഉദ്യോഗസ്ഥർ, ഔട്ട്‌ലെറ്റിൽ നിന്നുള്ള കോഴിയിറച്ചിയുടെയും എണ്ണയുടെയും സാമ്പിളുകൾ ശേഖരിച്ച് കൂടുതൽ ശാസ്ത്രീയ പരിശോധനകൾക്കായി മൈസൂരിലെ ലാബിലേക്ക് അയച്ചു. ലാബ് റിപ്പോർട്ട് ലഭിച്ച ശേഷം സ്ഥാപനത്തിനെതിരെ കൂടുതൽ കർശനമായ നിയമനടപടികൾ സ്വീകരിക്കുമെന്ന് അധികൃതർ അറിയിച്ചു.
