ബെംഗളൂരു: കർണാടകയുടെ വിവിധ ഭാഗങ്ങളിൽ ഇന്നു മുതൽ ഏപ്രിൽ 7 വരെ ഇടിമിന്നലോടു കൂടിയ ശക്തമായ മഴയ്ക്കും കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി. തലസ്ഥാനമായ ബെംഗളൂരു ഉൾപ്പെടെയുള്ള തെക്കൻ ജില്ലകളിലും തീരദേശ മേഖലകളിലും വടക്കൻ കർണാടകയിലും മഴ ലഭിക്കുമെന്നാണ് പ്രവചനം. 10 ജില്ലകളിൽ യെല്ലോ അലേർട്ട് പ്രഖ്യാപിച്ചിട്ടുണ്ട്.
ബെംഗളൂരു നഗരം, ബെംഗളൂരു റൂറൽ, തുംകൂർ, ചിക്കബെല്ലാപൂർ, കോലാർ, ചാമരാജനഗർ, രാമനഗര ജില്ലകളിൽ ശക്തമായ കാറ്റോടു കൂടിയ മഴയുണ്ടാകും. ദക്ഷിണ കന്നഡ, ഉത്തര കന്നഡ, ഉഡുപ്പി ജില്ലകളിലും മഴയ്ക്ക് സാധ്യതയുണ്ട്.
കലബുറഗി, ധാർവാഡ്, ഗദഗ്, ശിവമോഗ, ഉഡുപ്പി, ചിക്കമംഗളൂരു, ഹാസൻ, ദക്ഷിണ കന്നഡ, കുടക്, ചാമരാജനഗർ എന്നീ ജില്ലകളിൽ ഇടിമിന്നലോട് കൂടിയ മിതമായ മഴയ്ക്ക് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. അതിനാൽ ഈ 10 ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്.
ബെംഗളൂരുവിലെ കാലാവസ്ഥ:
അടുത്ത 48 മണിക്കൂർ ബെംഗളൂരുവിൽ ഭാഗികമായി മേഘാവൃതമായ കാലാവസ്ഥയായിരിക്കും. വൈകുന്നേരമോ രാത്രിയിലോ നഗരത്തിൽ ഇടിമിന്നലോടു കൂടിയ മഴയ്ക്ക് സാധ്യതയുണ്ട്. നഗരത്തിലെ പരമാവധി താപനില 33°C ഉം കുറഞ്ഞ താപനില 22°C ഉം ആയിരിക്കും.
ഉയർന്ന താപനില:
സംസ്ഥാനത്ത് ഏറ്റവും ഉയർന്ന ചൂട് രേഖപ്പെടുത്തുന്നത് യാദ്ഗിറിലായിരിക്കും (37°C). ബെല്ലാരി, കലബുറഗി, ബാഗൽകോട്ട് എന്നിവിടങ്ങളിൽ താപനില 36°C വരെ ഉയരാൻ സാധ്യതയുണ്ടെന്നും റിപ്പോർട്ടുകൾ സൂചിപ്പിക്കുന്നു.
