ബെംഗളൂരു: ശനിയാഴ്ച നടന്ന ഐപിഎൽ ഉദ്ഘാടന മത്സരത്തിന് ശേഷം പതിവിനേക്കാൾ ഇരട്ടിയിലധികം യാത്രക്കാരെ എത്തിച്ച് നമ്മ മെട്രോ. ഏകദേശം 22,000 കായിക പ്രേമികളാണ് മത്സരം കഴിഞ്ഞ് മടങ്ങാൻ മെട്രോ സേവനം പ്രയോജനപ്പെടുത്തിയത്.
ബിഎംആർസിഎൽ (BMRCL) പുറത്തുവിട്ട കണക്കുകൾ പ്രകാരം 50 മിനിറ്റിനുള്ളിൽ ഈ വൻ തിരക്ക് ഒഴിവാക്കാൻ മെട്രോയ്ക്ക് സാധിച്ചു.
ബംഗളൂരു പോലീസ്, ഗ്രേറ്റർ ബംഗളൂരു അതോറിറ്റി (GBA), കെഎസ്സിഎ (KSCA), ആർസിബി (RCB) എന്നിവരുമായി സഹകരിച്ച് ബിഎംആർസിഎൽ നടപ്പിലാക്കിയ ‘മെട്രോ-മാച്ച് ടിക്കറ്റ് ഇന്റഗ്രേഷൻ’ പദ്ധതി വലിയ വിജയമായി.
ഐപിഎൽ മാച്ച് ടിക്കറ്റുകൾ മെട്രോ ക്യുആർ കോഡുമായി സംയോജിപ്പിച്ചതിനാൽ, ആരാധകർക്ക് ഏത് സ്റ്റേഷനിൽ നിന്നും കബ്ബൺ പാർക്ക്, എംജി റോഡ് സ്റ്റേഷനുകളിലേക്ക് പ്രത്യേക ടിക്കറ്റ് എടുക്കാതെ തന്നെ യാത്ര ചെയ്യാനും മത്സരശേഷം മടങ്ങാനും സാധിച്ചു.
രാത്രി 11:05 മുതൽ 11:55 വരെയുള്ള 50 മിനിറ്റിനുള്ളിൽ ഓരോ മൂന്ന് മിനിറ്റ് ഇടവേളയിലും ട്രെയിനുകൾ ഓടിച്ചു. ഇതിനായി പർപ്പിൾ ലൈനിൽ 18-ഉം, ഗ്രീൻ ലൈനിൽ 15-ഉം, യെല്ലോ ലൈനിൽ 6-ഉം ഉൾപ്പെടെ ആകെ 39 റൗണ്ട് ട്രിപ്പുകൾ നടത്തി.
മജസ്റ്റിക്കിൽ നിന്ന് പുലർച്ചെ 1:45-നും ആർവി റോഡിൽ നിന്ന് 2:05-നും അവസാന ട്രെയിനുകൾ പുറപ്പെട്ടു. തിരക്ക് നിയന്ത്രിക്കാൻ കബ്ബൺ പാർക്ക് സ്റ്റേഷനിൽ നിന്ന് മാത്രം മജസ്റ്റിക്കിലേക്ക് 13-ഉം വൈറ്റ്ഫീൽഡിലേക്ക് 9-ഉം ട്രെയിനുകൾ സർവീസ് നടത്തി.
44 മെട്രോ സ്റ്റേഷനുകളിൽ വാഹനങ്ങൾ പാർക്ക് ചെയ്യാനുള്ള സൗകര്യം ഒരുക്കിയിരുന്നു. ഇരുചക്ര വാഹനങ്ങൾക്ക് 30 രൂപയും നാലുചക്ര വാഹനങ്ങൾക്ക് 60 രൂപയുമായിരുന്നു നിരക്ക്.
വരും ദിവസങ്ങളിലെ ഐപിഎൽ മത്സരങ്ങൾക്കും തിരക്ക് നിയന്ത്രിക്കാൻ കൂടുതൽ സൗകര്യങ്ങൾ ഏർപ്പെടുത്തുമെന്ന് ബിഎംആർസിഎൽ അറിയിച്ചു.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
