രോഗകാലത്ത് പലരും കയ്യൊഴിഞ്ഞു; നല്ല സമയത്ത് കരുതിവെച്ചത് മോശം കാലത്ത് തുണയായി; ഉല്ലാസ് പന്തളത്തിന്റെ ഇപ്പോഴത്തെ സ്ഥിതി

മലയാളികളെ ചിരിയുടെ മാലപ്പടക്കത്തിന് മുന്നിലിരുത്തിയ ഉല്ലാസ് പന്തളം ഇന്ന് ഒരു പോരാട്ടത്തിലാണ്. സ്റ്റേജിലെ ആവേശകരമായ പ്രകടനങ്ങൾക്കിടയിൽ അപ്രതീക്ഷിതമായി എത്തിയ പക്ഷാഘാതം ഉല്ലാസിന്റെ ശരീരത്തിന്റെ ഇടതുഭാഗത്തെ തളർത്തിയെങ്കിലും, മനസ്സിനെ തളർത്താനായില്ല. പന്തളം നഗരസഭാ കാര്യാലയത്തിന് സമീപമുള്ള ‘മുന്തിരിപ്പന്തൽ’ എന്ന ഹോട്ടലിലെ കൗണ്ടറിൽ ഇന്ന് ഉല്ലാസിനെ കാണുമ്പോൾ ആരാധകർക്കും നാട്ടുകാർക്കും ഒരേ സമയം അത്ഭുതവും ആദരവുമാണ്.

ഏകദേശം എട്ടുമാസം മുൻപാണ് ഉല്ലാസിന്റെ ജീവിതത്തെ മാറ്റിമറിച്ച ആ സംഭവം ഉണ്ടായത്. അപ്രതീക്ഷിതമായി ബാധിച്ച പക്ഷാഘാതം അദ്ദേഹത്തിന്റെ ആരോഗ്യത്തെ തളർത്തി. ശരീരത്തിന്റെ ഇടതുഭാഗം ഭാഗികമായി തളർന്നുപോയതോടെ കലാരംഗത്ത് സജീവമായിരുന്ന ഉല്ലാസ് പെട്ടെന്ന് വേദികളിൽ നിന്ന് അപ്രത്യക്ഷനായി.

പല കലാകാരന്മാരും രോഗം വരുമ്പോൾ നിസ്സഹായരായി പോകുന്ന അവസ്ഥ നാം കണ്ടിട്ടുണ്ട്. എന്നാൽ ഉല്ലാസ് അതിൽ നിന്ന് വ്യത്യസ്തനാകുന്നത് തന്റെ മുൻകരുതൽ കൊണ്ടാണ്. തിരക്കുള്ള സമയത്ത് അദ്ദേഹം പന്തളം നഗരസഭയ്ക്ക് സമീപം ‘മുന്തിരിപ്പന്തൽ’ എന്ന പേരിൽ ഒരു ഹോട്ടൽ തുടങ്ങിയിരുന്നു.

കൂടെയുണ്ടാകുമെന്ന് കരുതിയ പലരും കൈവിട്ടപ്പോൾ

അസുഖം വന്ന് വേദികൾ നഷ്ടപ്പെട്ടപ്പോൾ, കൂടെയുണ്ടാകുമെന്ന് കരുതിയ പലരും കൈവിട്ടപ്പോൾ ഈ ഹോട്ടലാണ് ഉല്ലാസിന് താങ്ങായത്. ഇന്ന് ആ ഹോട്ടലിന്റെ കൗണ്ടറിലിരുന്ന് അദ്ദേഹം കാര്യങ്ങൾ നിയന്ത്രിക്കുന്നു. ശാരീരികമായ പരിമിതികളെ മറികടന്ന് വീണ്ടും സജീവമാകാനുള്ള അദ്ദേഹത്തിന്റെ ശ്രമം നിരവധി പേർക്ക് പ്രചോദനമാണ്.

“നല്ല സമയത്ത് കരുതിവെച്ചത് മോശം കാലത്ത് തുണയായി” എന്ന് ഉല്ലാസ് പറയുമ്പോൾ അതിലൊരു വലിയ ജീവിതപാഠമുണ്ട്. കരിയറിന്റെ സുവർണ്ണകാലത്ത്, തിരക്കുകളിൽ നിന്ന് തിരക്കുകളിലേക്ക് ഓടുന്നതിനിടയിലാണ് ഉല്ലാസ് ഈ ഹോട്ടൽ സംരംഭം തുടങ്ങിയത്. അന്ന് കൂടെയുണ്ടാകുമെന്ന് കരുതിയ പലരും രോഗകാലത്ത് കയ്യൊഴിഞ്ഞപ്പോഴും, അന്ന് നട്ടുനനച്ച ഈ ‘മുന്തിരിപ്പന്തൽ’ ഇന്ന് അദ്ദേഹത്തിന് തണലാവുകയാണ്.

‘‘കുറച്ചു നാൾ മുൻപ് നമ്മുടെ നല്ല സമയം ആയിരുന്നു. അന്ന് നമ്മൾ ഇടതടവില്ലാതെ പരിപാടികൾ ചെയ്തു മുന്നോട്ട്പോയി. ഇപ്പോൾ പുതിയ തലമുറ ഒക്കെ വന്നു നമ്മുടെ അവസരങ്ങൾ കുറഞ്ഞു. അങ്ങനെ ഞാൻ പുതിയ എന്തെങ്കിലും ചെയ്യാം എന്ന് കരുതി തുടങ്ങിയ സംരംഭമാണ് എന്റെ ‘മുന്തിരിപ്പന്തൽ’ എന്ന ഭക്ഷണശാല. ഹോട്ടൽ എന്ന് പറയുന്നത് ഭയങ്കര സമ്മർദം ഉള്ള ഫീൽഡ് ആണ്.നമ്മൾ സ്റ്റേജിൽ പരിപാടി അവതരിപ്പിക്കുമ്പോൾ ഉള്ള ടെൻഷൻ ഇല്ലേ അതിനേക്കാൾ ടെൻഷൻ ആണ് ഹോട്ടൽ നടത്തുമ്പോൾ. കാരണം ഇത് നമുക്ക് അറിയാൻ വയ്യാത്ത ഫീൽഡ് ആണ്. അടുക്കള കൈകാര്യം ചെയ്യുന്ന ആരെങ്കിലും വന്നില്ലെങ്കിൽ വലിയ ടെൻഷൻ ആണ്. പല ടെൻഷനിൽ നിന്നാണ് അസുഖം വരാൻ ഉള്ള കാരണം. ഉല്ലാസകാലം എത്രയും വേഗം തിരിച്ചുവരും എന്ന് കരുതുന്നു.’’–ഉല്ലാസ് പന്തളം പറയുന്നു.

പന്തളം സ്വദേശിയായ ഉല്ലാസ് മിമിക്രി വേദികളിലൂടെയാണ് കലാജീവിതം തുടങ്ങിയത്. ടെലിവിഷൻ റിയാലിറ്റി ഷോകളിലെ പ്രകടനമാണ് അദ്ദേഹത്തെ ജനപ്രിയനാക്കിയത്. പ്രത്യേകിച്ചും കോമഡി സ്റ്റാർസ് എന്ന പരിപാടിയിലൂടെ ഉല്ലാസ് പന്തളം എന്ന പേര് മലയാളി വീടുകളിൽ സംസാരവിഷയമായി. തനതായ ശൈലിയിലുള്ള സംഭാഷണങ്ങളും കൗണ്ടർ തമാശകളും ഉല്ലാസിനെ മറ്റ് കലാകാരന്മാരിൽ നിന്ന് വേറിട്ടുനിർത്തി. സിനിമകളിലും ചെറുകഥാപാത്രങ്ങൾ അവതരിപ്പിച്ചുകൊണ്ട് അദ്ദേഹം തന്റെ സാന്നിധ്യം അറിയിച്ചിരുന്നു.

ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]