മുംബൈ: കമ്പനിയില് ചേര്ന്ന് നാല് മാസത്തിനുള്ളില് തന്റെ മകള് അന്ന സെബാസ്റ്റ്യന് അമിത ജോലി ഭാരം കാരണം മരിച്ചു എന്ന അമ്മയുടെ വെളിപ്പെടുത്തലില് അന്വേഷണം പ്രഖ്യാപിച്ച് കേന്ദ്രസര്ക്കാര്.
ഏണസ്റ്റ് ആന്ഡ് യങ് ഇന്ത്യയില് ജോലിയിലിരിക്കെ ജൂലൈ 20ന് താമസസ്ഥലത്ത് വച്ച് അന്ന സെബാസ്റ്റ്യന് കുഴഞ്ഞുവീണ് മരിക്കുകയായിരുന്നു.
അന്നയുടെ മരണത്തിലേക്ക് നയിച്ച സാഹചര്യങ്ങളെ കുറിച്ച് അന്വേഷിക്കുമെന്ന് കേന്ദ്ര തൊഴില്മന്ത്രാലയം അറിയിച്ചു.
‘അന്ന സെബാസ്റ്റ്യന്റെ വേര്പാടില് അഗാധമായ ദുഃഖം രേഖപ്പെടുത്തുന്നു. സുരക്ഷിതമല്ലാത്തതും ചൂഷണം ചെയ്യുന്നതുമായ തൊഴില് അന്തരീക്ഷത്തെക്കുറിച്ചുള്ള ആരോപണങ്ങളില് സമഗ്രമായ അന്വേഷണം നടത്തും.
നീതി ഉറപ്പാക്കാന് ഞങ്ങള് പ്രതിജ്ഞാബദ്ധരാണ്’- കേന്ദ്ര തൊഴില് വകുപ്പ് സഹമന്ത്രി ശോഭ കരന്തലജെ എക്സില് കുറിച്ചു.
വൈക്കം സ്വദേശിനിയായ യുവതിയുടെ മരണം സംബന്ധിച്ച് തൊഴില്വകുപ്പ് അന്വേഷണം നടത്തണമെന്ന് ബിജെപി നേതാവ് രാജീവ് ചന്ദ്രശേഖര് അടക്കം ആവശ്യപ്പെട്ടിരുന്നു. ഇതിന് പിന്നാലെയാണ് മന്ത്രിയുടെ പ്രതികരണം.
