ബെംഗളൂരു: കോർപ്പറേറ്റ് ലോകത്തെ ഉയർന്ന ശമ്പളവും ആഡംബര ജീവിതസാഹചര്യങ്ങളും മനസ്സിന് യഥാർത്ഥ സംതൃപ്തി നൽകുന്നില്ലെന്ന വെളിപ്പെടുത്തലുമായി ബെംഗളൂരു സ്വദേശിയായ യുവാവ്. ഏഴ് വർഷത്തെ പ്രവൃത്തിപരിചയവും നാല് തവണ ജോലി മാറ്റവും പിന്നിട്ട ബിഷിസ്റ്റ് ഷോം എന്ന യുവാവ് ഇൻസ്റ്റാഗ്രാമിൽ പങ്കുവെച്ച വീഡിയോയാണ് ഇപ്പോൾ സോഷ്യൽ മീഡിയയിൽ വലിയ ചർച്ചകൾക്ക് വഴിവെച്ചിരിക്കുന്നത്. ശമ്പള വർധനവിനായി ഓടുമ്പോഴും ജീവിതത്തിന്റെ അർത്ഥം കണ്ടെത്താനാകാത്ത അവസ്ഥയെക്കുറിച്ചാണ് ഇദ്ദേഹം സംസാരിക്കുന്നത്.
എന്തിനുവേണ്ടിയാണ് താൻ ഓരോ ദിവസവും എട്ടു മുതൽ ഒമ്പത് മണിക്കൂർ വരെ അധ്വാനിക്കുന്നത് എന്ന ചോദ്യത്തിന് ഏഴു വർഷത്തിന് ശേഷവും ഉത്തരമില്ലെന്ന് ഷോം പറയുന്നു. വലിയ ഫ്ലാറ്റും മികച്ച യാത്രകളും ആസ്വാദ്യകരമായ ഭക്ഷണവും ജീവിതശൈലിയിലെ പുരോഗതിയും നൽകുമെങ്കിലും, ഞായറാഴ്ച രാത്രികളിൽ അനുഭവപ്പെടുന്ന മാനസികമായ ശൂന്യത മാറ്റാൻ ഇവയ്ക്കൊന്നും സാധിക്കുന്നില്ല. പണം ജീവിതത്തിന് അർത്ഥം നൽകുന്നില്ലെന്നും മറിച്ച് യഥാർത്ഥ ചോദ്യങ്ങളിൽ നിന്ന് ഒളിച്ചോടാനുള്ള സമയം മാത്രമാണ് നൽകുന്നതെന്നും അദ്ദേഹം വീഡിയോയിൽ പങ്കുവെക്കുന്നു.
വീഡിയോ വൈറലായതോടെ സമാനമായ അനുഭവങ്ങൾ പങ്കുവെച്ച് നിരവധി ഐടി-കോർപ്പറേറ്റ് ജീവനക്കാരാണ് രംഗത്തെത്തിയിരിക്കുന്നത്. ശമ്പള വർധനവ് നൽകുന്ന ആവേശം ഒരു മാസത്തിൽ കൂടുതൽ നീണ്ടുനിൽക്കാറില്ലെന്നും ‘സൺഡേ നൈറ്റ് ആങ്സൈറ്റി’ (ഞായറാഴ്ച രാത്രികളിലെ ഉത്കണ്ഠ) കടുത്ത യാഥാർത്ഥ്യമാണെന്നും പലരും അഭിപ്രായപ്പെടുന്നു. ബെംഗളൂരു, ഹൈദരാബാദ്, മുംബൈ തുടങ്ങിയ മെട്രോ നഗരങ്ങളിലെ യുവാക്കൾക്കിടയിൽ ഇത്തരം മാനസിക സമ്മർദം വർധിക്കുന്നതായി വിദഗ്ധരും ചൂണ്ടിക്കാട്ടുന്നുണ്ട്.
ദീർഘമായ ജോലി സമയവും ടാർഗെറ്റുകൾ പൂർത്തിയാക്കാനുള്ള നെട്ടോട്ടവും വ്യക്തിപരമായ സന്തോഷങ്ങളെ ഇല്ലാതാക്കുന്നുവെന്നാണ് പൊതുവായ വിലയിരുത്തൽ. ഈ സാഹചര്യത്തിൽ പണത്തേക്കാൾ ഉപരിയായി തൊഴിൽ-ജീവിത സന്തുലിതാവസ്ഥയ്ക്കും (Work-Life Balance) മാനസിക സംതൃപ്തിക്കും പ്രാധാന്യം നൽകേണ്ടതുണ്ടെന്ന ചർച്ചകൾക്കും ഈ വീഡിയോ തുടക്കമിട്ടു.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
