ബെംഗളൂരു: ദിവസങ്ങളായി ഒളിവിലായിരുന്ന കുപ്രസിദ്ധ പെൺവാണിഭക്കാരൻ ‘സാൻട്രോ’ രവിയെ കർണാടക പോലീസ് ഗുജറാത്തിൽ അറസ്റ്റ് ചെയ്തു. സ്ത്രീധന പീഡനം, ബലാത്സംഗം, ശാരീരിക പീഡനം എന്നിവ ആരോപിച്ച് ദളിത് യുവതി നൽകിയ പരാതിയെ തുടർന്നാണ് അറസ്റ്റ്. സ്ത്രീധന നിരോധന നിയമത്തിലെയും എസ്‌സി/എസ്ടി (അതിക്രമങ്ങൾ തടയൽ) നിയമത്തിലെയും വകുപ്പുകൾ പ്രകാരം മൈസൂരു പോലീസ് കേസെടുത്തു. ബിജെപിയുടെ ഉന്നത മന്ത്രിമാർ രവിയെ രക്ഷപ്പെടാൻ സഹായിച്ചെന്നാരോപിച്ച് കർണാടക സർക്കാരിനെതിരെ പ്രതിപക്ഷം കടുത്ത വിമർശനം ഉന്നയിച്ചിരുന്നു.
തെലങ്കാനയും കേരളവും ഉൾപ്പെടെയുള്ള അയൽ സംസ്ഥാനങ്ങളിലേക്ക് ടീമിനെ അയച്ചിട്ടുണ്ടെന്ന് അഡീഷണൽ ഡയറക്ടർ ജനറൽ ഓഫ് പോലീസ് (ലോ ആൻഡ് ഓർഡർ) അലോക് കുമാർ മൈസൂരുവിൽ വാർത്താ സമ്മേളനത്തിൽ അറിയിച്ചിരുന്നു. തുടർന്ന് രവിയെ അഹമ്മദാബാദിന് സമീപം അറസ്റ്റ് ചെയ്യുകയായിരുന്നു, ഇതിനകം ഒരു ട്രാൻസിറ്റ് വാറണ്ട് നേടിയിട്ടുണ്ട്. അദ്ദേഹത്തെ ഉടൻ കർണാടകയിലേക്ക് കൊണ്ടുവരുമെന്നും അലോക് കുമാർ മാധ്യമങ്ങളോട് പറഞ്ഞു. രവി തന്റെ ലൊക്കേഷനുകളും മൊബൈൽ ഫോണുകളും മാറ്റുന്നത് പോലീസിന് പ്രതിയെ കണ്ടെത്തുന്നത് ബുദ്ധിമുട്ടാക്കിയെന്നും അദ്ദേഹം കൂട്ടിച്ചേർത്തു.
2023 ജനുവരി 2 ന് മൈസൂരിലെ വിജയനഗർ പോലീസ് സ്റ്റേഷനിൽ എഫ്‌ഐആർ ഫയൽ ചെയ്തതിന് ശേഷം ‘സാൻട്രോ’ രവിയെ കണ്ടെത്താനും അറസ്റ്റ് ചെയ്യാനും കർണാടക പോലീസ് ആറ് ടീമുകളെ രൂപീകരിച്ചിരുന്നു. രാജ്യം വിടുന്നത് തടയാൻ ലുക്ക്ഔട്ട് നോട്ടീസും പുറപ്പെടുവിച്ചിരുന്നതായി, അലോക് കുമാർ പറഞ്ഞു. .
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button.
