ചെന്നൈ: മയക്കുമരുന്ന് ഉപയോഗ കേസിൽ തമിഴ് നടൻ കൃഷ്ണ കേരളത്തിൽ പിടിയിൽ. തമിഴ്നാട് സ്പെഷ്യൽ പൊലീസ് സംഘമാണ് നടനെ കസ്റ്റഡിയിൽ എടുത്തത്. കേസിൽ നടൻ ശ്രീകാന്ത് നേരത്തെ അറസ്റ്റിലായിരുന്നു.
കൃഷ്ണനെ ചെന്നൈയിലെത്തിച്ച് രഹസ്യ കേന്ദ്രത്തിൽ ചോദ്യം ചെയ്യുകയാണെന്നാണ് റിപ്പോർട്ട്. എഐഎഡിഎംകെ മുൻ എക്സിക്യൂട്ടീവ് അംഗം പ്രസാദ്, സേലം ജില്ലയിൽ നിന്നുള്ള പ്രദീപ് കുമാർ, പശ്ചിമാഫ്രിക്കയിലെ ഘാനയിൽ നിന്നുള്ള ജോൺ എന്നിവരെ മയക്കുമരുന്ന് കടത്ത് കേസിൽ നുങ്കമ്പാക്കം പൊലീസ് അറസ്റ്റ് ചെയ്തിരുന്നു. ഇവരെ ചോദ്യം ചെയ്തതിൽ നിന്നാണ് നടൻ ശ്രീകാന്ത് മയക്കുമരുന്ന് വാങ്ങി ഉപയോഗിച്ചതായി വിവരം ലഭിച്ചത്.
ശ്രീകാന്തിനെ പൊലീസ് ചോദ്യം ചെയ്തതോടെയാണ് നടൻ കഴിഞ്ഞ ഒരു വർഷമായി മയക്കുമരുന്ന് ഉപയോഗിക്കുന്നുണ്ടെന്നും ജിപേ വഴി 4 ലക്ഷത്തിലധികം രൂപ മയക്ക് മരുന്നിനായി നൽകിയെന്നും വെളിപ്പെടുത്തിയത്. ശ്രീകാന്തിന് പുറമെ കൃഷ്ണയും മയക്കുമരുന്ന് ഉപയോഗിച്ചിരുന്നതായി പൊലീസിന് വിവരം ലഭിച്ചു.
