ബെംഗളൂരു : അപമര്യാദയായി പെരുമാറിയ യുവാവിനു നേരെ മലയാളി യുവതി കുരുമുളകു സ്പ്രേ പ്രയോഗിച്ചു. സംഭവത്തെക്കുറിച്ചു യുവതി നൽകിയ പരാതിയിൽ ഹുബ്ബള്ളി സ്വദേശി ഗ്ലാഡിസനെ (26) പൊലീസ് അറസ്റ്റ് ചെയ്തു. മണിപ്പാലിലെ സ്വകാര്യ കോളജിൽ പഠിക്കുന്ന യുവതി പഠനസംബന്ധമായ ആവശ്യത്തിനാണു ബെംഗളൂരുവിൽ എത്തിയത്. കഴിഞ്ഞ ഞായറാഴ്ച മടങ്ങിപ്പോകാനായി സ്വകാര്യബസിൽ ടിക്കറ്റ് ബുക്ക് ചെയ്തു. ബസ് പുറപ്പെടുന്ന ഗാന്ധിനഗറിലേക്കു പോകാനാണു മഡിവാളയിൽനിന്ന് ഏജൻസിയുടെ പിക്അപ് വാനിൽ കയറിയത്. ഇതിനിടെ അടുത്ത സീറ്റിലിരുന്ന ഗ്ലാഡിസൻ അപമര്യാദയായി പെരുമാറി.
ഒരുവട്ടം താക്കീതു നൽകിയ യുവതി കൊണ്ടുവിടാൻ എത്തിയ സുഹൃത്തിനെ വിവരമറിയിക്കുകയും ചെയ്തു. സുഹൃത്ത് ഇക്കാര്യം ബസ് ജീവനക്കാരെയും അറിയിച്ചു. രാത്രി എട്ടുമണിയോടെ പുറപ്പെട്ട ബസ് ഗാന്ധിനഗറിൽ എത്തിയപ്പോഴും ഇയാൾ തുറിച്ചുനോക്കി. യുവതി ഇതു കണ്ടക്ടറുടെ ശ്രദ്ധയിൽപ്പെടുത്തി.
തുടർന്ന് ഇറങ്ങാൻ തുടങ്ങിയപ്പോൾ ഇയാൾ യുവതിയെ ശകാരിക്കുകയും മോശമായി പെരുമാറുകയും ചെയ്തു. ഉടൻ ബാഗിൽനിന്നു കുരുമുളകു സ്പ്രേയെടുത്ത് ഇയാളുടെ മുഖത്തേക്കു പ്രയോഗിക്കുകയായിരുന്നുവെന്നു പൊലീസ് പറഞ്ഞു. ബസിൽനിന്നിറങ്ങി ഏജൻസി ഓഫിസിലെത്തിയ ഇവർ പൊലീസിനെ വിളിക്കാൻ ആവശ്യപ്പെടുകയും ചെയ്തു. ഇലക്ട്രോണിക് സിറ്റിയിൽ സ്വകാര്യ കമ്പനി ജീവനക്കാരനായ ഗ്ലാഡിസനെതിരെ വിവിധ വകുപ്പുകളനുസരിച്ചു കേസെടുത്തു.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക.
If you cannot read Malayalam,Download BengaluruVartha Android app from Google play store and Click On the News Reader Button.
