തിരുവനന്തപുരം: പ്രശസ്ത യുട്യൂബറും അവതാരകനുമായ കാർത്തിക് സൂര്യയ്ക്ക് കഴിഞ്ഞ ദിവസം നേരിടേണ്ടി വന്നത് പേടിപ്പെടുത്തുന്ന അനുഭവം. ഭക്ഷണം കഴിക്കുന്നതിനിടെ തുമ്മിയതിനെത്തുടർന്ന് അബോധാവസ്ഥയിലായതും മരണം മുന്നിൽ കണ്ട നിമിഷങ്ങളെ കുറിച്ചുമാണ് കാർത്തിക് തന്റെ പുതിയ വീഡിയോയിലൂടെ പങ്കുവെച്ചത്. ഭാര്യ വർഷയുടെ സമയോചിതമായ ഇടപെടലാണ് കാർത്തിക്കിന്റെ ജീവൻ രക്ഷിച്ചത്.
സംഭവിച്ചത് ഇങ്ങനെ
കഴിഞ്ഞ ദിവസം രാത്രി ഭക്ഷണം കഴിച്ചുകൊണ്ടിരിക്കെ കാർത്തിക് മൂന്ന് തവണ തുമ്മുകയായിരുന്നു. ആ സമയത്ത് ഭക്ഷണം വായിലുണ്ടായിരുന്നു. തുമ്മലിന് പിന്നാലെ വെള്ളം ചോദിച്ച കാർത്തിക് പെട്ടെന്ന് തന്നെ കുഴഞ്ഞുവീഴുകയായിരുന്നു.
“കണ്ണ് തുറന്നപ്പോൾ വർഷ എന്റെ മുതുകിൽ തടവി ഛർദ്ദിപ്പിക്കാൻ ശ്രമിക്കുന്നതാണ് കണ്ടത്. ഭക്ഷണം കഴിക്കുന്നതിനിടെ തുമ്മിയപ്പോൾ ഭക്ഷണാംശം ശ്വാസകോശത്തിൽ കുടുങ്ങുകയും ബ്രെയിനിലേക്കുള്ള ഓക്സിജൻ പ്രവാഹം തടസ്സപ്പെടുകയുമായിരുന്നു” – കാർത്തിക് പറഞ്ഞു.
രക്ഷകയായി വർഷ
കാർത്തിക് കുഴഞ്ഞുവീണതോടെ ഒട്ടും പരിഭ്രമിക്കാതെ വർഷ അയൽവാസികളെ വിളിച്ചുവരുത്തുകയും പ്രാഥമിക ശുശ്രൂഷകൾ നൽകുകയും ചെയ്തു. നെഞ്ചിൽ അമർത്തിയതോടെയാണ് കാർത്തിക് ഛർദ്ദിച്ചു തുടങ്ങിയത്. തുടർന്ന് വർഷ തന്നെ വണ്ടി ഓടിച്ച് കാർത്തിക്കിനെ ആശുപത്രിയിൽ എത്തിച്ചു. അബോധാവസ്ഥയിലായിരുന്ന കാർത്തിക് ആശുപത്രിയിലേക്കുള്ള യാത്രയിലുടനീളം ഛർദ്ദിച്ചിരുന്നു. ശ്വാസകോശത്തിൽ ഭക്ഷണാംശം കയറിയതാണ് നില വഷളാക്കിയത്.
ആരോഗ്യനില
ആശുപത്രിയിൽ എത്തിച്ച കാർത്തിക്കിനെ വിശദമായ പരിശോധനകൾക്ക് വിധേയനാക്കി. എക്സറേ, എക്കോ, ബ്ലഡ് ടെസ്റ്റ് എന്നിവ നടത്തി. ഛർദ്ദിച്ച് തൊണ്ട പൊട്ടി രക്തം വരുന്ന അവസ്ഥ വരെ ഉണ്ടായെന്നും ഇപ്പോൾ ആരോഗ്യനില മെച്ചപ്പെട്ടതായും താരം അറിയിച്ചു. വർഷയുടെ ധൈര്യത്തെയും പക്വതയോടെയുള്ള പെരുമാറ്റത്തെയും കാർത്തിക് അഭിനന്ദിച്ചു.
ഭക്ഷണം കഴിക്കുമ്പോൾ സംസാരിക്കുന്നത് ഒഴിവാക്കണമെന്നും സമാധാനമായി ഭക്ഷണം കഴിക്കണമെന്നും കാർത്തിക്കിന്റെ വീഡിയോയ്ക്ക് താഴെ ആരാധകർ കമന്റ് ചെയ്യുന്നുണ്ട്. കഴിഞ്ഞ വർഷമായിരുന്നു തിരുവനന്തപുരം സ്വദേശിയായ കാർത്തിക്കിന്റെയും വർഷയുടെയും വിവാഹം.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
