ബംഗളൂരു: കെ.ആർ പുരത്ത് ഓടിക്കൊണ്ടിരുന്ന സ്കൂൾ വാനിൽ നിന്ന് കുട്ടികൾ റോഡിലേക്ക് വീണ സംഭവത്തിൽ വാൻ ഡ്രൈവർക്കെതിരെ പോലീസ് കേസെടുത്തു. വ്യാഴാഴ്ച കെ.ആർ പുരത്തെ ഗായത്രി ലേഔട്ടിൽ വെച്ചുണ്ടായ അപകടത്തിന്റെ സിസിടിവി ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെയാണ് സംഭവം പുറംലോകമറിഞ്ഞത്.
സ്കൂൾ വാൻ മുന്നോട്ട് എടുക്കുന്നതിനിടെ പിൻവശത്തെ ഡോർ പെട്ടെന്ന് തുറന്നുപോകുകയും, വാനിലുണ്ടായിരുന്ന കുട്ടികൾ റോഡിലേക്ക് തെറിച്ചുവീഴുകയുമായിരുന്നു. വീഴ്ചയിൽ നാല് കുട്ടികൾക്ക് നിസ്സാരമായ പോറലുകൾ ഏറ്റതായി ട്രാഫിക് പോലീസ് അറിയിച്ചു.
സംഭവവുമായി ബന്ധപ്പെട്ട് സ്കൂൾ വാൻ പോലീസ് കസ്റ്റഡിയിലെടുത്തിട്ടുണ്ട്. ഡ്രൈവർക്കെതിരെ കെ.ആർ പുരം പോലീസ് സ്റ്റേഷനിൽ എഫ്.ഐ.ആർ രജിസ്റ്റർ ചെയ്ത് കേസ് എടുത്തതായും സംഭവത്തിൽ കൂടുതൽ അന്വേഷണം പുരോഗമിക്കുകയാണെന്നും മുതിർന്ന പോലീസ് ഉദ്യോഗസ്ഥർ വ്യക്തമാക്കി.
