കൊച്ചി: കൊടും കുറ്റവാളി റിപ്പര് ജയാനന്ദന് പരോൾ നൽകി ഹൈക്കോടതി. ജയാനന്ദന് മകളുടെ വിവാഹത്തില് പങ്കെടുക്കാന് വേണ്ടി ഭാര്യ നല്കിയ ഹര്ജിയിലാണ് ഹൈക്കോടതിയുടെ നടപടി. കഴിഞ്ഞ പതിനേഴിനാണ് മകളുടെ വിവാഹത്തിന് പതിനഞ്ച് ദിവസത്തെ പരോള് അനുവദിക്കണമെന്നാവശ്യപ്പെട്ട് ഭാര്യ ഇന്ദിര ഹൈക്കോടതിയെ സമീപിച്ചത്.
നിലവില് ഇപ്പോൾ തൃശൂര് വിയ്യൂര് ജയിലിൽ കൊടുംകുറ്റവാളികളുടെ സെല്ലിലാണ് റിപ്പര് ജയാനന്ദന് കഴിയുന്നത്. ജയാനന്ദന്റെ പരോളിനെ സര്ക്കാര് എതിർത്തിരുന്നു. അഭിഭാഷകയായ ജയാനന്ദന്റെ മകൾ തന്നെയാണ് അമ്മയ്ക്ക് വേണ്ടി കോടതിയില് ഹാജരായത്.
അഭിഭാഷക എന്ന നിലയില് അല്ല മകള് എന്ന നിലയില് തന്റെ കല്യാണത്തില് പങ്കെടുക്കാന് അച്ഛന് ഒരു ദിവസത്തെ പരോള് അനുമതി നല്കുന്ന കാര്യം പരിഗണിക്കണമെന്ന് കീര്ത്തി ജയാനന്ദന് കോടതിയോട് ആവശ്യപ്പെട്ടു. തുടര്ന്ന് ഉപാധികളോടെ ഹൈക്കോടതി പരോള് അനുവദിക്കുകയായിരുന്നു.
ജയാനന്ദന് തലേദിവസം പൊലീസ് സംരക്ഷണത്തില് വിവാഹത്തിനായി വീട്ടില് എത്താം. തുടർന്ന് പിറ്റേദിവസം നടക്കുന്ന വിവാഹത്തില്
ജയാനന്ദന് രാവിലെ 9 മണി മുതല് വൈകീട്ട് അഞ്ച് മണിവരെ വീട്ടില് തുടരാമെന്നും കോടതി അറിയിച്ചു. തിരികെ ജയാനന്ദന് ജയിലിലേക്ക് മടങ്ങുമെന്ന് മകളും ഭാര്യയും തൃശൂര് ജില്ലാ കോടതിയില് സത്യവാങ്മൂലം നല്കണണമെന്നും കോടതി അറിയിച്ചു.
