ന്യൂഡൽഹി: പ്രസവാവധിക്ക് ശേഷം കായികരംഗത്തേക്ക് മടങ്ങിവരുന്ന പ്രശസ്ത ഗുസ്തി താരം വിനേഷ് ഫോഗട്ടിന് ആഭ്യന്തര മത്സരങ്ങളിൽ പങ്കെടുക്കാൻ യോഗ്യതയില്ലെന്ന് പ്രഖ്യാപിച്ച റസ്ലിംഗ് ഫെഡറേഷൻ ഓഫ് ഇന്ത്യയുടെ (ഡബ്ല്യുഎഫ്ഐ) നടപടിയെ ഡൽഹി ഹൈക്കോടതി രൂക്ഷമായി വിമർശിച്ചു. വരാനിരിക്കുന്ന ഏഷ്യൻ ഗെയിംസ് സെലക്ഷൻ ട്രയൽസിൽ ഫോഗട്ടിന് പങ്കെടുക്കാനുള്ള അവസരം ഉറപ്പാക്കണമെന്ന് കോടതി കേന്ദ്ര സർക്കാരിനോട് ആവശ്യപ്പെട്ടു. മാതൃത്വത്തെ ആഘോഷിക്കുന്ന ഒരു രാജ്യത്ത് ഫെഡറേഷൻ കായികതാരങ്ങളോട് ‘പ്രതികാര ബുദ്ധിയോടെ’ പെരുമാറരുതെന്ന് ഹൈക്കോടതിയുടെ ഡിവിഷൻ ബെഞ്ച് ഊന്നിപ്പറഞ്ഞു.
മുൻകാല സെലക്ഷൻ മാനദണ്ഡങ്ങളിൽ നിന്ന് ഫെഡറേഷൻ പെട്ടെന്ന് വ്യതിയാനം വരുത്തിയതിനെ കോടതി ശക്തമായി ചോദ്യം ചെയ്തു. പ്രശസ്തരായ കായികതാരങ്ങൾക്ക് മത്സരങ്ങളിൽ പങ്കെടുക്കാൻ മുൻപ് അനുമതി നൽകിയിരുന്ന രീതിയിൽ നിന്ന് ഫെഡറേഷൻ വ്യതിചലിച്ചത് പല ദുരൂഹതകളും വിളിച്ചോതുന്നുണ്ടെന്ന് കോടതി നിരീക്ഷിച്ചു. 2025 ജൂലൈയിൽ അമ്മയായ വിനേഷ് ഫോഗട്ടിനെ മാത്രം ലക്ഷ്യം വെച്ചാണ് ഡബ്ല്യുഎഫ്ഐ പെട്ടെന്ന് സെലക്ഷൻ മാനദണ്ഡങ്ങൾ മാറ്റിയെഴുതിയതെന്ന് എന്തുകൊണ്ട് അനുമാനിച്ചു കൂടാ എന്നും കോടതി ചോദിച്ചു. വ്യക്തിപരമായ തർക്കങ്ങളുടെ പേരിൽ കായികരംഗം എന്തിന് കഷ്ടപ്പെടണമെന്നും മാതൃത്വം ഒരാളുടെ കരിയറിന് ദോഷകരമായി ഭവിക്കണമോ എന്നും കോടതി ആരാഞ്ഞു.
പാരീസ് ഒളിംപിക്സിനിടെ അച്ചടക്കലംഘനം നടത്തി, ആന്റി ഡോപ്പിങ് ചട്ടങ്ങൾ ലംഘിച്ചു, ഇന്ത്യൻ ഗുസ്തിയുടെ അന്തസ്സിന് കളങ്കമുണ്ടാക്കി എന്നീ ആരോപണങ്ങൾ ഉന്നയിച്ച് മെയ് 9-നാണ് വിനേഷ് ഫോഗട്ടിന് ഡബ്ല്യുഎഫ്ഐ 15 പേജുള്ള കാരണം കാണിക്കൽ നോട്ടീസ് അയച്ചത്. ഗോണ്ടയിൽ നടക്കുന്ന ആഭ്യന്തര മത്സരത്തിൽ പങ്കെടുക്കുന്നതിന് തൊട്ടുമുമ്പത്തെ ദിവസമായിരുന്നു ഈ നടപടി. ഒളിംപിക്സിലെ ഫോഗട്ടിന്റെ അയോഗ്യത ‘ദേശീയ നാണക്കേടാണ്’ എന്ന് വിശേഷിപ്പിച്ച കാരണം കാണിക്കൽ നോട്ടീസിനെതിരെ കോടതി കടുത്ത അതൃപ്തി രേഖപ്പെടുത്തി. താരത്തെ മത്സരങ്ങളിൽ നിന്ന് പുറത്താക്കാൻ വേണ്ടി ആരോ ബോധപൂർവ്വം ശ്രമിക്കുകയാണെന്ന് ഫോഗട്ടിന്റെ അഭിഭാഷകൻ കോടതിയിൽ വാദിച്ചു.
ഫെഡറേഷന്റെ അന്നത്തെ പ്രസിഡന്റായിരുന്ന ബ്രിജ് ഭൂഷൺ ശരൺ സിങ്ങിനെതിരെ ലൈംഗികാരോപണം ഉന്നയിച്ച് 2023-ൽ നടന്ന പ്രതിഷേധങ്ങൾക്ക് നേതൃത്വം നൽകിയവരിൽ മുൻപന്തിയിൽ ഫോഗട്ടുമുണ്ടായിരുന്നു. വിരമിക്കലിൽ നിന്ന് മടങ്ങിവരുന്ന കായികതാരങ്ങൾ ആന്റി ഡോപ്പിംഗ് ചട്ടങ്ങൾ പ്രകാരം ആറ് മാസം മുമ്പ് നോട്ടീസ് നൽകണമെന്ന നിയമം ചൂണ്ടിക്കാട്ടിയാണ് ജൂൺ 26 വരെ ആഭ്യന്തര മത്സരങ്ങളിൽ പങ്കെടുക്കുന്നതിൽ നിന്ന് ഫെഡറേഷൻ താരത്തിന് വിലക്കേർപ്പെടുത്തിയത്.
എന്നാൽ പ്രസവത്തെത്തുടർന്നും അതിന്റെ വിശ്രമകാലയളവിലും തനിക്ക് മത്സരങ്ങൾ നഷ്ടമായിരുന്നു. ഇത് പരിഗണിക്കാതെ മെയ് 30, 31 തീയതികളിൽ നടക്കുന്ന ഏഷ്യൻ ഗെയിംസ് ട്രയൽസിൽ പങ്കെടുക്കാൻ അടുത്തിടെ ആഭ്യന്തര മെഡലുകൾ നേടിയവർക്ക് മാത്രമേ അർഹതയുള്ളൂ എന്ന രീതിയിൽ ഡബ്ല്യുഎഫ്ഐ മാനദണ്ഡങ്ങൾ മാറ്റിയെഴുതിയെന്ന് ചൂണ്ടിക്കാട്ടിയാണ് ഫോഗട്ട് കോടതിയെ സമീപിച്ചത്. ഫെഡറേഷന്റെ വിലക്ക് നിലനിൽക്കെത്തന്നെ ഫോഗട്ട് ഗോണ്ടയിൽ നടന്ന നാഷണൽ ഓപ്പൺ റാങ്കിംഗ് ടൂർണമെന്റിൽ പങ്കെടുത്തിരുന്നു.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
