തിരുവനന്തപുരം: കേരളത്തിന്റെ അടുത്ത മുഖ്യമന്ത്രിയെ തീരുമാനിക്കാൻ കോൺഗ്രസ് ഹൈക്കമാൻഡ് നിരീക്ഷകർ എംഎൽഎമാരുമായി നടത്തിയ കൂടിക്കാഴ്ചയുടെ നിർണ്ണായക വിവരങ്ങൾ പുറത്ത്. നിലവിലെ കണക്കുകൾ പ്രകാരം എഐസിസി ജനറൽ സെക്രട്ടറി കെ.സി. വേണുഗോപാലിനാണ് ഭൂരിഭാഗം എംഎൽഎമാരുടെയും പിന്തുണയെന്ന് ‘ദി ന്യൂ ഇന്ത്യൻ എക്സ്പ്രസ്’ റിപ്പോർട്ട് ചെയ്യുന്നു. 63 കോൺഗ്രസ് എംഎൽഎമാരിൽ 47 പേരും വേണുഗോപാലിനെ അനുകൂലിച്ചതായാണ് വിവരം.
കെപിസിസി പ്രസിഡന്റ് സണ്ണി ജോസഫ്, എംഎൽഎമാരായ സന്ദീപ് വാര്യർ, സജീവ് ജോസഫ്, ടി.ഒ. മോഹൻ, ഉഷ വിജയൻ തുടങ്ങിയവർ വേണുഗോപാലിനെ പിന്തുണച്ചവരുടെ പട്ടികയിലുണ്ട്. രമേശ് ചെന്നിത്തലയുടെ അടുത്ത അനുയായിയായി അറിയപ്പെടുന്ന ഐ.സി. ബാലകൃഷ്ണൻ, മുഖ്യമന്ത്രി സ്ഥാനത്തേക്ക് കെ.സി. വേണുഗോപാൽ അല്ലെങ്കിൽ ചെന്നിത്തല എന്ന നിർദ്ദേശം മുന്നോട്ടുവെച്ചത് രാഷ്ട്രീയ വൃത്തങ്ങളിൽ ചർച്ചയായിട്ടുണ്ട്. ഇത് ചെന്നിത്തലയ്ക്ക് തിരിച്ചടിയായതായാണ് വിലയിരുത്തൽ.
മറ്റ് നേതാക്കൾക്കുള്ള പിന്തുണ:
രമേശ് ചെന്നിത്തല: 8 എംഎൽഎമാർ.
വി.ഡി. സതീശൻ: 6 എംഎൽഎമാർ.
മൂന്ന് മുൻ കെപിസിസി അധ്യക്ഷന്മാർ വി.ഡി. സതീശനെ പിന്തുണച്ചപ്പോൾ, മുതിർന്ന നേതാക്കളിൽ പലരും വേണുഗോപാലിനൊപ്പമാണ് നിലകൊണ്ടത്. നിരീക്ഷകരുമായുള്ള കൂടിക്കാഴ്ചയിൽ സതീശനും ചെന്നിത്തലയും നേരിട്ടെത്തി നിലപാടുകൾ വിശദീകരിച്ചപ്പോൾ കെ.സി. വേണുഗോപാൽ വിട്ടുനിന്നു.
എഐസിസി നിരീക്ഷകരായ അജയ് മാക്കനും മുകുൾ വാസ്നിക്കും എംഎൽഎമാർക്ക് പുറമെ എംപിമാരുമായും മറ്റ് മുതിർന്ന നേതാക്കളുമായും ചർച്ചകൾ പൂർത്തിയാക്കി ഡൽഹിക്ക് മടങ്ങി. ഇവർ സമർപ്പിക്കുന്ന റിപ്പോർട്ടിന്റെ അടിസ്ഥാനത്തിൽ പാർട്ടി അധ്യക്ഷൻ മല്ലികാർജുൻ ഖാർഗെ അന്തിമ തീരുമാനമെടുക്കും. ഈ ആഴ്ച അവസാനത്തോടെ കേരളത്തിന്റെ പുതിയ മുഖ്യമന്ത്രിയെ പ്രഖ്യാപിക്കുമെന്നാണ് സൂചന. ആവശ്യമാണെങ്കിൽ വി.ഡി. സതീശൻ, രമേശ് ചെന്നിത്തല, സണ്ണി ജോസഫ് എന്നിവരെ ഹൈക്കമാൻഡ് ഡൽഹിക്ക് ചർച്ചയ്ക്കായി വിളിച്ചേക്കും.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
