ബെംഗളൂരു വിമാനത്താവളത്തിൽ ടാക്സി ലഭിക്കാൻ മണിക്കൂറുകളോളം കാത്തുനിൽക്കേണ്ടി വരുന്നു. യാത്രക്കാർ സോഷ്യൽ മീഡിയയിൽ പങ്കുവെച്ച ദൃശ്യങ്ങൾ വലിയ ചർച്ചയായി. കഴിഞ്ഞ കുറച്ച് മാസങ്ങളായി ഈ പ്രശ്നം രൂക്ഷമായിരിക്കുകയാണ്. ഇത് യാത്രക്കാരുടെ സമയം നഷ്ടപ്പെടുത്തുന്നു.
ബെംഗളൂരു: ഒരു ടാക്സി കിട്ടണമെങ്കിൽ മണിക്കൂറുകളോളം കാത്തുനിൽക്കണം. ഏതെങ്കിലും ചെറുപട്ടണത്തിലെ കഥയല്ല പറയുന്നത്. ബെംഗളൂരു അന്താരാഷ്ട്ര വിമാനത്താവളത്തിന്റെ കഥയാണ്. ചുരുങ്ങിയത് രണ്ട് മണിക്കൂറെങ്കിലും ക്യൂവിൽ കാത്തു നിന്നാലാണ് ഒരു ടാക്സി ലഭിക്കുക. ഏറെ നാളായി തുടരുന്ന ഈ ദുരിതത്തിന് ഇതുവരെയും ഒരു അറുതിയായില്ല.
ബെംഗളൂരു വിമാനത്താവളത്തിലെ യൂബർ പിക്കപ്പ് പോയിന്റിൽ നീണ്ട ക്യൂ ആണ് ദിസവും. കഴിഞ്ഞ ദിവസം ഈ ക്യൂവിന്റെ ദൃശ്യങ്ങൾ ദിശ സെയ്നി എന്ന യാത്രക്കാരി സോഷ്യൽ മീഡിയയിൽ പങ്കുവെച്ചതോടെ വലിയ ചര്ച്ചയാണ് വിഷയത്തിൽ ഉരുത്തിരിഞ്ഞു വന്നത്.
വീഡിയോ വൻതോതിൽ വൈറലായി മാറി. രാത്രി വൈകിയെത്തിയ തനിക്ക് ടാക്സി ലഭിക്കാൻ രണ്ടുമണിക്കൂറിലധികം കാത്തുനിൽക്കേണ്ടി വന്നുവെന്ന് അവർ പറഞ്ഞു. ഈ പ്രശ്നം കഴിഞ്ഞ കുറച്ച് മാസങ്ങളായി രൂക്ഷമായിരിക്കുകയാണെന്ന് പല യാത്രക്കാരും സാമൂഹ്യമാധ്യമങ്ങളിൽ പങ്കുവെക്കുന്നു.
കഴിഞ്ഞ എട്ട് മാസത്തോളമായി ഇങ്ങനെയാണ് സ്ഥിതിയെന്ന് മറ്റൊരു ഉപയോക്താവ് പറയുന്നു. അതിനുമുമ്പ് ഏത് സമയത്തും – പകലായാലും രാത്രിയായാലും – ടാക്സികൾ എളുപ്പത്തിൽ ലഭ്യമായിരുന്നു. ഇപ്പോൾ ടെർമിനൽ ഒന്നിലും രണ്ടിലും ഓല, യൂബർ, എയർപോർട്ട്, റാപ്പിഡോ ടാക്സികൾക്ക് വലിയ ക്ഷാമമുണ്ട്,” മറ്റൊരാൾ പറഞ്ഞു.
സമയം ലാഭിക്കാൻ ഫ്ലൈറ്റ് പിടിച്ച് ബെംഗളൂരുവിൽ വന്നിറങ്ങുന്നവർക്ക് ആ ലാഭം നഷ്ടമായി മാറുന്നത് കാണാമെന്നാണ് ദിശ പറയുന്നത്. “രാത്രി ബാംഗ്ലൂരിൽ ഇറങ്ങിയത് സമയം ലാഭിക്കാനാണ്. വിമാനത്താവളത്തിലെ ഊബർ പിക്കപ്പ് പോയിന്റിലെ സ്ഥിതി ഇതായിരുന്നു.
ഇവിടെ രണ്ടുമണിക്കൂറിലധികം കാത്തുനിൽക്കേണ്ടി വന്നു,” ദിശ സെയ്നി എക്സിൽ കുറിച്ചു. ഈ വീഡിയോ അതിവേഗം പ്രചരിക്കുകയും 2,500-ലധികം ലൈക്കുകൾ നേടുകയും ചെയ്തു. നിരവധി സ്ഥിരം യാത്രക്കാർ സമാനമായ അനുഭവങ്ങൾ പങ്കുവെച്ചു. ഈ സ്ഥിതി കഴിഞ്ഞ കുറച്ച് മാസങ്ങളായി വഷളായിട്ടുണ്ടെന്നാണ് യാത്രക്കാർ പറയുന്നത്.
