ബെംഗളൂരു: ‘ഇന്ത്യയിലെ ധവളവിപ്ലവത്തിന്റെ പിതാവ്’ ഡോ.വർഗീസ് കുര്യന്റെ 101-ാം ജന്മവാർഷികത്തോടനുബന്ധിച്ച് നവംബർ 26-ന് ബെംഗളൂരുവിൽ മൃഗസംരക്ഷണ-ക്ഷീരവികസന വകുപ്പ് ‘ദേശീയ ക്ഷീരദിനം’ ആചരിക്കും. ആസാദി കാ അമൃത് മഹോത്സവ’ത്തിന്റെ ഭാഗമായാണ് ഈ പരിപാടി സംഘടിപ്പിക്കുന്നതെന്ന് മൃഗസംരക്ഷണ മന്ത്രാലയത്തിന്റെ പ്രസ്താവനയിൽ പറയുന്നു.
2022ലെ ദേശീയ ഗോപാൽ രത്‌ന അവാർഡുകളും ചടങ്ങിൽ സമ്മാനിക്കും. ബെംഗളൂരുവിലെ ഹെസറഘട്ടയിൽ ആഘോഷങ്ങളുടെ ഭാഗമായി ഫിഷറീസ്, മൃഗസംരക്ഷണം, ക്ഷീരവികസന വകുപ്പ് സഹമന്ത്രി സഞ്ജീവ് കുമാർ ബല്യാൻ ആനിമൽ ക്വാറന്റൈൻ സർട്ടിഫിക്കേഷൻ സേവനങ്ങളുടെ (എക്യുസിഎസ്) ഉദ്ഘാടനം ചെയ്യും.
കന്നുകാലി ഉൽപന്നങ്ങളുടെയും കന്നുകാലികളുടെയും ഇറക്കുമതിക്കായി യഥാസമയം ഓൺലൈൻ ക്ലിയറൻസ് സംവിധാനം എ ക്ക്യൂ സി എസ് സജ്ജീകരിക്കുമെന്നും പ്രാദേശിക സമ്പദ്‌വ്യവസ്ഥയെ മാറ്റിമറിക്കുമെന്നും മൃഗസംരക്ഷണ, ഡയറി വകുപ്പ് പ്രസ്താവനയിൽ പറഞ്ഞു. ഹെസാരഘട്ടയിലെ സെൻട്രൽ ഫ്രോസൺ സെമൻ പ്രൊഡക്ഷൻ ആൻഡ് ട്രെയിനിംഗ് ഇൻസ്റ്റിറ്റ്യൂട്ടിൽ വിപുലമായ പരിശീലന സൗകര്യത്തിനും ഹെസറഘട്ടയിലെ സെൻട്രൽ കന്നുകാലി വളർത്തൽ ഫാമിൽ കർണാടക ബോവിൻ ഐവിഎഫ് (ഇൻവിട്രോ ഫെർട്ടിലൈസേഷൻ) പ്രവർത്തനങ്ങൾക്കും ബല്യാൻ തറക്കല്ലിടും.
കേന്ദ്രവും കർണാടക സർക്കാരും ദേശീയ ക്ഷീരവികസന ബോർഡും കർണാടക മിൽക്ക് ഫെഡറേഷനും സംയുക്തമായി സംഘടിപ്പിക്കുന്ന ചടങ്ങിൽ വർഗീസ് കുര്യന്റെ ജീവിതത്തെക്കുറിച്ചുള്ള പുസ്തകവും പാലിൽ മായം ചേർക്കൽ സംബന്ധിച്ച ലഘുലേഖയും പ്രകാശനം ചെയ്യും.
കർണാടക മൃഗസംരക്ഷണ മന്ത്രി പ്രഭു ബി ചൗഹാൻ, കെഎംഎഫ് ചെയർമാൻ ബാലചന്ദ്ര എൽ ജാർക്കിഹോളി, മുതിർന്ന കേന്ദ്ര-സംസ്ഥാന സർക്കാർ ഉദ്യോഗസ്ഥർ എന്നിവർ ചടങ്ങിൽ പങ്കെടുക്കും.
