Day: 28 August 2017

ബെംഗളൂരു ∙ അടുക്കളത്തോട്ടം വ്യാപകമാക്കാനുള്ള പ്രചാരണവുമായി ഊട്ട ഫ്രം തോട്ട പ്രദർശനം ശ്രദ്ധേയമായി. വീടുകളുടെയും ഫ്ലാറ്റുകളുടെയും മട്ടുപ്പാവിലോ ബാൽക്കണിയിലോ വിഷരഹിതമായ പച്ചക്കറിത്തോട്ടം ഒരുക്കാനുള്ള മാർഗങ്ങളാണു ലോക കിച്ചൻ ഗാർഡൻ ദിനത്തോടനുബന്ധിച്ചു ഗാർഡൻ സിറ്റി ഫാർമേഴ്സ് കൂട്ടായ്മ സംഘടിപ്പിച്ച പ്രദർശനത്തിൽ ചർച്ച ചെയ്തത്. വീടുകളിലേക്കു വേണ്ട പച്ചക്കറികൾ കൃഷിചെയ്യാനുള്ള നൂതനമാർഗങ്ങൾ വിശദമാക്കുന്ന വിവിധ മാതൃകകളും പ്രദർശനത്തിൽ ഒരുക്കിയിരുന്നു. പ്രദർശന ഉദ്ഘാടനം ആദ്യമ ചേതന ഫൗണ്ടേഷൻ സ്ഥാപക തേജസ്വിനി അനന്ത്കുമാർ, നടി താര അനുരാധ എംഎൽസി എന്നിവർ ചേർന്നു നിർവഹിച്ചു.

ബെംഗളൂരു : കേരള സമാജത്തിന്റെ നേതൃത്വത്തിൽ സംഘടിപ്പിച്ച കർണാടക യൂത്ത് ഫെസ്റ്റിവൽ സമാപിച്ചു. സബ് ജൂനിയർ വിഭാഗത്തിൽ അഞ്ജന പ്രസാദ് കലാതിലകമായി. വിജയികൾക്ക് സെപ്റ്റംബർ 17നു സമാജം കന്റോൺമെന്റ് സോണിന്റെ ഓണാഘോഷ ചടങ്ങിൽ സമ്മാനങ്ങൾ വിതരണം ചെയ്യും. സമാപന സമ്മേളനത്തിന് സമാജം പ്രസിഡന്റ് സി.പി.രാധാകൃഷ്ണൻ, വൈസ് പ്രസിഡന്റ് പി.വിക്രമൻ പിള്ള, ജനറൽ സെക്രട്ടറി റജികുമാർ, കെഎൻഇ ട്രസ്റ്റ് പ്രസിഡന്റ് പി.ദിവാകരൻ, പി.കെ.മുകുന്ദൻ എന്നിവർ നേതൃത്വം നൽകി.

ബെംഗളൂരു ∙ ഉപയോഗശൂന്യമായ ചെരിപ്പുകളും ഷൂസുകളും പുനരുപയോഗപ്പെടുത്താനുള്ള പദ്ധതിക്ക് വൈസ്മെൻ ബാംഗ്ലൂർ ഡിസ്ട്രിക്ട് ക്ലബ് രണ്ട് തുടക്കം കുറിച്ചു. വിവിധ സ്ഥാപനങ്ങളിൽ നിന്നും അപ്പാർട്മെന്റുകളിൽനിന്നും പഴയ ചെരിപ്പുകളും ഷൂസുകളും ശേഖരിച്ച് റീസൈക്കിൾ ചെയ്ത് പുതിയ ചെരിപ്പുകളും ഷൂസുകളും നിർമിച്ച് പാവപ്പെട്ടവർക്ക് സൗജന്യമായി നൽകുകയാണ് പദ്ധതിയുടെ ലക്ഷ്യമെന്ന് ഡിസ്ട്രിക്ട് ഗവർണർ ഏബ്രഹാം ചാക്കോയും സെക്രട്ടറി ജോണി ജോണും പറഞ്ഞു. മുംബൈയിലെ ഗ്രീൻസോൾ എന്ന സംഘടനയുമായി ചേർന്നാണ് പദ്ധതി നടപ്പിലാക്കുന്നത്.