ബെംഗളൂരു: കർണാടക ഉപമുഖ്യമന്ത്രി ഡി.കെ. ശിവകുമാറിന് ജീവിതത്തിലെ ഏറ്റവും സന്തോഷകരവും അവിസ്മരണീയവുമായ ‘സ്ഥാനക്കയറ്റം’ ലഭിച്ചു. രാഷ്ട്രീയ പദവികൾക്കപ്പുറം വൈകാരികമായ ഒന്നാണ് ഈ പുതിയ മാറ്റം. ഡി.കെ. ശിവകുമാർ ഇനി മുത്തച്ഛൻ എന്ന പദവിയിൽ അറിയപ്പെടും.
അദ്ദേഹത്തിന്റെ മകൾ ഐശ്വര്യ ഒരു പെൺകുഞ്ഞിന് ജന്മം നൽകിയതോടെയാണിത്. കർണാടക മുൻ മുഖ്യമന്ത്രി എസ്.എം. കൃഷ്ണയുടെ കൊച്ചു മകനും ഐശ്വര്യയുടെ ഭർത്താവുമായ അമർത്യ ഹെഗ്ഡെയാണ് അച്ഛനായത്.
മുതിർന്ന രാഷ്ട്രീയ നേതാവ് എസ്.എം. കൃഷ്ണയുടെ ജന്മദിനത്തിലും ബുദ്ധപൂർണ്ണിമ ദിനത്തിലും തന്നെ കുഞ്ഞ് ജനിച്ചു എന്നത് ഈ സന്തോഷത്തിന് ഇരട്ടി മധുരം നൽകുന്നു. മുൻ മുഖ്യമന്ത്രി എസ്.എം. കൃഷ്ണയ്ക്ക് കൊച്ചുമകളുടെ മകൾ എന്ന നിലയിലും ഡി.കെ. ശിവകുമാറിന് ആദ്യ കൊച്ചുമകൾ എന്ന നിലയിലും ഈ പെൺകുഞ്ഞ് കുടുംബത്തിലേക്ക് വലിയ ഐശ്വര്യമാണ് കൊണ്ടുവന്നിരിക്കുന്നത്.
പുതിയ വിശേഷത്തെക്കുറിച്ച് മാധ്യമങ്ങൾ ചോദിച്ചപ്പോൾ അതീവ സന്തോഷത്തോടെയും പുഞ്ചിരിയോടെയുമാണ് ശിവകുമാർ പ്രതികരിച്ചത്. രാഷ്ട്രീയ തിരക്കുകൾക്കിടയിലും കുടുംബത്തിലെ ഈ പുതിയ അതിഥിയുടെ വരവ് ഡി.കെ.എസ് കുടുംബത്തിൽ വലിയ ആഘോഷമായി മാറിയിരിക്കുകയാണ്.
