ബെംഗളൂരു: ജോലി രാജിവെക്കുമ്പോൾ സഹപ്രവർത്തകർക്ക് അയക്കുന്ന യാത്രയയപ്പ് ഇമെയിലുകൾ സാധാരണഗതിയിൽ നന്ദിവാക്കുകൾ കൊണ്ടോ വൈകാരികമായ വരികൾ കൊണ്ടോ ആണ് നിറയാറുള്ളത്. എന്നാൽ ബെംഗളൂരുവിലെ ഇൻഫോസിസ് ഓഫീസിൽ നിന്ന് പടിയിറങ്ങിയ ഒരു യുവാവ് തിരഞ്ഞെടുത്തത് തികച്ചും വ്യത്യസ്തമായ വഴിയാണ്. വാക്കുകൾക്ക് പകരം രസകരമായ ‘മീമുകൾ’ (Memes) ഉൾപ്പെടുത്തിക്കൊണ്ട് അയാൾ അയച്ച ഇമെയിൽ ഇപ്പോൾ സമൂഹമാധ്യമങ്ങളിൽ ചിരി പടർത്തുകയാണ്.
“ഹായ് ടീം, ഇൻഫോസിസിലെ എന്റെ യാത്ര ഇന്ന് അവസാനിക്കുകയാണ്. വാക്കുകൾ ഉപയോഗിക്കുന്നതിൽ ഞാൻ അത്ര മിടുക്കനല്ലാത്തതിനാൽ, നന്ദി പറയാൻ ഞാൻ ഈ വഴി തിരഞ്ഞെടുക്കുന്നു” എന്ന ആമുഖത്തോടെയാണ് ഇമെയിൽ ആരംഭിക്കുന്നത്. തൊട്ടുപിന്നാലെ, “തയ്യാറായിരുന്നോളൂ, ഒരു ഫെയർവെൽ ഇമെയിൽ വരുന്നുണ്ട്” എന്ന തലക്കെട്ടോടെയുള്ള ആദ്യ മീം പ്രത്യക്ഷപ്പെട്ടു. തനിക്ക് പ്രസംഗിക്കാൻ വലിയ താല്പര്യമില്ലാത്തതുകൊണ്ടാണ് മീമുകൾ ഉപയോഗിക്കുന്നതെന്ന് വ്യക്തമാക്കുന്ന മറ്റൊരു ചിത്രവും ഇതിനൊപ്പം ഉണ്ടായിരുന്നു.
ഇമെയിൽ അയച്ച യുവാവിന്റെ സഹപ്രവർത്തകയായ ഭവിഷ ഭാട്ടിയ ഇൻസ്റ്റാഗ്രാമിലൂടെ ഈ ഇമെയിലിന്റെ ദൃശ്യങ്ങൾ പങ്കുവെച്ചതോടെയാണ് സംഭവം പുറംലോകമറിഞ്ഞത്. ഇമെയിലിന് സഹപ്രവർത്തകർ നൽകിയ മറുപടികളും മീമുകൾ കൊണ്ട് തന്നെയായിരുന്നു എന്നതാണ് രസകരമായ മറ്റൊരു കാര്യം. “ഇത് കൊള്ളാം ഗുരു” എന്നർത്ഥം വരുന്ന ‘യേ ബടിയാ താ ഗുരു’ എന്ന മീം ഉപയോഗിച്ചാണ് ഭവിഷ മറുപടി നൽകിയത്.
മറ്റ് സഹപ്രവർത്തകരും ഈ തമാശയിൽ പങ്കുചേർന്നു. ‘ദിൽവാലെ ദുൽഹനിയ ലേ ജായേംഗേ’ എന്ന ചിത്രത്തിലെ പ്രശസ്തമായ ‘ജാ സിമ്രാൻ ജാ’ എന്ന മീം അയച്ചുകൊണ്ട് ഒരാൾ യാത്രയാശംസകൾ നേർന്നപ്പോൾ, മറ്റൊരാൾ അനിൽ കപൂറിന്റെ മീം ഉപയോഗിച്ച് “നിങ്ങളും കൂടെ പോരൂ” എന്നാണ് മറുപടി നൽകിയത്. മാനേജറെ സിസി (CC) ലിസ്റ്റിൽ നിന്ന് ഒഴിവാക്കി കൊണ്ട് അയച്ച ഈ മറുപടികൾക്ക് വലിയ പ്രതികരണമാണ് സമൂഹമാധ്യമങ്ങളിൽ ലഭിക്കുന്നത്.
ഇത്തരമൊരു രസകരമായ തൊഴിൽ സംസ്കാരം ആഗ്രഹിക്കുന്നുവെന്നും, സാധാരണ വിരസമായ യാത്രയയപ്പുകളേക്കാൾ എത്രയോ മികച്ചതാണിതെന്നുമാണ് ഭൂരിഭാഗം പേരുടെയും അഭിപ്രായം. നിരവധി ഐടി ജീവനക്കാർ തങ്ങളും ഇത്തരത്തിൽ വ്യത്യസ്തമായ രീതിയിൽ വിരമിക്കാൻ ആഗ്രഹിക്കുന്നുവെന്ന് കമന്റുകളിൽ കുറിച്ചു. ഇതിനോടകം ലക്ഷക്കണക്കിന് ആളുകളാണ് ഈ വീഡിയോ കണ്ടത്.
