Month: March 2023

ബെംഗളൂരു: പത്താം ക്ലാസ് പരീക്ഷയെഴുതുന്ന വിദ്യാർഥികൾക്ക് ബി.എം.ടി.സി. ബസുകളിൽ സൗജന്യയാത്ര. മാർച്ച് 31 മുതൽ ഏപ്രിൽ 15 വരെയാണ് പത്താംക്ലാസ് പരീക്ഷ നടക്കുന്നത്. പരീക്ഷാകേന്ദ്രങ്ങളായ മുഴുവൻ സ്കൂളുകളിലും ബസുകൾക്ക് സ്റ്റോപ്പും അനുവദിച്ചു. യാത്രാസൗജന്യം ലഭിക്കാൻ ഹാൾ ടിക്കറ്റ് കണ്ടക്ടറെ കാണിക്കണം. വിദ്യാർഥികൾ ആവശ്യപ്പെട്ടാൽ ബസ് സൗകര്യം കുറഞ്ഞ റൂട്ടുകളിൽ പ്രത്യേക സർവീസ് നടത്തുമെന്നും ബി.എം.ടി.സി. അധികൃതർ അറിയിച്ചു.

ബെംഗളൂരു: ഈസ്റ്റർ അവധിയോടനുബന്ധിച്ച് കൂടുതൽ പ്രത്യേക ബസുകളുമായി കേരള ആർ.ടി.സി. യാത്രത്തിരക്ക് കൂടുതലുള്ള ഏപ്രിൽ അഞ്ചിനു ഏഴ്‌ പ്രത്യേക സർവീസുകൾ പ്രഖ്യാപിച്ചു. നേരത്തേ ഏപ്രിൽ രണ്ടുമുതൽ എട്ടുവരെ പത്ത്‌ പ്രത്യേക ബസുകൾ പ്രഖ്യാപിച്ചിരുന്നു. പ്രത്യേക ബസുകൾ: ബെംഗളൂരു-കണ്ണൂർ (രാത്രി 9.32, സൂപ്പർ എക്സ്‌പ്രസ്). ബെംഗളൂരു-കോഴിക്കോട് (രാത്രി 10.11, സൂപ്പർ എക്സ്‌പ്രസ്) ബെംഗളൂരു-തൃശ്ശൂർ (രാത്രി 7.14, സൂപ്പർ ഡീലക്സ്) ബെംഗളൂരു-എറണാകുളം (വൈകീട്ട് 6.47, സൂപ്പർ ഡീലക്സ്, രാത്രി 8.15-സൂപ്പർ ഡീലക്സ്, രാത്രി 10.15-സൂപ്പർ ഡീലക്സ്) ബെംഗളൂരു-കോട്ടയം (വൈകീട്ട് 6.11, സൂപ്പർ ഡീലക്സ്).  

ബെംഗളൂരു: ക്രിമിനൽ ഇൻവെസ്റ്റിഗേഷൻ ഡിപ്പാർട്ട്‌മെന്റ് (സിഐഡി) പോലീസ് സൂപ്രണ്ട് സ്ഥാനത്ത് നിന്ന് ഒരു മാസത്തിലേറെയായി ഒഴിവിലായിരുന്ന ട്രാഫിക്-വെസ്റ്റ് ഡിസിപിയായി ഡോ.സുമൻ ഡി പെണ്ണേക്കറിനെ സംസ്ഥാന സർക്കാർ തിങ്കളാഴ്ച മാറ്റി. 2013 ബാച്ച് ഐപിഎസ് ഉദ്യോഗസ്ഥനാണ് സുമൻ. 2012 ബാച്ച് ഓഫീസറായ ജി രാധികയെ ബെംഗളൂരു മെട്രോപൊളിറ്റൻ ട്രാൻസ്‌പോർട്ട് കോർപ്പറേഷന്റെ (ബിഎംടിസി) (സെക്യൂരിറ്റി & വിജിലൻസ്) ഡയറക്ടർ സ്ഥാനത്തു നിന്ന് ബെംഗളൂരു പോലീസ് അസിസ്റ്റന്റ് ഇൻസ്‌പെക്ടർ ജനറലായും സർക്കാർ സ്ഥലം മാറ്റി.