മെല്ബണ്: ഫൈനലിനു തുല്യമായ മൂന്നാമത്തെയും അവസാനത്തെയും കളിയില് ഏഴു വിക്കറ്റിന്റെ തകര്പ്പന് ജയമാണ് ടീം ഇന്ത്യ ആഘോഷിച്ചത്. ഓസ്ട്രേലിയ ഉയര്ത്തിയ 231 റണ്സ് വിജയലക്ഷ്യം ഏഴു വിക്കറ്റ് ബാക്കി നില്ക്കെ ഇന്ത്യ മറികടന്നു. നാലു പന്തുകള് ബാക്കിനില്ക്കെയായിരുന്നു ഇന്ത്യന് ഇന്ത്യന് വിജയം. ഇതോടെ മൂന്നു മത്സര പരമ്പര ഇന്ത്യ സ്വന്തമാക്കി. ഓസീസ് മണ്ണില് ഇന്ത്യയുടെ ആദ്യ ഏകദിന പരമ്പര വിജയമാണിത്.
ആദ്യം ബാറ്റ് ചെയ്ത ഓസീസിനെ മികച്ച ബൗളിങിലൂടെ 230 റണ്സിന് ഇന്ത്യ എറിഞ്ഞിടുകയായിരുന്നു. മറുപടിയില് തുടര്ച്ചയായി മൂന്നാമത്തെ കളിയിലും എംഎസ് ധോണി (87*) പട നയിച്ചപ്പോള് നാലു പന്തും ഏഴു വിക്കറ്റും ബാക്കിനില്ക്കെ ഇന്ത്യ ലക്ഷ്യത്തിലെത്തി. 61 റണ്സുമായി പുറത്താവാതെ നിന്ന കേദാര് ജാദവ് ധോണിക്ക് മികച്ച പിന്തുണ നല്കി. 114 പന്തില് ആറു ബൗണ്ടറികളോടെയാണ് ധോണി 87 റണ്സ് നേടിയതെങ്കില് ജാദവ് 57 പന്തില് ഏഴു ബൗണ്ടറികള് പായിച്ചാണ് 61 റണ്സെടുത്തത്. അപരാജിതമായ നാലാം വിക്കറ്റില് ധോണി- ജാദവ് സഖ്യം 121 റണ്സിന്റെ കൂട്ടുകെട്ടുണ്ടാക്കുകയും ചെയ്തു.
ടോസിനു ശേഷം ഓസീസിനെ ബാറ്റിങിന് അയക്കാനുള്ള ഇന്ത്യന് നായകന് വിരാട് കോലിയുടെ തീരുമാനം പിഴച്ചില്ല. 48.1 ഓവറില് 230 റണ്സിന് ആതിഥേയരെ ഒതുക്കാന് ഇന്ത്യക്കു കഴിഞ്ഞു. പരമ്പരയില് ആദ്യമായി കളിക്കാന് അവസരം ലഭിച്ച സ്പിന്നര് യുസ്വേന്ദ്ര ചഹലിന്റെ തകര്പ്പന് ബൗളിങാണ് ഓസീസിനെ വലിയ സ്കോര് നേടുന്നതില് നിന്നും തടഞ്ഞത്. മല്സരത്തില് ചഹല് ആറു വിക്കറ്റ് പോക്കറ്റിലാക്കി. 10 ഓവറില് 42 റണ്സ് വഴങ്ങിയാണ് താരം ആറു പേരെ പുറത്താക്കിയത്. മെല്ബണില് ഒരു ഇന്ത്യന് ബൗളറുടെ ഏറ്റവും മികച്ച ബൗളിങ് പ്രകടനമാണിത്. ഭുവനേശ്വര് കുമാറിനും മുഹമ്മദ് ഷമിക്കും രണ്ടു വിക്കറ്റ് വീതം ലഭിച്ചു.
രണ്ടാം ഏകദിനത്തില് കളിച്ച ടീമില് മൂന്നു മാറ്റങ്ങളുമായാണ് ഇന്ത്യ ഇറങ്ങിയത്. മുഹമ്മദ് സിറാജിനു പകരം വിജയ് ടീമിലെത്തിയപ്പോള് കുല്ദീപ് യാദവിന് പകരം യുസ്വേന്ദ്ര ചഹലും അമ്പാട്ടി റായുഡുവിന് പകരം കേദാര് ജാദവും കളിച്ചു. ഓസീസ് ടീമില് രണ്ടു മാറ്റങ്ങളുണ്ടായിരുന്നു. ജാസണ് ബെറന്ഡോര്ഫിനു പകരം ബില്ലി സ്റ്റാന്ലേക്കും നതാന് ലിയോണിനു പകരം ആദം സാംപയും പ്ലെയിങ് ഇലവനിലെത്തി. മൂന്നാം വിക്കറ്റില് അര്ധസെഞ്ചുറി കൂട്ടുകെട്ട് തീര്ത്ത മാര്ഷ്-ഖവാജ സഖ്യമാണ് ഓസീസിനെ ഭേദപ്പെട്ട നിലയിലാക്കിയത്. ഇരുവരും 73 റണ്സിന്റെ കൂട്ടുകെട്ടുണ്ടാക്കി.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
