Day: 22 June 2018

ബെംഗളൂരു: സംസ്ഥാനത്തെ കൽപിത (ഡീംഡ്) ആരോഗ്യ സർവകലാശാലകളിൽ കന്നഡിഗരായ വിദ്യാർഥികൾക്ക് 50 ശതമാനം സംവരണം അനുവദിക്കണമെന്ന് മെഡിക്കൽ വിദ്യാഭ്യാസ മന്ത്രി ഡി.കെ.ശിവകുമാർ. ഇതു സംബന്ധിച്ച് കേന്ദ്ര ആരോഗ്യ മന്ത്രാലയത്തിന് കത്തയച്ചിട്ടുണ്ട്. മെഡിക്കൽ, ഡെന്റൽ കോഴ്സുകളിലേക്ക് നടത്തുന്ന ദേശീയ പൊതുപ്രവേശന പരീക്ഷയിൽ കർണാടകയിലെ ഗ്രാമീണ മേഖലകളിലുള്ളവർ പിൻതള്ളപ്പെടുന്ന സാഹചര്യമാണ്. എട്ട് കൽപിത സർവകലാശാലകളിലായി 1630 എംബിബിഎസ് സീറ്റുകളും 640 ഡെന്റൽ സീറ്റുകളും ഉള്ളപ്പോൾ ഇവയിലേറെയും മറ്റു സംസ്ഥാനക്കാർ കയ്യടക്കുകയാണ്. കർണാടകയിലെ ആരോഗ്യമേഖലയിൽ ജോലി ചെയ്യാൻ പരിശീലനം ലഭിച്ചവർക്ക് ക്ഷാമം നേരിടുകയാണെന്നും ഡി.കെ.ശിവകുമാർ പറഞ്ഞു.

ബെംഗളൂരു: ബിബിഎംപി തെരുവ് വിളക്ക് പരിപാലനം നടത്തുന്ന കരാർ ജീവനക്കാരുടെ പണിമുടക്ക് പിൻവലിച്ചു. കുടിശിക തുക ഉടനടി വിതരണം ചെയ്യാമെന്ന് ബിബിഎംപി കമ്മിഷണർ മഹേശ്വർ റാവു ഉറപ്പ് നൽകിയതിനെ തുടർന്നാണ് സമരം പിൻവലിച്ചതെന്നു കരാറുകാരുടെ സംഘടന പ്രസിഡന്റ് കെ.എം.രാജു പറഞ്ഞു. 30 കോടിരൂപയാണ് ബിബിഎംപി വിവിധ സോണുകളിലായി കരാറുകാർക്ക് നൽകാനുള്ളത്. കഴിഞ്ഞ ദിവസം പണിമുടക്ക് പ്രഖ്യാപിച്ചതോടെ നഗരത്തിലെ വിവിധ വാർഡുകളിൽ തെരുവ് വിളക്കുകൾ പ്രകാശിക്കാതിരുന്നത് നഗരവാസികളെ വലച്ചിരുന്നു. 4.80 ലക്ഷം തെരുവ് വിളക്കുകളുടെ സംരക്ഷണ ചുമതലയാണ് കരാർ ജീവനക്കാർക്ക് നൽകിയിട്ടുള്ളത്.