Category: BENGALURU JALAKAM

ബെംഗളൂരു ∙ ശ്രീനാരായണ സമിതിയുടെ നേതൃത്വത്തിൽ വൈവാഹിക സംഗമം ജനുവരി 26ന് അൾസൂരിലെ സമിതി ഹാളിൽ നടക്കും. പങ്കെടുക്കാൻ താൽപര്യമുള്ളവർ മുൻകൂട്ടി റജിസ്റ്റർ ചെയ്യണമെന്നു ജനറൽ സെക്രട്ടറി കെ.സുധാകരൻ അറിയിച്ചു. ഫോൺ: 080 25548133, 9448276947.

ബെംഗളൂരു ∙ ജാലഹള്ളി അയ്യപ്പക്ഷേത്രത്തിൽ വാർഷിക ധ്വജോൽസവം 16നു കൊടിയേറും. വൈകിട്ട് ദീപാരാധനയ്ക്കുശേഷം തന്ത്രി കണ്ഠര് രാജീവര് കൊടിയേറ്റ് നിർവഹിക്കും. ഉൽസവ ദിവസങ്ങളിൽ രാവിലെ അഞ്ചിനു നിർമാല്യ ദർശനം, അഭിഷേകം, ഗണപതിഹോമം, ഉഷഃപൂജ, അന്നദാനം, ദീപാരാധന, പ്രസാദവിതരണം, അത്താഴപൂജ എന്നിവ ഉണ്ടായിരിക്കും. 22ന് ഉൽസവബലിയും 23ന് ആറാട്ടും ഘോഷയാത്രയും ഉണ്ടായിരിക്കും.

ബെംഗളൂരു∙ നീലസന്ദ്ര കേരള മുസ്‌ലിം വെൽഫെയർ അസോസിയേഷന്റെ മിലാദ് സംഗമം എൻ.എ.ഹാരിസ് എംഎൽഎ ഉദ്ഘാടനം ചെയ്തു. പ്രസിഡന്റ് നാസർ അധ്യക്ഷത വഹിച്ചു. അബ്ദുല്‍ ഗഫൂർ സഖാഫി മുഖ്യപ്രഭാഷണം നടത്തി. കെഎംസിസി ജനറൽ സെക്രട്ടറി എം.കെ.നൗഷാദ്, സെക്രട്ടറി ഹാഷിം, എംഎഎ ജനറൽ സെക്രട്ടറി ടി.സി. സിറാജ്, ലത്തീഫ് ഹാജി, സിദിഖ് തങ്ങൾ, നന്ദകുമാർ, കെ.മുനീർ, സുഹൈൽ ഫൈസി എന്നിവർ നേതൃത്വം നൽകി.

ബെംഗളൂരു ∙ യുണൈറ്റഡ് നഴ്സസ് അസോസിയേഷൻ (യുഎൻഎ) കർണാടക സംസ്ഥാന സമ്മേളനം ദേശീയ പ്രസിഡന്റ് ജാസ്മിൻ ഷാ ഉദ്ഘാടനം ചെയ്തു. വൈസ് പ്രസിഡന്റ് ഹാരിസ് മണലമ്പാറ, അനീഷ് മാത്യു, അനൂപ്, അംജിത്, സുബിൻ മാത്യു എന്നിവർ പ്രസംഗിച്ചു. കർണാടക യുഎൻഎയുടെ ആദ്യ മെമ്പർഷിപ് കാർഡ് വിതരണവും ഉദ്ഘാടനം ചെയ്തു. പ്രതിനിധി സമ്മേളനത്തിൽ ഭാരവാഹികളായി അംജിത് എം.തങ്കപ്പൻ (പ്രസി), അനിൽ പാപ്പച്ചൻ (കോഓർഡിനേറ്റർ), സുബിൻ മാത്യു (വർക്കിങ് പ്രസി), ജോൺസൻ (ജന സെക്ര), അനിൽ കലമ്പുകാട്ടിൽ (ട്രഷ) എന്നിവരെ തിരഞ്ഞെടുത്തു.

ബെംഗളൂരു‌ : കേരള സമാജം അൾസൂർ സോണിന്റെ പുതിയ ഓഫിസ് ഉദ്ഘാടനം കോർപറേറ്റർ മഞ്ജുനാഥ് നിർവഹിച്ചു. ചെയർമാൻ ടി.വി.നാരായണൻ അധ്യക്ഷത വഹിച്ചു. കേരള സമാജം പ്രസിഡന്റ് സി.പി.രാധാകൃഷ്ണൻ, ജനറൽ സെക്രട്ടറി റജികുമാർ, പി.വി.എൻ.ബാലകൃഷ്ണൻ, ഒ.വി.മനോജ് കുമാർ, ഷിജോ ഫ്രാൻസിസ്, ബഷീർ, പി.കെ.സുധീഷ്, രാജശേഖരൻ, ആർ.ജെ.നായർ, കെ.ദാമോദരൻ, സീന മനോജ് എന്നിവർ പങ്കെടുത്തു. സോണിന്റെ നേതൃത്വത്തിൽ ജനുവരി ഏഴിനു രക്തദാന ക്യാംപും മെഡിക്കൽ ക്യാംപും സംഘടിപ്പിക്കും.

ബെംഗളൂരു ∙ കർണാടകയിലെ പെന്തക്കോസ്ത് ശുശ്രൂഷകരുടെ പ്രാർഥനാ കൂട്ടായ്മ ഹെവൻലി ആർമീസിന്റെ 14ാം വാർഷിക സമ്മേളനം പാസ്റ്റർ സുരേന്ദ്രൻ ഉദ്ഘാടനം ചെയ്തു. ബ്രദർ സുരേഷ് ബാബു വചനപ്രഭാഷണം നടത്തി. ഹെവൻലി ആർമീസ് പ്രസിഡന്റ് പാസ്റ്റർ സിബി ജേക്കബ്, സെക്രട്ടറി കെ.എൻ.സന്തോഷ് എന്നിവർ പ്രസംഗിച്ചു.

ബെംഗളൂരു ∙ ക്രൈസ്റ്റ് കോളജ് ജൂനിയർ അക്കാദമി സംഘടിപ്പിച്ച ഇന്റർകൊളീജിയറ്റ് സയൻസ് ഫെസ്റ്റിവൽ ‘ഹോപ്’ (ഹോൾവേ ഓഫ് പ്രൊജക്ട് എക്സ്പോ) ഇൻഫോസിസ് സ്ഥാപകരിൽ ഒരാളായ ക്രിസ് ഗോപാലകൃഷ്ണൻ ഉദ്ഘാടനം ചെയ്തു. ഫാ. വിൻസന്റ്, ഫാ. ലിജോ എന്നിവർ പ്രസംഗിച്ചു. രണ്ടുദിവസത്തെ ഫെസ്റ്റിൽ വിവിധ കോളജുകളിൽനിന്നായി 30 പ്രൊജക്ടുകൾ അവതരിപ്പിച്ചു. ക്രൈസ്റ്റ് ജൂനിയർ കോളജ് ഫെസ്റ്റിലെ ജേതാക്കളായി. സമാപന സമ്മേളനത്തിൽ പ്രി–യൂണിവേഴ്സിറ്റി ബോർഡ് അസിസ്റ്റന്റ് ഡയറക്ടർ എച്ച്.വി.ഉഷാദേവി, മുൻ ഡപ്യൂട്ടി ഡയറക്ടർ വെങ്കടേശ്വരപ്പ എന്നിവർ വിശിഷ്ടാതിഥികൾ ആയിരുന്നു.

ബെംഗളൂരു∙ സംസ്ഥാന വനിതാ വികസന കോർപറേഷന്റെ നേതൃത്വത്തിൽ കർമണി ഉൽസവത്തിന് മഹാലക്ഷ്മി ലേഔട്ടിലെ വിവേകാനന്ദ ഗ്രൗണ്ടിൽ തുടക്കമായി. വിവിധ വനിതാ സ്വയം സഹായസംഘങ്ങളുടെ തനത് കരകൗശല, ഭക്ഷ്യ വിഭവങ്ങളാണ് മേളയിലെ പ്രധാന ആകർഷണം. പ്രദർശനം ഞായറാഴ്ച സമാപിക്കും.