ബെംഗളൂരു: മംഗളൂരുവിലെ ബല്ലാൽബാഗ് പ്രദേശത്ത് അമിതവേഗതയിലെത്തിയ ബിഎംഡബ്ല്യു കാർ ഡിവൈഡർ ചാടി സ്‌കൂട്ടിയിലേക്കും രണ്ട് വാഹനങ്ങളിലേക്കും ഇടിച്ചുകയറി ഇരുചക്രവാഹനത്തിൽ സഞ്ചരിക്കുകയായിരുന്ന ഒരു സ്ത്രീക്ക് ഗുരുതരമായി പരിക്കേറ്റു. പ്രീതി മനോജ് (47) എന്ന സ്ത്രീ ഗുരുതരാവസ്ഥയിലാണെന്നും കാറുകളിലൊന്നിൽ ഉണ്ടായിരുന്ന ഏഴ് വയസ്സുകാരനായ അമയ് ജയദേവൻ അപകടനില തരണം ചെയ്തതായും റിപ്പോർട്ടുണ്ട്. നഗരത്തിലെ ബല്ലാൽബാഗ് സർക്കിളിൽ ഉച്ചയ്ക്ക് 12.40ഓടെയാണ് സംഭവം.
പ്രാദേശിക റിപ്പോർട്ടുകൾ പ്രകാരം, ബിഎംഡബ്ല്യു കാർ ഓടിച്ചിരുന്നയാൾ ഡെറെബെയിലിൽ ഇന്റീരിയർ ഡെക്കറേഷൻ ബിസിനസ്സ് നടത്തുന്ന മന്നഗുഡ്ഡ സ്വദേശി ശ്രാവൺ കുമാർ (30) ആണെന്ന് തിരിച്ചറിഞ്ഞിട്ടുണ്ട്. ഇയാളെ പോലീസ് കസ്റ്റഡിയിലെടുത്തു. കാർ ഡിവൈഡറിൽ നിന്ന് ചാടി, റോഡ് മുറിച്ചുകടക്കാൻ കാത്തിരുന്ന കാൽനടയാത്രക്കാരിയായ സ്ത്രീയെ ഇടിക്കുകയും സ്കൂട്ടിയിലിരുന്ന സ്ത്രീയെ ഇടിക്കുകയും ചെയ്തു. ഇവയ്ക്ക് പുറമെ ലാൽബാഗിലേക്ക് പോവുകയായിരുന്ന മറ്റൊരു കാറിലും ബൈക്കിലും ബിഎംഡബ്ല്യു ഇടിച്ചിട്ടുണ്ട്. പ്രകോപിതരായ യാത്രക്കാർ മന്നഗുഡ്ഡ സ്വദേശിയായ 30 വയസ്സുള്ള കാർ ഡ്രൈവർ ശ്രാവൺ കുമാറിനെ മർദിച്ചു. അപകടത്തെ തുടർന്ന് 45 മിനിറ്റോളം ഗതാഗതം തടസ്സപ്പെട്ടു.
പ്രീതി മനോജ് ആശുപത്രിയിലെ ഐസിയുവിൽ ചികിത്സയിലാണ്. അതേസമയം അപകടത്തിന്റെ സിസിടിവി ദൃശ്യങ്ങൾ വൈറലായിട്ടുണ്ട്.
ഇന്ത്യൻ ശിക്ഷാ നിയമത്തിലെ സെക്ഷൻ 279 (അശ്രദ്ധമായി ഡ്രൈവിംഗ്), 338 (ഏതൊരാൾക്കും ഗുരുതരമായ പരിക്കേൽപ്പിക്കുന്ന) വകുപ്പുകൾ പ്രകാരമാണ് മംഗളൂരു വെസ്റ്റ് ട്രാഫിക് പോലീസ് കേസെടുത്തിരിക്കുന്നത്.
