Month: July 2019

ബെംഗളൂരു: മലയാളി ഐ.ടി. ജീവനക്കാരിയെ ഇന്ദിരാനഗറിലെ വീട്ടിൽ മരിച്ചനിലയിൽ കണ്ടെത്തി. പാലക്കാട് ലക്കിടി എലക്കാട്ട് വീട്ടിൽ സൗമ്യ (30) ആണ് മരിച്ചത്. ഭർത്താവ് അശോകിനൊപ്പം ആയിരുന്നു താമസം. അശോക് ജോലികഴിഞ്ഞ് തിരിച്ചെത്തിയപ്പോൾ മുറി പൂട്ടിയിട്ടിരിക്കുകയായിരുന്നു. തുടർന്ന് പോലീസിനെ വിളിച്ചുവരുത്തി മുറി തുറന്നപ്പോഴാണ് മരിച്ചനിലയിൽ കണ്ടെത്തിയത്. ആറുവർഷത്തോളമായി ബെംഗളൂരുവിൽ ഐ.ടി. രംഗത്ത് ജോലിചെയ്തുവരികയായിരുന്നു. അമ്മ: ശാന്തകുമാരി.

ബെംഗളൂരു : നഗരത്തിലെ കാലാവസ്ഥാ വ്യതിയാനം ഡെങ്കിപ്പനി ബാധിച്ചവരുടെ എണ്ണം വർദ്ധിപ്പിച്ചതായി കണക്കുകൾ.കഴിഞ്ഞ രണ്ട് മാസത്തിനിടക്ക് 3785 പേർ ആണ് ഡെങ്കിപ്പനിയെ തുടർന്ന് ചികിൽസ തേടിയത്. ഇതിൽ 2257 പേർ ബെംഗളൂരു നഗര ജില്ലയിൽ നിന്നുള്ളവർ തന്നെയാണ്. മലയാളികൾ കൂടുതൽ താമസിക്കുന്ന മഡിവാള, കോറമംഗല ഭാഗങ്ങളിലാണ് നഗരത്തിൽ ഏറ്റവും കൂടുതൽ ഡെങ്കി റിപ്പോർട്ട് ചെയ്തിരിക്കുന്നത്. ഹാസൻ, കലബുറഗി, ദക്ഷിണ കന്നഡ, ശിവമൊഗ്ഗ ജില്ലകളിലും കൂടുതൽ ഡെങ്കി കേസുകൾ റിപ്പോർട്ട് ചെയ്തിട്ടുണ്ട്. ചിക്കൻ ഗുനിയയും എലിപ്പനിയും നഗരത്തിലെ ചിലയിടങ്ങളിൽ റിപ്പോർട്ട് ചെയ്തിട്ടുണ്ട്.

ബെംഗളൂരു : കൊച്ചിയിലെ പാലാരിവട്ടം പാലം മലയാളികൾക്ക് ഇടയിൽ കുപ്രസിദ്ധമാണല്ലോ. നിർമ്മാണത്തിന് ശേഷം വളരേ വേഗത്തിൽ അറ്റകുറ്റപ്പണി തുടങ്ങേണ്ടി വന്ന കേരളത്തിലെ പാലമാണല്ലോ അത്.ഏകദേശം അതേപോലെ ഒരു വർഷത്തിനുള്ളിൽ അപകടാവസ്ഥയിൽ എത്തിയ പാലമാണ് ദൊഡ്ബലാപൂർ ദേശീയ പാതയിലെ ബാഷെട്ടിഹളളി പാലം. പാലത്തേയും അപ്രോച്ച് റോഡിനേയും തമ്മിൽ ബന്ധിപ്പിക്കുന്ന കോൺഗ്രീറ്റ് ബീം രണ്ട് ദിവസം മുൻപേ തകർന്നാ വീണിരുന്നു, ഈ വഴി ഗതാഗതം പൂർണമായി നിരോധിച്ചിരുന്നു.പരിശോധനക്ക് ശേഷം വേഗത നിയന്ത്രണത്തോടെ വാഹനങ്ങൾ കടത്തിവിടുന്നുണ്ട്. പാലത്തിന് ബലക്കുറവില്ലെന്നും അപ്രോച്ച് റോഡിന് മാത്രമാണ് പ്രശ്നമെന്നും പൊതുമരാമത്ത് വകുപ്പ് അവകാശപ്പെട്ടു.