ബെംഗളൂരു: സംസ്ഥാന സർക്കാരിന്റെ അഭിലാഷ പദ്ധതിയായ ‘ഗൃഹ ജ്യോതി’ സൗജന്യ വൈദ്യുതി പദ്ധതിയുടെ ആനുകൂല്യം കൈപ്പറ്റുന്ന ലക്ഷക്കണക്കിന് ഉപഭോക്താക്കൾക്ക് മുന്നറിയിപ്പുമായി ബാംഗ്ലൂർ ഇലക്ട്രിസിറ്റി സപ്ലൈ കമ്പനി ലിമിറ്റഡ് (ബെസ്കോം). പദ്ധതിയുടെ അർഹരായ ഗുണഭോക്താക്കളെ കണ്ടെത്താനായി നടത്തുന്ന കർശനമായ പുനഃപരിശോധനയുടെ ഭാഗമായി ഏകദേശം 16 ലക്ഷത്തോളം ആളുകൾക്ക് പദ്ധതിയിൽ നിന്നുള്ള ആനുകൂല്യം നഷ്ടപ്പെടാൻ സാധ്യതയുണ്ടെന്ന് ബെസ്കോം അറിയിച്ചു.
സംസ്ഥാനത്തെ കോൺഗ്രസ് സർക്കാരിന്റെ അഞ്ച് പ്രധാന ഗ്യാരണ്ടി പദ്ധതികളിൽ ഒന്നായ ഗൃഹ ജ്യോതി യോജന പ്രകാരം പ്രതിമാസം 200 യൂണിറ്റ് വരെ സൗജന്യ വൈദ്യുതിയാണ് നൽകുന്നത്. എന്നാൽ, പദ്ധതിയുടെ ദുരുപയോഗം തടയുന്നതിനും അർഹരായവർക്ക് മാത്രം പദ്ധതിയുടെ ആനുകൂല്യങ്ങൾ ഉറപ്പാക്കുന്നതിനുമായാണ് ഊർജ്ജ വകുപ്പ് ഈ പുതിയ അവലോകന നടപടികൾക്ക് തുടക്കമിട്ടത്.
ബെസ്കോമിന് കീഴിൽ ആകെ 69 ലക്ഷം ഗുണഭോക്താക്കളാണ് നിലവിലുള്ളത്. ഇതിൽ 16 ലക്ഷം പേരുടെ കൃത്യമായ വിവരങ്ങളോ ആവശ്യമായ രേഖകളോ ഇതുവരെ ബെസ്കോമിന് ലഭിച്ചിട്ടില്ല. മീറ്റർ റീഡർമാരും ബെസ്കോം ജീവനക്കാരും മൂന്നിലധികം തവണ വീടുകൾ സന്ദർശിച്ചിട്ടും പല ഗുണഭോക്താക്കളെയും നേരിട്ട് കണ്ടെത്താൻ കഴിഞ്ഞിട്ടില്ല എന്നതാണ് ബെസ്കോം നേരിടുന്ന പ്രധാന വെല്ലുവിളി. ഈ വീടുകളിൽ ഭൂരിഭാഗവും പൂട്ടിയിട്ട നിലയിലാണ്. കൂടാതെ, വാടകയ്ക്ക് താമസിച്ചിരുന്ന പലരും വീടൊഴിഞ്ഞ് മറ്റ് സ്ഥലങ്ങളിലേക്ക് മാറിപ്പോയതായും പരിശോധനയിൽ വ്യക്തമായിട്ടുണ്ട്.
അതേസമയം, ചില ഉപഭോക്താക്കൾ ആവശ്യമായ വിവരങ്ങൾ നൽകാൻ മനഃപൂർവ്വം മടിക്കുന്നതായും അധികൃതർ ചൂണ്ടിക്കാണിക്കുന്നു. ആദായനികുതി അടയ്ക്കുന്നവരും സംസ്ഥാനത്തിന് പുറത്തുള്ള വോട്ടർ പട്ടികയിൽ ഉൾപ്പെട്ടിട്ടുള്ളവരുമായ ചില ഉപഭോക്താക്കളാണ് ഭാവിയിലെ നടപടികൾ ഭയന്ന് രേഖകൾ ഹാജരാക്കാൻ മുന്നോട്ട് വരാത്തതെന്ന് റിപ്പോർട്ടുകൾ വ്യക്തമാക്കുന്നു.
ഇതുവരെ രേഖകൾ സമർപ്പിക്കാത്ത ഉപഭോക്താക്കൾക്കായി ബെസ്കോം അവസാന അവസരം നൽകിയിട്ടുണ്ട്. വരുന്ന ഒക്ടോബർ 31-നകം തൊട്ടടുത്തുള്ള ബെസ്കോം സബ് ഡിവിഷണൽ ഓഫീസിലെത്തി ആവശ്യമായ രേഖകൾ സഹിതം അപേക്ഷ പൂരിപ്പിച്ചു നൽകേണ്ടതാണ്. ഈ സമയപരിധിക്കുള്ളിൽ വിവരങ്ങൾ നൽകാൻ തയ്യാറാകാത്തവരുടെ പ്രത്യേക പട്ടിക തയ്യാറാക്കി വകുപ്പ് സർക്കാരിന് കൈമാറും. ഈ പുനഃപരിശോധനാ പ്രക്രിയയോട് സഹകരിക്കാത്ത ഉപഭോക്താക്കളെ ഗൃഹ ജ്യോതി യോജനയിൽ നിന്ന് ശാശ്വതമായി ഒഴിവാക്കാനാണ് ഊർജ്ജ വകുപ്പിന്റെ തീരുമാനം.
