Day: 23 October 2017

ബെംഗളൂരു ∙ മജസ്റ്റിക് ബസ് ടെർമിനലിൽനിന്ന് ഫ്രീഡം പാർക്കിലേക്കുള്ള ആനന്ദ്റാവു സർക്കിൾ മേൽപാലം ഇനി ക്രാന്തി വീര സംഗൊളി രായണ മേൽപാലം എന്നറിയപ്പെടും. പാലം നിർമിച്ച് പത്ത് വർഷത്തിന് ശേഷമാണ് ബിബിഎംപി മേൽപാലത്തിന് പേരിടുന്നത്. ബെളഗാവിയിലെ കിട്ടൂർ രാജവംശത്തിലെ ഭരണാധികാരിയായിരുന്ന റാണി ചെന്നമ്മയുടെ സൈന്യാധിപനായിരുന്ന സംഗൊളി രായണ ബ്രിട്ടിഷുകാർക്കെതിരെയുള്ള ഒട്ടേറെ പോരാട്ടങ്ങൾക്ക് നേതൃത്വം നൽകിയിരുന്നു. മജസ്റ്റിക് സിറ്റി റെയിൽവേ സ്റ്റേഷന്റെ പേരും രണ്ട് വർഷം മുൻപ് ക്രാന്തി വീര സംഗൊളി രായണ എന്നാക്കിയിരുന്നു.

ബെംഗളൂരു ∙ ലിംഗായത്ത് പ്രത്യേക മതരൂപീകരണത്തെ പിന്തുണച്ചതാണ് ഗൗരി ലങ്കേഷിന്റെയും എം.എം.കൽബുറഗിയുടെയും വധത്തിനു പിന്നിലെന്ന സംശയം പങ്കുവച്ച് മുൻ ഐഎഎസ് ഉദ്യോഗസ്ഥൻ എസ്.എം.ജമാദാർ. ഇതേ കാര്യത്തിനു തനിക്കും നിരന്തരം ഭീഷണിയുണ്ടായതായും തുടർന്ന് സർക്കാർ പ്രത്യേക സുരക്ഷാ സംവിധാനം ഏർപ്പെടുത്തിയതായും അദ്ദേഹം പറഞ്ഞു. ലിംഗായത്ത് മതരൂപീകരണത്തിനായി ഗൗരി ലങ്കേഷ് പത്രികെ പ്രത്യേക പതിപ്പു പുറത്തിറക്കിയിരുന്നതായും അദ്ദേഹം പറഞ്ഞു. പുരോഗമന സാഹിത്യകാരനും കർണാടക ഓപ്പൺ സർവകലാശാല മുൻ വൈസ് ചാൻസലറുമായിരുന്ന ഡോ. എം.എം.കൽബുറഗിയും ഇതേ ആശയം പ്രചരിപ്പിച്ചിരുന്നതായും ജമാദാർ പറഞ്ഞു.