Year: 2017

ബെംഗളൂരു ∙ ഗൗരി ലങ്കേഷിന്റെ കൊലയാളികളെ പിടികൂടുന്നതിനായുള്ള സർക്കാർ നടപടികൾ ഇഴയുന്നെന്ന് ആരോപിച്ചു പ്രതിഷേധം. ഗൗരി ഹത്യ വിരോധി വേദികെ പ്രവർത്തകരാണ് പ്രതിഷേധവുമായി ആനന്ദ് റാവു സർക്കിളിൽ അണിനിരന്നത്. മുഖ്യമന്ത്രിയുടെ ഒൗദ്യോഗിക വസതിയിലേക്ക് ഇവർ പ്രകടനം നടത്താൻ ശ്രമിച്ചെങ്കിലും പൊലീസ് തടഞ്ഞു. പ്രകടനത്തിനു നേതൃത്വം നൽകിയ ഗൗരിയുടെ സഹോദരി കവിതാ ലങ്കേഷ്, വേദികെ പ്രസിഡന്റ് അനന്ത് നായക്ക് തുടങ്ങിയവരെ അറസ്റ്റ് ചെയ്തു നീക്കി. ഘാതകരെ കണ്ടെത്താൻ വൈകുന്നതിനെക്കുറിച്ച് മുഖ്യമന്ത്രി സിദ്ധരാമയ്യ നേരിട്ടു വിശദീകരണം നൽകണമെന്നായിരുന്നു ഇവരുടെ ആവശ്യം.

ബെംഗളൂരു ∙ അന്തരീക്ഷ മലിനീകരണം കുറയ്ക്കാൻ ബെംഗളൂരുവിലെ കാലപ്പഴക്കം ചെന്ന അരലക്ഷത്തോളം 2–സ്ട്രോക്ക് ഓട്ടോറിക്ഷകളുടെ പെർമിറ്റ് ഗതാഗതവകുപ്പ് റദ്ദാക്കുന്നു. പഴയ ഓട്ടോറിക്ഷകൾ സ്വീകരിക്കാനും പൊളിച്ചു നീക്കാനുമായി നഗരത്തിൽ രണ്ടു കേന്ദ്രങ്ങൾ ഉടൻ തുറക്കും. പഴയ വാഹനങ്ങൾ നൽകുന്ന ഉടമകൾക്കു പുതിയ ഓട്ടോ വാങ്ങാൻ സർക്കാർ മുപ്പതിനായിരം രൂപ സബ്സിഡി നൽകും. അന്തരീക്ഷ മലിനീകരണം ഉണ്ടാക്കുന്ന വാഹനങ്ങൾ മാറ്റി പ്രകൃതി സൗഹാർദ വാഹനങ്ങൾ ഇറക്കാൻ സബ്സിഡി ഇനത്തിൽ 30 കോടി രൂപ സർക്കാർ ഈ വർഷമാദ്യം അനുവദിച്ചിരുന്നു. ബെംഗളൂരുവിലെ അമ്പതിനായിരം ഉൾപ്പെടെ കർണാടകയിലാകെ 1.3 ലക്ഷത്തോളം…

ബെംഗളൂരു∙ നമ്മ മെട്രോ ട്രെയിനിലും സ്റ്റേഷനിലും പാൻമസാലയും ച്യൂയിംഗവും ചവച്ചു തുപ്പുന്നത് തടയാൻ പരിശോധന ശക്തമാക്കാൻ ബിഎംആർസിഎൽ. മെട്രോ ട്രെയിനിൽ തിരക്കേറിയതോടെ പാൻമസാല ഉൽപന്നങ്ങളും ച്യൂയിംഗവും ട്രെയിനിനകത്ത് തുപ്പുന്നത് വർധിക്കുന്ന സാഹചര്യത്തിലാണ് നടപടി. തുപ്പുന്നവരിൽ നിന്ന് 200 രൂപ പിഴയും ഈടാക്കും. ഗോവണിയിലും പ്ലാറ്റ്ഫോമിലെ ഇരിപ്പിടത്തിന് താഴെയും ട്രെയിനിനകത്ത് ബോഗികൾ തമ്മിൽ ഘടിപ്പിക്കുന്നതിന്റെ ഇടയിലുമാണ് കൂടുതൽ ച്യൂയിംഗം അവശിഷ്ടങ്ങൾ കാണുന്നത്. മജസ്റ്റിക് കെംപഗൗഡ സ്റ്റേഷനിലാണ് ച്യൂയിഗം അവശിഷ്ടങ്ങൾ കൂടുതൽ കണ്ടെത്തിയത്. ട്രെയിനിലും സ്റ്റേഷനുകളിലും ഇതു സംബന്ധിച്ച് യാത്രക്കാർക്ക് അറിയിപ്പ് നൽകും.

ബെംഗളൂരു ∙ സമൂഹത്തിൽ അവഗണിക്കപ്പെട്ടുകിടക്കുന്ന വിഭാഗങ്ങൾക്കു സൗജന്യ പഠന സൗകര്യമൊരുക്കാനുള്ള പദ്ധതിയുമായി ബാംഗ്ലൂർ യൂണിവേഴ്സിറ്റി. എച്ച്ഐവി ബാധിതർ, ആസിഡ് ആക്രമണത്തിൽ പരുക്കേറ്റവർ, ഭിന്നലിംഗക്കാർ, കുഷ്ഠരോഗം ബാധിച്ചവർ, തടവുശിക്ഷ അനുഭവിക്കുന്നവരുടെ മക്കൾ എന്നിവർക്കു സൗജന്യമായി പഠന സൗകര്യം ഒരുക്കുമെന്നു വിദൂരവിദ്യാഭ്യാസ വിഭാഗം ഡയറക്ടർ പ്രഫ. ബി.സി.മൈലരപ്പ പറഞ്ഞു. അടുത്ത സിൻഡിക്കറ്റ് യോഗത്തിൽ ഇതു ചർച്ചചെയ്തു പാസാക്കും. ഈ വിഭാഗത്തിൽപെടുന്നവർക്ക് ഉന്നതവിദ്യാഭ്യാസത്തിനുള്ള സൗകര്യങ്ങൾ അപ്രാപ്യമാകുന്ന സാഹചര്യത്തിലാണ് ബാംഗ്ലൂർ യൂണിവേഴ്സിറ്റിയുടെ നടപടി. നിലവിൽ പട്ടിക ജാതി, വർഗ വിഭാഗത്തിൽപെട്ടവർക്കു മാത്രമാണു യൂണിവേഴ്സിറ്റി പഠനത്തിനുള്ള സ്കോളർഷിപ് നൽകുന്നത്.