മൈസൂരു ∙ നിധികുംഭം ലഭിക്കാൻ 10 വയസ്സുകാരനെ ബലി നൽകാൻ ശ്രമിച്ചെന്ന പരാതിയിൽ ബാലന്റെ പിതാവ് ഉൾപ്പെടെ ഏഴുപേർ നഞ്ചൻഗുഡിൽ പൊലീസ് പിടിയിൽ. ഇവരെ ചോദ്യംചെയ്തുവരികയാണ്. കുശാൽനഗർ സ്വദേശി സുധീന്ദ്ര, മദേശ, ബെംഗളൂരു നിവാസി സുരാജു, സുള്ള്യയിൽ നിന്നുള്ള രവീന്ദ്ര, ശിവപ്പ, പുത്തൂർ സ്വദേശി പത്മനാഭ, ആന്ധ്ര കഡപ്പ സ്വദേശി സുരേഷ് എന്നിവരാണ് അറസ്റ്റിലായത്.
രവീന്ദ്രയുടെ മകനെയാണു ബലി നൽകാൻ ശ്രമിച്ചതെന്നു പൊലീസ് പറഞ്ഞു. നഞ്ചൻഗുഡ് നെരലെ ഗ്രാമത്തിലാണു സംഭവം. സുധീന്ദ്ര ഇവിടെ വാങ്ങിയ ഭൂമിയിൽ നിധികുംഭം ഉള്ളതായി ചിലർ ഇയാളെ വിശ്വസിപ്പിച്ചു. തുടർന്നു നിധി കണ്ടെത്താൻ മറ്റുള്ളവർക്കൊപ്പം ഇയാൾ പദ്ധതിയിടുകയായിരുന്നു. ഇതിനായി മന്ത്രവാദികളെയും എത്തിച്ചു.
കുട്ടിയെ ബലി നൽകിയശേഷം മറവുചെയ്യാൻ കുഴി ഉണ്ടാക്കിയതു ശ്രദ്ധയിൽപ്പെട്ട നാട്ടുകാരിൽ ചിലർ പൊലീസിൽ വിവരം അറിയിച്ചു. പൊലീസ് എത്തിയപ്പോൾ കുട്ടിയെ ബലി നൽകാനുള്ള ഒരുക്കത്തിലായിരുന്നു. ഇവിടെനിന്നു പൂജാസാമഗ്രികളും കണ്ടെടുത്തു.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക.
If you cannot read Malayalam,Download BengaluruVartha Android app from Google play store and Click On the News Reader Button.
